2 Samuel 19

Lernen

   

1 Zôaba cha chho ei ta, “Abeipa chata Absalaw cha chakhei ta, mâchhie a sa,” tah ei ta."

2 Chatanachata cha noh liata ama pahniena cha chyhsa zydua chata mâchhiesana tlao vaw châ haw ta; “Abeipa cha a sawchapawpa vâna chata a pachâ a rôh kaw,” ama tahpa cha cha noh liana chata zawpi zy chata vaw thei haw tlôh ei ta.

3 Chatawhcha zawpi zy cha adyuhna liata ama nawhpa vâta ama nozapa ta, a ru lâta amâ râpa hawhta cha noh liana chata a ru lâta khihpi a ngia ei ta.

4 Abeipa chata a hmia a chahu ta, “Hy ei sawchapawpa Absalaw, hy Absalaw y, ei sawchapawpa, ei sawchapawpa y!” tahpa ta abeipa cha thata cha ta.

5 Chatawhcha Zôaba cha o liata abeipa lâna chata angia ta, na lahpinô zy nata na nôtho zy hrona a pabohtuhpa zy cha atanoh he noza ngaitapa ta na tao haw hih,

6 nâma châ haotuhpa zy cha nâ haona kyh liana heta hyutuhpa zy nata pheisaih zy cha na châta khâpa hmah a châ leipa hawhta atanoh he palâsa haw chi ta; Absalaw cha hroh sala keimo zydua he atanoh he tlao thi khai haw ei sih la, cha cha nâ ly ngaitana zie a châ awpa ta atanoh he ei pahno.

7 Chavâta thyu la, pua teh, na chyhsa zy palôh châ ngaitana zie ta bie reih teh; na pua vei khiahtala ABEIPA reipa ta chhie ei sa, chyhsa pakha hmahta atazâ he na hnohta a ypa y aw veih ei; cha cha na châta na thyudyu tawhta atahmâ taihta na chô liata hmo pha leipa a vaw tlôpa zydua hlâta hmahta a pha lei via aw,” tah ta.

8 Chatanachata abeipa cha thyu ta, kuh chhikao liana chata a tyuh ta. “Pachâ teh u, abeipa cha kuh chhikao liana chata â tyuh na,” tahpa ta zawpi zydua cha chho ei ta. Chatawhcha zawpi zydua cha abeipa hmiakô lâna chata vawh haw ei ta.

9 Abeipa chata eima khakhaipa zy ku tawhtapa maniah pachha ta, Philistina mozy ku tawhtapa maniah pachha haw ta, atahmâ he he râh tawhna heta Absalaw cha a râsai ta.

10 Absalaw eima beipa châta sathaw eima thupa cha adyuhna liata thi haw tlôh ta. Khazia e abeipa cha kawh kha hmahta aw pakua awpa nama reih vei?” tahpa ta Izarel mo zydua cha thata a ei ei ta.

11 Chatanachata abeipa Davi cha theihthaipa Zadôka nata Abiatha hnohta, “Zudah machâ zy hnohta, ‘Khazia e abeipa cha a o lâta pakuasa awpa kyh liata a reih hawh chaipa ta nama châ tly? Izarel mozy ta abeipa pakuasana kyh ama reipa cha abeipa lâta tlô haw tlôh ta.

12 Ei unawhpa zy châ eichi ta, ei rupa nata ei sapa châ tlôh eichi ta, khazia ma abeipa pakuasa awpa ta a reih hawh chaipa ta nama châ tly?’ tahpa ta reih teh u.

13 Chatawhcha Amasa hnohta, “Ei rupa nata ei sapa châ va chi mâ? Zôaba vyuhpa ta ei hmiakô liata pheisaih zy hyutuhpa ta ei cha tao leipa khiahtala Khazohpa ta ataona zie hawhta na tao sala, cha hlâta tha via chhaota, a tah na, kei tah teh u,” tahpa ta chyhsa tuah ta.

14 Chatanachata Zudah mo zydua palôhrupa cha chyhsa pakha palôhrupa hawh tlaita paphaosa haw ta; chatanachata beipa hnohta, “Nâ nata na chyhsa zydua chhaota a vaw di teh u,” tah awpa ta chyhsa tuah ta.

