Novokřesťanské studium Bible

Bible

 

Threni 3

Studie

   

1 ALEPH. Ego vir videns paupertatem meam in virga indignationis ejus.

2 ALEPH. Me minavit, et adduxit in tenebras, et non in lucem.

3 ALEPH. Tantum in me vertit et convertit manum suam tota die.

4 BETH. Vetustam fecit pellem meam et carnem meam ; contrivit ossa mea.

5 BETH. Ædificavit in gyro meo, et circumdedit me felle et labore.

6 BETH. In tenebrosis collocavit me, quasi mortuos sempiternos.

7 GHIMEL. Circumædificavit adversum me, ut non egrediar ; aggravavit compedem meum.

8 GHIMEL. Sed et cum clamavero, et rogavero, exclusit orationem meam.

9 GHIMEL. Conclusit vias meas lapidibus quadris ; semitas meas subvertit.

10 DALETH. Ursus insidians factus est mihi, leo in absconditis.

11 DALETH. Semitas meas subvertit, et confregit me ; posuit me desolatam.

12 DALETH. Tetendit arcum suum, et posuit me quasi signum ad sagittam.

13 HE. Misit in renibus meis filias pharetræ suæ.

14 HE. Factus sum in derisum omni populo meo, canticum eorum tota die.

15 HE. Replevit me amaritudinibus ; inebriavit me absinthio.

16 VAU. Et fregit ad numerum dentes meos ; cibavit me cinere.

17 VAU. Et repulsa est a pace anima mea ; oblitus sum bonorum.

18 VAU. Et dixi : Periit finis meus, et spes mea a Domino.

19 ZAIN. Recordare paupertatis, et transgressionis meæ, absinthii et fellis.

20 ZAIN. Memoria memor ero, et tabescet in me anima mea.

21 ZAIN. Hæc recolens in corde meo, ideo sperabo.

22 HETH. Misericordiæ Domini, quia non sumus consumpti ; quia non defecerunt miserationes ejus.

23 HETH. Novi diluculo, multa est fides tua.

24 HETH. Pars mea Dominus, dixit anima mea ; propterea exspectabo eum.

25 TETH. Bonus est Dominus sperantibus in eum, animæ quærenti illum.

26 TETH. Bonum est præstolari cum silentio salutare Dei.

27 TETH. Bonum est viro cum portaverit jugum ab adolescentia sua.

28 JOD. Sedebit solitarius, et tacebit, quia levavit super se.

29 JOD. Ponet in pulvere os suum, si forte sit spes.

30 JOD. Dabit percutienti se maxillam : saturabitur opprobriis.

31 CAPH. Quia non repellet in sempiternum Dominus.

32 CAPH. Quia si abjecit, et miserebitur, secundum multitudinem misericordiarum suarum.

33 CAPH. Non enim humiliavit ex corde suo et abjecit filios hominum.

34 LAMED. Ut conteret sub pedibus suis omnes vinctos terræ.

35 LAMED. Ut declinaret judicium viri in conspectu vultus Altissimi.

36 LAMED. Ut perverteret hominem in judicio suo ; Dominus ignoravit.

37 MEM. Quis est iste qui dixit ut fieret, Domino non jubente ?

38 MEM. Ex ore Altissimi non egredientur nec mala nec bona ?

39 MEM. Quid murmuravit homo vivens, vir pro peccatis suis ?

40 NUN. Scrutemur vias nostras, et quæramus, et revertamur ad Dominum.

41 NUN. Levemus corda nostra cum manibus ad Dominum in cælos.

42 NUN. Nos inique egimus, et ad iracundiam provocavimus ; idcirco tu inexorabilis es.

43 SAMECH. Operuisti in furore, et percussisti nos ; occidisti, nec pepercisti.

44 SAMECH. Opposuisti nubem tibi, ne transeat oratio.

45 SAMECH. Eradicationem et abjectionem posuisti me in medio populorum.

46 PHE. Aperuerunt super nos os suum omnes inimici.

47 PHE. Formido et laqueus facta est nobis vaticinatio, et contritio.

48 PHE. Divisiones aquarum deduxit oculus meus, in contritione filiæ populi mei.

49 AIN. Oculus meus afflictus est, nec tacuit, eo quod non esset requies.

50 AIN. Donec respiceret et videret Dominus de cælis.

51 AIN. Oculus meus deprædatus est animam meam in cunctis filiabus urbis meæ.

52 SADE. Venatione ceperunt me quasi avem inimici mei gratis.

