Novokřesťanské studium Bible

Bible

 

Zephanias 3

Studie

   

1 Væ provocatrix, et redempta civitas, columba !

2 non audivit vocem, et non suscepit disciplinam ; in Domino non est confisa, ad Deum suum non appropinquavit.

3 Principes ejus in medio ejus quasi leones rugientes ; judices ejus lupi vespere, non relinquebant in mane.

4 Prophetæ ejus vesani, viri infideles ; sacerdotes ejus polluerunt sanctum, injuste egerunt contra legem.

5 Dominus justus in medio ejus non faciet iniquitatem ; mane, mane judicium suum dabit in lucem, et non abscondetur ; nescivit autem iniquus confusionem.

6 Disperdidi gentes, et dissipati sunt anguli earum ; desertas feci vias eorum, dum non est qui transeat ; desolatæ sunt civitates eorum, non remanente viro, neque ullo habitatore.

7 Dixi : Attamen timebis me, suscipies disciplinam ; et non peribit habitaculum ejus, propter omnia in quibus visitavi eam : verumtamen diluculo surgentes corruperunt omnes cogitationes suas.

8 Quapropter exspecta me, dicit Dominus, in die resurrectionis meæ in futurum : quia judicium meum ut congregem gentes, et colligam regna, et effundam super eos indignationem meam, omnem iram furoris mei : in igne enim zeli mei devorabitur omnis terra.

9 Quia tunc reddam populis labium electum, ut invocent omnes in nomine Domini, et serviant ei humero uno.

10 Ultra flumina Æthiopiæ, inde supplices mei ; filii dispersorum meorum deferent munus mihi.

11 In die illa non confunderis super cunctis adinventionibus tuis, quibus prævaricata es in me, quia tunc auferam de medio tui magniloquos superbiæ tuæ, et non adjicies exaltari amplius in monte sancto meo.

12 Et derelinquam in medio tui populum pauperem et egenum : et sperabunt in nomine Domini.

13 Reliquiæ Israël non facient iniquitatem, nec loquentur mendacium, et non invenietur in ore eorum lingua dolosa, quoniam ipsi pascentur, et accubabunt, et non erit qui exterreat.

14 Lauda, filia Sion ; jubila, Israël : lætare, et exsulta in omni corde, filia Jerusalem.

15 Abstulit Dominus judicium tuum ; avertit inimicos tuos. Rex Israël Dominus in medio tui : non timebis malum ultra.

16 In die illa dicetur Jerusalem : Noli timere ; Sion : Non dissolvantur manus tuæ.

17 Dominus Deus tuus in medio tui fortis, ipse salvabit : gaudebit super te in lætitia, silebit in dilectione sua, exsultabit super te in laude.

18 Nugas, qui a lege recesserant, congregabo, quia ex te erant : ut non ultra habeas super eis opprobrium.

19 Ecce ego interficiam omnes qui afflixerunt te in tempore illo : et salvabo claudicantem, et eam quæ ejecta fuerat congregabo : et ponam eos in laudem, et in nomen, in omni terra confusionis eorum,

20 in tempore illo quo adducam vos, et in tempore quo congregabo vos. Dabo enim vos in nomen, et in laudem omnibus populis terræ, cum convertero captivitatem vestram coram oculis vestris, dicit Dominus.

   

Ze Swedenborgových děl

 

De Coelo et de Inferno # 365

Prostudujte si tuto pasáž

  
/ 603  
  

365. Ex his constare potest, quod divites aeque ac pauperes in caelum veniant, et tam facile unus quam alter. Quod credatur quod pauperes facile, ac divites aegre, est quia Verbum non intellectum est, ubi nominantur divites et pauperes. Per "divites" ibi intelliguntur in spirituali sensu illi qui abundant cognitionibus boni et veri, ita qui intra ecclesiam sunt ubi est Verbum; et per "pauperes" illi quibus deficiunt cognitiones illae, et [qui] tamen desiderant illas, ita qui extra ecclesiam sunt ubi non Verbum.

[2] Per "divitem" qui induebatur purpura et bysso, et projectus est in infernum, intelligitur gens Judaica; quae quia habebat Verbum, et inde abundabat cognitionibus boni et veri, dives vocatur: per "vestes ex purpura" etiam significantur cognitiones boni, et per "vestes ex bysso" cognitiones veri: 1 per "pauperem" autem qui projectus erat ad vestibulum ejus, et desiderabat saturare micis quae cadebant ex mensa divitis, et portatus ab angelis in caelum, intelliguntur gentes, quae non habeant cognitiones boni et veri, et tamen desiderabant illas (Luca 16:19-31). 2 Per "divites" qui vocati ad cenam magnam, et se excusaverunt, intelligitur etiam gens Judaica; et per "pauperes" loco illorum introductos intelliguntur gentes quae extra ecclesiam (Luca 24:16-24).

