1 Abeizy 17

¹ Tisabi khih Kilia râh liata Tisabi khihpa Elaiza ta Ahaba hnohta, “ABEIPA a kiapâh liata ei y tyhna, Izarel zy Khazohpa hrona reipa ta ei reih, kô khazie tlyma chhôh cha ei bie leipa ta cha diati nata vâsua rai tla aw vei,” tah ta.

² ABEIPA bie cha a hnohta vaw tlô ta,

³ “He tawhtapa he pua la, nochhi lâ pangaipa ta sie la, Zawdah kiapâh liata a ypa Cheri vatiepa liata a nyu teh.

⁴ Cha vatiepa ti cha doh aw chi ta, cha liata cha pasatuh awpa ta ra-awh zy bie ei pie ha na,” tahpa ta.

⁵ Chatanachata sie ta, ‘ABEIPA bie hawhta tao ta; Zawdah kiapâh liata a ypa Cheri vatiepa liana chata y ta. Chatawhcha ra-awh zy ta my ta viahchhâ nata sa vaw cheipa tyh ei ta, zâ lâta viahchhâ nata sa vaw cheipa heih tyh ei ta; vatiepa ti cha doh ta.

⁷ Chatawhcha a noh hro viapa ta cha cha râh liana chata a vâ rai a suah leipa vâta chavah cha kua haw ta.

⁸ ABEIPA bie a hnohta vaw tlô ta,

⁹ “Thyu la Sidaw râh liata Zerepha khih lâta sie la, cha liana chata y teh. Cha pasa awpa ta nôhmei pakha bie ei pie haw na,” tahpa ta.

¹⁰ Chatanachata thyu ta, Zerepha khih lâna chata sie ta; cha khih kuh chhikao a kei ngia na ta, nôhmei pakha tho pahrei vaw pakhypa y ta; ano cha aw ta, “Beih ta ti a chyhta na kei lapa teh, ei do aw na,” tah ta.

¹¹ Chatawhcha la awpa ta a vawpa cha kei aw sao ta, “Viahchhâ a chyhta chhao na vaw cheipa mah y,” tah ta.

¹² Ano chata, “ABEIPA na Khazohpa hrona reipa ta ei reih, viahchhâ la hnei leipa na ta, beih liata viahdie pazah kha deita nata a o liata sathaw a chyhta deita hnei na ta; ei tlô nata keima châta nata ei sawchapawpa châta tao nawpa ta tho pahrei miano tlyma deita pakhy na ta, chatanachata nie aw pi ta, tlâ eima thi aw,” tah ta.

¹³ Elaiza ta a hnohta, “Chi khâ; na reipa hawhna chata kei tao teh; anodeikuacha cha kei châta viahchhâ chyhpa ta na vaw taopa tua la, cha cha na vaw cheipa la, cha khai tawhta nâma châta nata na sawchapawpa châta tao lavâh chi.

¹⁴ ABEIPA Izarel zy Khazohpa ta, ‘ABEIPA ta alei chô liana heta vâsua a vaw pasuasa hlâ lei cha viahdie beih cha rua hlei leipa aw ta, a o liata sathaw chhao chhâ aw vei,’ tahpa ta,” tah ta.

¹⁵ Chatanachata Elaiza reipa hawhna chata tao ta; ano nata a chhôhkha nata Elaiza chhaota noh khazie leichâ tlyma nie ei ta.

¹⁶ Elaiza hmâpa ta a reipa ABEIPA bie hawhna khata viahdie beih cha rua hlei leipa ta a o liata sathaw chhao chhâ hra vei.

¹⁷ Cha hmozy hnôh lâna chata o a hneituhnô chanô sawchapawpa cha tlâh leipa ta y ta; a pasapa cha paru kaw ta, a hu chhâ ha ta.

¹⁸ Chatawhcha anô chata Elaiza hnohta, “Hy, nâ Khazohpa chyhsa y, nâma nata kei he, khâpa ma eima châ? Ei moleina pahnosa awpa nata ei sawchapawpa na thiepa awpa ta na châ he zaw!” tah ta.

¹⁹ Ano chata a hnohta, “Na sawchapawpa cha na vaw pie tua,” tah ta. Chatanachata â pyh haipa cha lapa ta, a yna chhôhpadâhpa lâna chata khykhei ta, ano rakhô liata pazia ta.

²⁰ ABEIPA pado ta, “Hy ABEIPA ei Khazohpa y, ei pahrâna nôhmei nô chô liana chhao heta a sawchapawpa thiepâpa ta hmo pha leipa na vaw patlôsa mâ?” tah ta.

²¹ Chatanachata hawti chô liana chata ei thôh a byu hnie ta, ABEIPA cha pado ta, “Hy ABEIPA ei Khazohpa y, ngiachhiepata ta he hawti hrona he ano liana heta vaw paysa heih mah y,” tah ta.

²² ABEIPA ta Elaiza bie cha vaw nahthliepa ta; chatanachata hawti hrona cha ano liana chata vaw y heih ta, vaw hroh ha heih ta.

²³ Chatawhcha Elaiza chata hawtipa cha a chhi ta, chhôhpadâhpa tawhtapa cha o chhôh lâ chôkhei ta, a nô pie haw ta; Elaiza ta, “Moh tua, na sawchapawpa he a hroh haw hih,” tah ta.

²⁴ Chanô chata Elaiza hnohta, “Atahmâ la Khazohpa chyhsa châ chi ta, na pakah liata ABEIPA bie he hmeihseihpa a châ tahpa ei pahno haw,” tah ta.