Bible

 

Leviticus 8

Studie

   

1 Locutusque est Dominus ad Moysen, dicens :

2 Tolle Aaron cum filiis suis, vestes eorum, et unctionis oleum, vitulum pro peccato, duos arietes, canistrum cum azymis :

3 et congregabis omnem cœtum ad ostium tabernaculi.

4 Fecit Moyses ut Dominus imperaverat. Congregataque omni turba ante fores tabernaculi,

5 ait : Iste est sermo, quem jussit Dominus fieri.

6 Statimque obtulit Aaron et filios ejus. Cumque lavisset eos,

7 vestivit pontificem subucula linea, accingens eum balteo, et induens eum tunica hyacinthina, et desuper humerale imposuit,

8 quod astringens cingulo aptavit rationali, in quo erat Doctrina et Veritas.

9 Cidari quoque texit caput : et super eam, contra frontem, posuit laminam auream consecratam in sanctificatione, sicut præceperat ei Dominus.

10 Tulit et unctionis oleum, quo linivit tabernaculum cum omni supellectili sua.

11 Cumque sanctificans aspersisset altare septem vicibus, unxit illud, et omnia vasa ejus, labrumque cum basi sua sanctificavit oleo.

12 Quod fundens super caput Aaron, unxit eum, et consecravit :

13 filios quoque ejus oblatos vestivit tunicis lineis, et cinxit balteis, imposuitque mitras, ut jusserat Dominus.

14 Obtulit et vitulum pro peccato : cumque super caput ejus posuisset Aaron et filii ejus manus suas,

15 immolavit eum, hauriens sanguinem, et tincto digito, tetigit cornua altaris per gyrum : quo expiato et sanctificato, fudit reliquum sanguinem ad fundamenta ejus.

16 Adipem vero qui erat super vitalia, et reticulum jecoris, duosque renunculos, cum arvinulis suis, adolevit super altare :

17 vitulum cum pelle, et carnibus, et fimo, cremans extra castra, sicut præceperat Dominus.

18 Obtulit et arietem in holocaustum : super cujus caput cum imposuissent Aaron et filii ejus manus suas,

19 immolavit eum, et fudit sanguinem ejus per circuitum altaris.

20 Ipsumque arietem in frusta concidens, caput ejus, et artus, et adipem adolevit igni,

21 lotis prius intestinis et pedibus : totumque simul arietem incendit super altare, eo quod esset holocaustum suavissimi odoris Domino, sicut præceperat ei.

22 Obtulit et arietem secundum in consecratione sacerdotum, posueruntque super caput ejus Aaron et filii ejus manus suas :

23 quem cum immolasset Moyses, sumens de sanguine ejus, tetigit extremum auriculæ dextræ Aaron, et pollicem manus ejus dextræ, similiter et pedis.

24 Obtulit et filios Aaron : cumque de sanguine arietis immolati tetigisset extremum auriculæ singulorum dextræ, et pollices manus ac pedis dextri, reliquum fudit super altare per circuitum :

25 adipem vero, et caudam, omnemque pinguedinem quæ operit intestina, reticulumque jecoris, et duos renes cum adipibus suis et armo dextro separavit.

26 Tollens autem de canistro azymorum, quod erat coram Domino, panem absque fermento, et collyridam conspersam oleo, laganumque, posuit super adipes, et armum dextrum,

27 tradens simul omnia Aaron et filiis ejus. Qui postquam levaverunt ea coram Domino,

28 rursum suscepta de manibus eorum, adolevit super altare holocausti, eo quod consecrationis esset oblatio, in odorem suavitatis, sacrificii Domino.

29 Tulitque pectusculum, elevans illud coram Domino, de ariete consecrationis in partem suam, sicut præceperat ei Dominus.

30 Assumensque unguentum, et sanguinem qui erat in altari, aspersit super Aaron et vestimenta ejus, et super filios illius ac vestes eorum.

31 Cumque sanctificasset eos in vestitu suo, præcepit eis, dicens : Coquite carnes ante fores tabernaculi, et ibi comedite eas ; panes quoque consecrationis edite, qui positi sunt in canistro, sicut præcepit mihi Dominus, dicens : Aaron et filii ejus comedent eos :

32 quidquid autem reliquum fuerit de carne et panibus, ignis absumet.

