Bible

 

Leviticus 8

Studie

   

1 Locutusque est Dominus ad Moysen, dicens :

2 Tolle Aaron cum filiis suis, vestes eorum, et unctionis oleum, vitulum pro peccato, duos arietes, canistrum cum azymis :

3 et congregabis omnem cœtum ad ostium tabernaculi.

4 Fecit Moyses ut Dominus imperaverat. Congregataque omni turba ante fores tabernaculi,

5 ait : Iste est sermo, quem jussit Dominus fieri.

6 Statimque obtulit Aaron et filios ejus. Cumque lavisset eos,

7 vestivit pontificem subucula linea, accingens eum balteo, et induens eum tunica hyacinthina, et desuper humerale imposuit,

8 quod astringens cingulo aptavit rationali, in quo erat Doctrina et Veritas.

9 Cidari quoque texit caput : et super eam, contra frontem, posuit laminam auream consecratam in sanctificatione, sicut præceperat ei Dominus.

10 Tulit et unctionis oleum, quo linivit tabernaculum cum omni supellectili sua.

11 Cumque sanctificans aspersisset altare septem vicibus, unxit illud, et omnia vasa ejus, labrumque cum basi sua sanctificavit oleo.

12 Quod fundens super caput Aaron, unxit eum, et consecravit :

13 filios quoque ejus oblatos vestivit tunicis lineis, et cinxit balteis, imposuitque mitras, ut jusserat Dominus.

14 Obtulit et vitulum pro peccato : cumque super caput ejus posuisset Aaron et filii ejus manus suas,

15 immolavit eum, hauriens sanguinem, et tincto digito, tetigit cornua altaris per gyrum : quo expiato et sanctificato, fudit reliquum sanguinem ad fundamenta ejus.

16 Adipem vero qui erat super vitalia, et reticulum jecoris, duosque renunculos, cum arvinulis suis, adolevit super altare :

17 vitulum cum pelle, et carnibus, et fimo, cremans extra castra, sicut præceperat Dominus.

18 Obtulit et arietem in holocaustum : super cujus caput cum imposuissent Aaron et filii ejus manus suas,

19 immolavit eum, et fudit sanguinem ejus per circuitum altaris.

20 Ipsumque arietem in frusta concidens, caput ejus, et artus, et adipem adolevit igni,

21 lotis prius intestinis et pedibus : totumque simul arietem incendit super altare, eo quod esset holocaustum suavissimi odoris Domino, sicut præceperat ei.

22 Obtulit et arietem secundum in consecratione sacerdotum, posueruntque super caput ejus Aaron et filii ejus manus suas :

23 quem cum immolasset Moyses, sumens de sanguine ejus, tetigit extremum auriculæ dextræ Aaron, et pollicem manus ejus dextræ, similiter et pedis.

24 Obtulit et filios Aaron : cumque de sanguine arietis immolati tetigisset extremum auriculæ singulorum dextræ, et pollices manus ac pedis dextri, reliquum fudit super altare per circuitum :

25 adipem vero, et caudam, omnemque pinguedinem quæ operit intestina, reticulumque jecoris, et duos renes cum adipibus suis et armo dextro separavit.

26 Tollens autem de canistro azymorum, quod erat coram Domino, panem absque fermento, et collyridam conspersam oleo, laganumque, posuit super adipes, et armum dextrum,

27 tradens simul omnia Aaron et filiis ejus. Qui postquam levaverunt ea coram Domino,

28 rursum suscepta de manibus eorum, adolevit super altare holocausti, eo quod consecrationis esset oblatio, in odorem suavitatis, sacrificii Domino.

29 Tulitque pectusculum, elevans illud coram Domino, de ariete consecrationis in partem suam, sicut præceperat ei Dominus.

30 Assumensque unguentum, et sanguinem qui erat in altari, aspersit super Aaron et vestimenta ejus, et super filios illius ac vestes eorum.

31 Cumque sanctificasset eos in vestitu suo, præcepit eis, dicens : Coquite carnes ante fores tabernaculi, et ibi comedite eas ; panes quoque consecrationis edite, qui positi sunt in canistro, sicut præcepit mihi Dominus, dicens : Aaron et filii ejus comedent eos :

32 quidquid autem reliquum fuerit de carne et panibus, ignis absumet.

33 De ostio quoque tabernaculi non exibitis septem diebus, usque ad diem quo complebitur tempus consecrationis vestræ ; septem enim diebus finitur consecratio :

34 sicut et impræsentiarum factum est, ut ritus sacrificii compleretur.