[3] Quinam intelliguntur per Divitem, de quo Dominus dicit,

"Facilius est camelum per foramen acus transire, quam divitem in regnum Dei introire," (Matthaeus 19:24);

etiam dicetur: per "divitem" ibi intelliguntur divites in utroque sensu tam naturali quam spirituali divites in sensu naturali, qui abundant opibus, et ponunt cor in illis in spirituali autem sensu qui abundant cognitionibus et scientiis, nam hae sunt divitiae spirituales, et per illas se ex propria intelligentia volunt introducere in illa quae caeli et ecclesiae sunt, quod quia est contra ordinem Divinum, dicitur quod facilius sit camelo per foramen acus transire in illo enim sensu per "camelum" significatur cognitivum et scientificum in genere, et per "foramen acus" verum spirituale: 3 quod per "camelum" et "foramen acus" illa intelligantur, non hodie scitur, quia non huc usque aperta fuit scientia quae docet quid in sensu spirituali significatur per illa quae in sensu litterali in Verbo dicta sunt in singulis enim Verbi spiritualis sensus est, et quoque naturalis; nam Verbum, ut conjunctio esset caeli cum mundo, seu angelorum cum hominibus, postquam desiit conjunctio immediata, per meras correspondentias naturalium cum spiritualibus conscriptum est: inde patet, quinam per "divitem" ibi in specie intelliguntur.

[4] Quod per "divites" in Verbo in sensu spirituali intelligantur qui in cognitionibus veri et boni sunt, et per "divitias" ipsae cognitiones, quae quoque sunt divitiae spirituales, ex variis locis ibi constare potest:

(Quae videanturEsaias 10:12-14; 30:6-7; 45:3; Jeremias 17:3; 48:7; 4 50:36-37; 51:13; Daniel 5:2-4; Ezechiel 26:7, 12; 27:1 ad fin.; Sacharia 9:3-4; Psalmus 45:13 [B.A. 12]; 5 Hoschea 12:9; Apocalypsis 3:17-18; Luca 14:33; et alibi).

et quod per "pauperes"in spirituali sensu significentur qui cognitiones boni et veri non habent, et usque desiderant illas (Matthaeus 11:5; Luca 6:20-21; 14:21; Esaias 14:30; 29:19; 41:17-18; Zephanias 3:12-13). 6

Haec omnia loca videantur explicata secundum spiritualem sensum in Arcanis Caelestibus (10227).

Poznámky pod čarou:

1. [Swedenborg's footnote] Quod "vestes" significent vera, ita cognitiones (1033 [1073?] 2576, 5319, 5954, 9212, 9216, 9952, 10536).

Quod "purpura" significet bonum caeleste (9467). Quod byssus significet verum ex origine caelesti (5319, 9469, 9744).

2. [Editor's footnote] 19-31 pro "19, 31"

3. [Swedenborg's footnote] Quod "camelus" in Verbo significet cognitivum et scientificum in genere (3048, 3071, 3143, 3145).

Quid "acupictum," "acupingere," et inde quid "acus," (6988). Quod ex scientificis intrare in vera fidei sit contra Divinum ordinem (10236).

Quod illi qui id faciunt fiant vesani quoad illa quae caeli et ecclesiae sunt (128, 129, 130, 232, 233, 6047).

Et quod in altera vita, cum de spiritualibus cogitant, fiant quasi ebrii (1072).

Quales porro sunt (196).

Exempla illustrantia, quod spiritualia non capi possint si per illa intratur (233, 2094, 2196, 2203, 2209).

Quod e spirituali vero intrare liceat in scientifica quae naturalis hominis, non autem vicissim; quia influxus spiritualis in naturale datur, non autem influxus naturalis in spirituale (3219, 5119, 5259, 5427, 5428, 5476, 6322, 9110, 9111 [dele?]). Quod primum agnoscenda sint vera Verbi et ecclesiae, et dein liceat consulere scientifica, non autem vice versa (6047).

4. [Editor's footnote] xlvii. pro "xlvii."

5. [Editor's footnote] 45:13 [B.A. 12] pro "40:13." Vide Arcana Coelestia 10227

6. [Editor's footnote] 13 pro "18"

  
/ 603  
  

©2024 New Christian Bible Study Corporation. All rights reserved. Printed from newchristianbiblestudy.org