33 De ostio quoque tabernaculi non exibitis septem diebus, usque ad diem quo complebitur tempus consecrationis vestræ ; septem enim diebus finitur consecratio :

34 sicut et impræsentiarum factum est, ut ritus sacrificii compleretur.

35 Die ac nocte manebitis in tabernaculo observantes custodias Domini, ne moriamini : sic enim mihi præceptum est.

36 Feceruntque Aaron et filii ejus cuncta quæ locutus est Dominus per manum Moysi.

   

Ze Swedenborgových děl

 

Apocalypsis Revelata # 779

Prostudujte si tuto pasáž

  
/ 962  
  

779. Quoniam "oleum" hic inter sancta cultus nominatur, et significat bonum caeleste, dicetur hic aliquid de "Oleo Unctionis," quod apud antiquos in usu fuit, et postea mane datum filiis Israelis. Quod antiquis temporibus Unxerint lapides erectos in statuas, patet ex Genesis 28:18-19, 22;

Quod etiam unxerint arma belli, scuta et clypeos, (2 Samuelis 1:21; Esaias 21:5);

Quod mandatum sit, ut oleum sanctitatis praepararent, quo ungerent omnia sancta Ecclesiae; quod illo unxerint Altare et omnia ejus vasa, tum Tabernaculum et omnia ejus, (Exodus 30:22-33; 40:9-11; Leviticus 8:10-12; Numeri 7:1);

Quod eo unxerint illos qui sacerdotio fungerentur, et illorum vestes, (Exodus 29:7, 29; 30:30; 40:13-15; Leviticus 8:12; 1 Psalm. 133:1-3);

Quod illo unxerint Prophetas, (1 Regnum 19:15-16);

Quod illo unxerint Reges, et quod ideo Reges dicti sint "Uncti Jehovae," (1 Samuelis 10:1; 15:1; 16:3, 6, 12-13; 2 24:7, 11 (B.A. 6, 10); 26:9, 11, 16, 23; 3 2 Samuelis 1:16; 2:4, 7; 5:17; 4 2 Samuelis 19:22 (B.A. 21); 1 Regnum 1:34-35; 19:15-16; 2 Regnum 9:3; 11:12; 5 23:30; Threni 4:20; Habakuk 3:13; Psalm. 2:2, 6; Psalm. 20:6; Psalm. 28:8; Psalm. 45:8 (B.A. 7); 6 Psalm. 84:9; Psalm. 89:21, 39, 52 (B.A. 20, 38, 51); 7 Psalm. 132:17).

Quod unctio per oleum sanctitatis mandata sit, est quia "oleum" significabat bonum amoris, et repraesentabat Dominum, Qui quoad Humanum Suum est Ipse et Solus Unctus Jehovae, unctus non oleo sed ipso Divino Bono Divini Amoris quare etiam nominatus est "Messias" in Veteri Testamento et "Christus" in Novo, (Johannes 1:41; 8 4:25), ac "Messias" et "Christus" significant Unctum. Inde est, quod Sacerdotes, Reges, et omnia Ecclesiae uncta fuerint, et cum uncta dicta sint sancta; non quod sancta in se essent, sed quia per id repraesentabant Dominum quoad Divinum Humanum. Inde fuit sacrosanctum laedere Regem, quia "Unctus Jehovae"

(1 Samuelis 24:7, 11 (B.A. 6, 10); 1 Samuelis 26:9; 2 Samuelis 1:16; 19:22 (B.A. 21)).

Praeterea in usu receptum fuit semet et alios ungere ad testificandum animi laetitiam et benevolentiam, sed oleo communi aut alio nobili, at non oleo sanctitatis, (Matthaeus 6:17; Marcus 6:13; Luca 7:46; Esaias 61:3; Amos 6:6; Micham 6:15; Psalm. 92:11 (B.A. 10); Psalm. 104:15; Daniel 10:3; 9 Deuteronomius 28:40);

Quod non licuerit se aut alios ungere oleo sanctitatis, (Exodus 30:32-33).

Poznámky pod čarou:

1. 12 pro "13"

2. 16:3, 6, 12, 13 pro "16:6; 18:3, 12"

3. 23 pro "25"

4. 17 pro "13"

5. xi. pro "xii."

6. 8 pro "1"

7. 21, 39, 52 pro "24, 38, 51"

8. 41 pro "42"

9. 3 pro "37"

  
/ 962