35 Die ac nocte manebitis in tabernaculo observantes custodias Domini, ne moriamini : sic enim mihi præceptum est.

36 Feceruntque Aaron et filii ejus cuncta quæ locutus est Dominus per manum Moysi.

   

Ze Swedenborgových děl

 

Apocalypsis Revelata # 10

Prostudujte si tuto pasáž

  
/ 962  
  

10. (Vers. 4.) "Johannes septem Ecclesiis," significat ad omnes qui in Christiano Orbe sunt, ubi Verbum, et per id Dominus notus est, et accedunt ad Ecclesiam. - Per "septem Ecclesias" non intelliguntur Septem Ecclesiae, sed omnes qui ab Ecclesia in Christiano Orbe sunt; nam numeri in Verbo significant res, ac "septem" omnia et omnes, et inde etiam plenum et perfectum, et dicuntur in Verbo ubi agitur de re sancta, et in opposito sensu de re prophana; quare ille numerus involvit Sanctum, et in opposito Sensu prophanum. Quod numeri significent res, vel potius quod sint sicut quaedam adjectiva ad substantiva afferentes aliquod quale rebus, est quia numerus in se est naturalis, naturalia enim determinantur per numeros, spiritualia autem per res et earum status; quare qui non scit significationem numerorum in Verbo, et imprimis in Apocalypsi, non scire potest multa arcana, quae inibi continentur. Nunc quia per "Septem" significantur omnia et omnes, patet quod per "septem Ecclesias" intelligantur omnes qui in Christiano Orbe sunt, ubi Verbum est, et per id Dominus notus est; hi, si vivunt secundum praecepta Domini in Verbo, faciunt ipsam Ecclesiam.

[2] Inde est quod Sabbathum Die Septimo institutum sit, et quod Septimus Annus dictus fuerit Annus Sabbatharius, et quod Septies Septimus Annus Jubilaeum; per quae significabatur omne Sanctum in Ecclesia: inde etiam est, quod Septimana, apud Danielem et alibi, significet integram periodum a principio ad finem, et praedicetur de Ecclesia. Similia per Septem significantur in sequentibus; ut,

Per "Septem Candelabra aurea, in quorum medio Filius Hominis," (Apocalypsis 1:13);

Per "Septem Stellas in dextra Ipsius," (Apocalypsis 1:16, 20);

Per "Septem Spiritus Dei," (Apocalypsis 1:4; 4:5);

Per "Septem Lampades ignis," (Apocalypsis 4:5);

Per "Septem Angelos," quibus datae sunt "Septem Tubae," (Apocalypsis 8:2);

Per "Septem Angelos habentes Septem Plagas ultimas," (Apocalypsis 15:5-6)

Per "Septem Phialas plenas Septem Plagis ultimis," (Apocalypsis 16:1; 21:9);

Per "Septem Sigilla" quibus Liber obsignatus est, (Apocalypsis 5:1);

similiter in sequentibus his:

Quod Septem diebus implerentur manus, (Exodus 29:35);

Quod Septem diebus sanctificarentur, (Exodus 29:37);

Quod cum inaugurabantur Septem diebus incederent induti vestibus sanctitatis, (Exodus 29:30);

Quod Septem diebus non recederent a Tentorio, cum initiabantur in sacerdotium, (Leviticus 8:33, 35; 1

Quod Altare Septies expiaretur super cornua, (Leviticus 16:18-19);

Quod Altare per oleum Septem vicibus sanctificaretur, (Leviticus 8:11);

Quod sanguis Septem vicibus spargeretur versus velum, (Leviticus 4:16-17);

Et quoque Septem vicibus versus orientem, (Leviticus 16:12-15);

Quod qua separationis Septem vicibus spargeretur versus tentorium, (Numeri 19:4);

Quod Pascha Septem diebus celebraretur; et Septem diebus comederetur azyma, (Exodus 12:1, seq. (vers. 15); Deuteronomius 16:4-7);

pariter,

Quod Judaei punirentur septuplum propter peccata eorum, (Leviticus 26:18, 21, 24, 28); 2

quare David dicit,

"Retribue vicinis septuplum in sinum eorum," (Psalm. 79:12); 3

"septuplum" est plene.

[3] Tum in his locis:

"Sermones Jehovae sermones puri, argentum in camino purificatum Septies," (Psalm. 12:7 (B.A. 6));

"Famelici cessarunt, usque dum sterilis peperit Septem, multiprolis autem defecit," (1 Samuelis 2:5);

"sterilis" est Ecclesia ex gentibus, quibus non fuit Verbum; "multiprolis" est Ecclesia ex Judaeis, quibus fuit Verbum.

"Elanguescet quae pepererat Septem, exspirabit animam suam," (Jeremias 15:9); 4 similiter.

"Habitatores urbium Israelis incendent et comburent arma, et accendent illis ignem Septem annis: sepelient Gogum, et mundabunt terram Septem mensibus," (Ezechiel 39:9, (11,) 12);

"Immundus spiritus accipiet Septem spiritus alios pejores se ipso," (Matthaeus 12:45);

describitur ibi prophanatio, et per "septem Spiritus" cum quibus rediturus est, significantur omnia falsa mali, ita plenaria exstinctio boni et veri. Per "Septem capita draconis," et per "Septem diademata super capitibus," (Apocalypsis 12:3),

significatur prophanatio omnis boni et veri. Ex his patet, quod "Septem" involvant sanctum aut prophanum, ac significent omnia et plenum.

Poznámky pod čarou:

1. 35 pro "34"

2. xxvi. pro "xvi."

3. 12 pro "72"

4. 15:9 pro "11:8, 9"

  
/ 962