15 Chatanachata abeipa cha a di heih ta, Zawdah kei tlô ei ta; Zudah mozy cha abeipa dypa ta Kilkal lâ a vy ei ta, Zawdâh vaw chaka khei haw ei ta.

16 Chatawhcha Bahuri khihpa Benzami chyhsa Kera sawchapawpa Shimei cha a parah ngaitapa ta abeipa Davi dy awpa ta Zudah mozy hnohta pua hra ta;

17 a hnohta Benzami chyhsa sâh kha chhaota. Sawla chhôhkha zy chakaotuhpa Ziba a sawchapawpa pahrawhleipangawh nata a chakaotuhpa syno chhaota a hlao hra ei ta, abeipa mohmô liana chata Zawdâh chaka ei ta,

18 abeipa chhôhkha zy chhihtha nawpa nata a pha a tahpa hawhta a tao nawpa ta balyh chaka khei ei ta. Zawdâh a chaka nata Kera sawchapawpa Shimei cha abeipa hmiakô liata a khu lâta pao ta,

19 abeipa hnohna chata, “Ei zibeipa chata hmoparaona a hneipa ta na rao leipa sala, abeipa ei zibeipa ta Zerusale a puasai nota na chakaotuhpa ta a do lei ngaitapa ta a vaw tao hawpa zy cha a thei thlâh ha leipa sala; abeipa chata palôhrupa ta a vao khah se.

20 Na chakaotuhpa heta hmo ei parao tahpa a pahno na ta; chavâta Zawsi chhôhkha zydua hryta ei zibeipa abeipa cha dy awpa ta atanoh he a zu tua chaipa ei châ mâ tâh,” tah ta.

21 Châhrasala Zeruia sawchapawpa Abisai chata a chhy ta. “ABEIPA sathaw thupa lâta chhie a sapa vâta Shimei he thie awpa châ aw vei mâ?” tah ta.

22 Davi chata, “Nâmo Zeruia sawchapawpa saih u, nâmo ta eina pahnopa awpa eichi khâpa e a y, atanoh he nâ dyuhtuhpa zy châ veih eichi mâ? Atanoh he Izarel hry liatahpa rai thie awpa a châ ma? Atanoh he Izarel mozy chô liata abei ei châpa he a hno vana mâ?’ tah ta.

23 Chatawhcha abeipa chata Shimei hnohta, “Thi chachei ta aw va chi,” tah ta. Abeipa ta a hnohta chhie sa ta.

24 Chatawhcha Sawla sawchapawpa Mephibôse cha abeipa dy awpa ta pua ta; abeipa a puana noh tawhta thlahlôhpa ta a vaw di heih noh taihta a pheizy cha a ky leipa ta, a kahmi a phapa ta chakie leipa ta, a pohzy chhao pasu hra vei.

25 Chatawhcha abeipa dy awpa ta Zerusale a vypa cha abeipa ta a hnohta, “Mephibôse y, khazia e ei hnohta nâ vy hra vei?” tah ta.

26 Ano chata a chhypa ta, “Hy abeipa ei zibeipa y, ei chakaotuhpa ta eina dô, na chakaotuhpa châta, ‘Abeipa hnohta sie awpa ta ei kia nawpa ta alâ ky padia parah teh,’ tah na ta. Na chakaotuhpa he a phei sy tlôh ta.

27 Abeipa ei zibeipa lâta na chakaotuhpa he na leih ta. Châhrasala abeipa ei zibeipa cha Khazohpa vâlyuhchâpa hawhta châ chi ta; chavâta a pha na tahpa hawhta tao mah y.

28 Ei paw chhôhkhapa zydua cha abeipa ei zibeipa hmiakô liana chata thi khai tlâh châ tlai ei ta; châhrasala na chakaotuhpa he pati na dôhlâhpa zy hry liata pahlao chi ta. Chavâta abeipa lâna heta hmo hropa a hnaw ngâ tlâhpa ei châ tlyma?” tah ta.

