Bible

 

Leviticus 8

Studie

   

1 Locutusque est Dominus ad Moysen, dicens :

2 Tolle Aaron cum filiis suis, vestes eorum, et unctionis oleum, vitulum pro peccato, duos arietes, canistrum cum azymis :

3 et congregabis omnem cœtum ad ostium tabernaculi.

4 Fecit Moyses ut Dominus imperaverat. Congregataque omni turba ante fores tabernaculi,

5 ait : Iste est sermo, quem jussit Dominus fieri.

6 Statimque obtulit Aaron et filios ejus. Cumque lavisset eos,

7 vestivit pontificem subucula linea, accingens eum balteo, et induens eum tunica hyacinthina, et desuper humerale imposuit,

8 quod astringens cingulo aptavit rationali, in quo erat Doctrina et Veritas.

9 Cidari quoque texit caput : et super eam, contra frontem, posuit laminam auream consecratam in sanctificatione, sicut præceperat ei Dominus.

10 Tulit et unctionis oleum, quo linivit tabernaculum cum omni supellectili sua.

11 Cumque sanctificans aspersisset altare septem vicibus, unxit illud, et omnia vasa ejus, labrumque cum basi sua sanctificavit oleo.

12 Quod fundens super caput Aaron, unxit eum, et consecravit :

13 filios quoque ejus oblatos vestivit tunicis lineis, et cinxit balteis, imposuitque mitras, ut jusserat Dominus.

14 Obtulit et vitulum pro peccato : cumque super caput ejus posuisset Aaron et filii ejus manus suas,

15 immolavit eum, hauriens sanguinem, et tincto digito, tetigit cornua altaris per gyrum : quo expiato et sanctificato, fudit reliquum sanguinem ad fundamenta ejus.

16 Adipem vero qui erat super vitalia, et reticulum jecoris, duosque renunculos, cum arvinulis suis, adolevit super altare :

17 vitulum cum pelle, et carnibus, et fimo, cremans extra castra, sicut præceperat Dominus.

18 Obtulit et arietem in holocaustum : super cujus caput cum imposuissent Aaron et filii ejus manus suas,

19 immolavit eum, et fudit sanguinem ejus per circuitum altaris.

20 Ipsumque arietem in frusta concidens, caput ejus, et artus, et adipem adolevit igni,

21 lotis prius intestinis et pedibus : totumque simul arietem incendit super altare, eo quod esset holocaustum suavissimi odoris Domino, sicut præceperat ei.

22 Obtulit et arietem secundum in consecratione sacerdotum, posueruntque super caput ejus Aaron et filii ejus manus suas :

23 quem cum immolasset Moyses, sumens de sanguine ejus, tetigit extremum auriculæ dextræ Aaron, et pollicem manus ejus dextræ, similiter et pedis.

24 Obtulit et filios Aaron : cumque de sanguine arietis immolati tetigisset extremum auriculæ singulorum dextræ, et pollices manus ac pedis dextri, reliquum fudit super altare per circuitum :

25 adipem vero, et caudam, omnemque pinguedinem quæ operit intestina, reticulumque jecoris, et duos renes cum adipibus suis et armo dextro separavit.

26 Tollens autem de canistro azymorum, quod erat coram Domino, panem absque fermento, et collyridam conspersam oleo, laganumque, posuit super adipes, et armum dextrum,

27 tradens simul omnia Aaron et filiis ejus. Qui postquam levaverunt ea coram Domino,

28 rursum suscepta de manibus eorum, adolevit super altare holocausti, eo quod consecrationis esset oblatio, in odorem suavitatis, sacrificii Domino.

29 Tulitque pectusculum, elevans illud coram Domino, de ariete consecrationis in partem suam, sicut præceperat ei Dominus.

30 Assumensque unguentum, et sanguinem qui erat in altari, aspersit super Aaron et vestimenta ejus, et super filios illius ac vestes eorum.

31 Cumque sanctificasset eos in vestitu suo, præcepit eis, dicens : Coquite carnes ante fores tabernaculi, et ibi comedite eas ; panes quoque consecrationis edite, qui positi sunt in canistro, sicut præcepit mihi Dominus, dicens : Aaron et filii ejus comedent eos :

32 quidquid autem reliquum fuerit de carne et panibus, ignis absumet.

33 De ostio quoque tabernaculi non exibitis septem diebus, usque ad diem quo complebitur tempus consecrationis vestræ ; septem enim diebus finitur consecratio :

34 sicut et impræsentiarum factum est, ut ritus sacrificii compleretur.

35 Die ac nocte manebitis in tabernaculo observantes custodias Domini, ne moriamini : sic enim mihi præceptum est.

36 Feceruntque Aaron et filii ejus cuncta quæ locutus est Dominus per manum Moysi.

   

Ze Swedenborgových děl

 

Arcana Coelestia # 10090

Prostudujte si tuto pasáž

  
/ 10837  
  

10090. ‘Et erit tibi in portionem’: quod significet communicationem cum illis qui in veris Divinis, constat ex repraesentatione Moschis, cui pectus esset in portionem, quod sit Dominus quoad Divinum Verum, ita Divinum Verum quod a Domino, de qua n. 6752, 1 7010, 7014 , 9372, et ex significatione ‘esse in portionem’ quod sit communicatio, nam quae Moschi, Aharoni, filiis ejus, et populo dabantur ex sacrificiis, significabant communicationem sancti Divini cum illis; et omnis communicatio fit secundum quale ejus qui recipit, ita secundum quale repraesentationis apud illos qui recipiebant;

[2] quod pectus Moschi datum fuerit in portionem, et armus Aharoni, de quo sequitur, erat causa quia hic agitur de communicatione ac de appropriatione Divini Veri et Divini Boni a Domino in caelo et in Ecclesia; ac duo sunt quae recipiuntur ibi, nempe Divinum Verum et Divinum Bonum, utrumque a Domino, Divinum Verum ab illis qui in regno spirituali Domini sunt, ac Divinum Bonum ab illis qui in regno caelesti, videantur citata n. 9277, 9684, ideo pectus dabatur Moschi in portionem, et armus Aharoni, per ‘pectus’ enim significatur Divinum Verum in regno spirituali Domini, n. 10087, et per ‘armum’ Divinum Bonum in regno caelesti, n. 10075, et quoque per ‘panes in corbe’, qui etiam cesserunt Aharoni, n. 10077.

[3] Quod Moscheh repraesentaverit Dominum quoad Divinum Verum, supra ostensum est, et quod Aharon cum inauguratus est in sacerdotium, repraesentaverit Dominum quoad Divinum Bonum, videatur n. 9806. Quod Moschi cesserit pectus in portionem, constat in Levitico, ubi etiam 2 agitur de inauguratione Aharonis et filiorum ejus in sacerdotium, Moscheh sumpsit pectus, et agitavit illud agitationem coram Jehovah, de ariete impletionum, et fuit Moschi in portionem, quemadmodum praecepit Jehovah Moschi, 8:29.

Poznámky pod čarou:

1. The following two (or in some cases more) words are transposed in the Manuscript.

2. The Manuscript places this after sacerdotium.

  
/ 10837  
  

This is the Third Latin Edition, published by the Swedenborg Society, in London, between 1949 and 1973.