Bible

 

Leviticus 2

Studie

   

1 Anima cum obtulerit oblationem sacrificii Domino, simila erit ejus oblatio ; fundetque super eam oleum, et ponet thus,

2 ac deferet ad filios Aaron sacerdotes : quorum unus tollet pugillum plenum similæ et olei, ac totum thus, et ponet memoriale super altare in odorem suavissimum Domino.

3 Quod autem reliquum fuerit de sacrificio, erit Aaron et filiorum ejus, Sanctum sanctorum de oblationibus Domini.

4 Cum autem obtuleris sacrificium coctum in clibano : de simila, panes scilicet absque fermento, conspersos oleo, et lagana azyma oleo lita.

5 Si oblatio tua fuerit de sartagine, similæ conspersæ oleo et absque fermento,

6 divides eam minutatim, et fundes super eam oleum.

7 Sin autem de craticula fuerit sacrificium, æque simila oleo conspergetur :

8 quam offerens Domino, trades manibus sacerdotis.

9 Qui cum obtulerit eam, tollet memoriale de sacrificio, et adolebit super altare in odorem suavitatis Domino :

10 quidquid autem reliquum est, erit Aaron, et filiorum ejus, Sanctum sanctorum de oblationibus Domini.

11 Omnis oblatio quæ offeretur Domino, absque fermento fiet, nec quidquam fermenti ac mellis adolebitur in sacrificio Domino.

12 Primitias tantum eorum offeretis ac munera : super altare vero non imponentur in odorem suavitatis.

13 Quidquid obtuleris sacrificii, sale condies, nec auferes sal fœderis Dei tui de sacrificio tuo : in omni oblatione tua offeres sal.

14 Si autem obtuleris munus primarum frugum tuarum Domino de spicis adhuc virentibus, torrebis igni, et confringes in morem farris, et sic offeres primitias tuas Domino,

15 fundens supra oleum, et thus imponens, quia oblatio Domini est :

16 de qua adolebit sacerdos in memoriam muneris partem farris fracti, et olei, ac totum thus.

   

Ze Swedenborgových děl

 

Vera Christiana Religio # 707

Prostudujte si tuto pasáž

  
/ 853  
  

707. Quod per PANEM simile intelligatur quod per Carnem, constat clare ex Domini verbis, "Jesus accipiens PANEM, fregit et dedit, dicens, hic est Corpus meum, Matthaeus 26:[26,] Marcus 14:[22,] Luca 22[: 19], tum, PANIS, quem Ego dabo, Caro mea est, quam Ego dabo pro Mundi vita, Johannes 6:51, et quoque dicit, quod Ipse sit PANIS VITAE, qui manducat ex hoc PANE, VIVET IN AETERNUM," Johannes 6:48, 51, 58. Hic Panis etiam est, qui intelligitur per Sacrificia, quae vocantur Panis in sequentibus locis; Illa adolebit Sacerdos super Altari, PANIS IGNITI JEHOVAE, Leviticus 3:11, 16. Filii Aharonis sancti erunt Deo suo, neque prophanabunt Nomen Dei sui, quia IGNITA JEHOVAE, PANEM DEI SUI illi offerentes. 1 Sanctificabis illum, quia PANEM DEI TUI ille offerens. Vir de Semine Aharonis, in quo fuerit macula, non accedet ad offerendum PANEM DEI SUI, Leviticus 21:6, 8, 17, 21. Praecipe filiis Israelis, et dicas ad eos, Oblationem meam, PANEM MEUM, IN IGNITA ODORIS QUIETIS, observabitis, ut offeratis Mihi in stato tempore, Numeri 28:2. Qui tetigerit immundum, non comedet de sanctificatis, sed lavabit carnem suam in aqua, et postea comedet de sanctificatis, QUIA PANIS EJUS HOC, Leviticus 22:6-7; comedere ex sanctificatis erat Carnem ex sacrificiis, quae hic quoque vocatur Panis; praeter apud Malachiam 1:7.

[2] Per MINCHAS in sacrificiis, quae erant ex simila tritici, ita Panis, nec aliud significabatur, Leviticus 2:1-11; 6:7-14; 2 7:9-13, et alibi. Nec aliud per PANES super Mensa in Tabernaculo, qui vocabantur Panes facierum ac propositionis, de quibus Exodus 25:30; 40:23; Leviticus 24:5-9. 3 Quod non panis naturalis per Panem intelligatur, sed Panis coelestis, patet ex his, "Non per Panem solum vivit homo, sed per omne quod exit ex ore Jehovae vivit homo, Deuteronomius 8:3. 4 Immittam 5 famem in terram, non famem ad panem, neque sitim ad aquas, 6 sed ad audiendum verba Jehovae," Amos 8:11. Praeterea per Panem intelligitur omnis Cibus, Leviticus 24:5-9; Exodus 25:30; 40:23; Numeri 4:7; 1 Regnum 7:48. Quod etiam Cibus spiritualis, patet ab his Domini verbis, "Operamini Cibum, non qui perit, sed Cibum, qui manet in vitam aeternam, quem Filius hominis vobis dabit," Johannes 6:27.

Poznámky pod čarou:

1. Prima editio: illi offerentes (absque italicis).
2. Sic Schmidt et Biblia Hebraica, sed 6:14-21 apud Biblia Anglica. Prima editio: 6:6-14.

3. Prima editio: 10.
4. Prima editio: 18:2, 3.
5. Prima editio: Imittam.
6. Prima editio: aquos.

  
/ 853