29 Chatawhcha abeipa chata a hnohta, “Na reipa cha a daih na. Nâma nata Ziba chata râh cha a pachhaih teh u,” tah ta.

30 Chatawhcha Mephibôse chata abeipa hnohta, “Y, ano ta hnei khai mawh sy, abeipa ei zibeipa cha ano lâta thlahlôhpa ta vaw tlô haw tlôh ta,” tah ta.

31 Chatawhcha Kilia chyhsa Barzilai cha Rôkeli tawhta a zu ta; abeipa cha Zawdah liata chhihtha awpa ta a hnohta Zawdah chaka hra ta.

32 Barzilai cha machâ ngaitapa châ ta, kô sychariepa tlai châ ta; Mahanai liata abeipa a y chhôh liana khata niepa zy a vaw tôh tyh ta; chyhsa hneirôh ngaitapa châ ta.

33 Chatawhcha Abeipa ta Barzilai hnohta, “Kei hnohta sie hra la, ei hnohta Zerusale liata ei cha pasa aw,” tah ta.

34 Chatawhcha Barzilai chata abeipa hnohta, “Kô khazie a hroh awpa ma châ na ta, Zerusale lâ abeipa hnohta ei khy hra awpa châ?

35 Atahmâ he kô sycharie châ na ta, a chhie nata a pha chhao a panano thaipa ma ei châ tly? Na chakaotuhpa heta ei niepa nata ei dopa zy he a pahâhpa nata pahâh leipa chhao ei pahno thei khao tlyma? Chapaw nata chanô sahlao hla sapa pyu chhao ei thei thei khao ma? Chavâta na chakaotuhpa he khazia e abeipa ei zibeipa châta phaohripa ei châ aw?

36 Na chakaotuhpa heta abeipa hnohta Zawdâh haosâ chaka awpa deita ei chhuah. Khazia e, abeipa chata cha hawhta phana ty eina thô cheingei aw?

37 Ngiachhiepa ta na chakaotuhpa he na padisa heih la, ei nô nata ei paw thlâ yna keimo khih tlai liata ei thi aw na. Anodeikuacha na chakaotuhpa Kimha he abeipa ei zibeipa hnohta chaka sala; a chô liata a pha na tahpa hawhta tao mah y,” tah ta.

38 Chatawhcha abeipa chata a chhy ta, “Kimha cha ei hnohta chakah aw ta, a pha na tahna zie lymâ hawhta a chô liata ei tao aw; hmo khâpa rai eina hiapa maih chi cha ei cha taopa lymâ aw,” tah ta.

39 Chatawhcha zawpi zydua cha Zawdah chaka ei ta, abeipa chhao cha chaka hra ta; abeipa chata Barzilai cha sy ta, byhnâ aw pata, ano su lâta kua haw heih ta.

40 Abeipa cha Kilkal lâta Zudah chyhsa zydua chata abeipa cha chhihtha ei ta, Izarel chyhsa chhao a khophie a hlao ei ta.

41 Chatawhcha Izarel chyhsa zydua chata abeipa lâta a vy ei ta, abeipa hnohta, “Khazia e, eima unawhpa Zudah mozy heta cha hnei via pachaih ei ta, abeipa nata a chhôhkha zy nata Davi chyhsa zydua chhao Zawdah haosâ lâta amâ chhi pâ khai haw tly?” tah ei ta.

42 Zudah mo zydua chata Izarel mozy a chhy ei ta, “Abeipa cha eima hniapa a châpa vâta a châ. Khazia e he kyh liana heta nama pathi a ia tly? Abeipa hneipa a ngâpâ pata a ypa ma eima châ tly? Hmo piepa kheihawhpa tlyma chhao maniah a pie tlyma?” tah ei ta.

43 Chatawhcha Izarel mozy chata Zudah mozy a chhy ei ta, “Abeipa liana heta tovyuh miahrawh hnei pi ta, Davi liana chata nâmo hlâta a dona kyh eima hnei via mâ tâh. Khazia e khâpa sawta maniah nama reih vei? Eima beipa pakuasana kyh he a pahrua tuatuhpa châ ma pi mâ?” tah ei ta. Chatanachata Zudah mozy bie cha Izarel mozy bie hlâta pachyu via haw ta.