53 SADE. Lapsa est in lacum vita mea, et posuerunt lapidem super me.

54 SADE. Inundaverunt aquæ super caput meum ; dixi : Perii.

55 COPH. Invocavi nomen tuum, Domine, de lacu novissimo.

56 COPH. Vocem meam audisti ; ne avertas aurem tuam a singultu meo et clamoribus.

57 COPH. Appropinquasti in die quando invocavi te ; dixisti : Ne timeas.

58 RES. Judicasti, Domine, causam animæ meæ, redemptor vitæ meæ.

59 RES. Vidisti, Domine, iniquitatem illorum adversum me : judica judicium meum.

60 RES. Vidisti omnem furorem, universas cogitationes eorum adversum me.

61 SIN. Audisti opprobrium eorum, Domine, omnes cogitationes eorum adversum me.

62 SIN. Labia insurgentium mihi, et meditationes eorum adversum me tota die.

63 SIN. Sessionem eorum et resurrectionem eorum vide ; ego sum psalmus eorum.

64 THAU. Redes eis vicem, Domine, juxta opera manuum suarum.

65 THAU. Dabis eis scutum cordis, laborem tuum.

66 THAU. Persequeris in furore, et conteres eos sub cælis, Domine.

   

Ze Swedenborgových děl

 

Arcana Coelestia # 9163

Prostudujte si tuto pasáž

  
/ 10837  
  

9163. ‘Et moriatur aut frangatur’: quod sit jactura vel damnum, constat ex significatione ‘mori’ quod sit exstinctio ac jactura, et ex significatione ‘frangi’ quod sit damnum; ‘fractura’ et ‘frangi’ in Verbo significat dissipationem et quoque damnum; hoc trahit originem ex spirituali mundo, ubi omnia et singula conjuncta sunt secundum receptionem veri Divini a Domino, ita secundum receptionem ordinis qui omnibus et singulis inducitur per verum Divinum quod procedit a Domino, n. 8700, 8988; inde est quod vera apud hominem nexum inter se habeant secundum receptionem illorum in bono; vera quae ita connexa sunt unum faciunt; quapropter cum illa franguntur in communi, dissipantur vera cum bono, et cum franguntur in particulari, dissipantur vera quae ibi; nam cum in nexu sunt, subsistit unum ab altero, at cum franguntur, recedit unum ab altero;

[2] inde est quod per ‘frangi’ in Verbo significetur dissipatio, sicut etiam per dividi, 1 n. 9093, et quoque damnum; dissipatio nempe cum totum frangitur, et damnum cum pars, ut patet ab his locis in Verbo:

apud Esaiam,

Impingent inter illos multi, et cadent, et frangentur, 8:1 5, 2 28:13;

‘impingere’ pro scandalizari, et inde ex veris in falsa labi, ‘cadere et frangi’ pro dissipari 3 , hic in communi:

apud Ezechielem,

Ecce Ego contra Pharaonem regem Aegypti, frangam brachia ejus, validum et fractum, 30:22;

‘Pharao rex Aegypti’ pro scientificis quae pervertunt et destruunt vera et bona fidei, n. 6651, 6679, 6683, 6692, ‘frangere brachia’ pro dissipare vires eorum, ita illa, n. 4932, validum et fractum pro illa quae non damnum passa ac resistunt, et illa quae 4 damnum passa et non resistunt:

[3] apud Lucam, Scriptum est, Lapis quem rejecerunt architecti 5 factus est in caput anguli; quicumque ceciderit super illum lapidem, frangetur, et super quem ceciderit, [eum] comminuet, 20:17, 18;

‘lapis’ pro Domino quoad Divinum Verum, n. 6426, ‘frangi’, quia de veris quae ab Ipso, pro dissipari, ita destrui, et cum veris, illa quae vitae spiritualis sunt, quod fit apud illos qui 6 negant Dominum et reprobant vera quae ab Ipso, qui sunt 7 qui rejiciunt lapidem: apud Jeremiam,

Adduc super eos diem mali, geminata fractione frange, 17:18;

‘geminata fractione frangere’ pro prorsus destruere:

apud Esaiam,

Disposui me usque ad matutam; sicut leo, ita frangit omnia ossa mea; a die usque ad noctem consummabis me, 38:13:

apud Jeremiam,

Inveteravit carnem meam et cutem meam, et fregit ossa mea, Threni 3:4 8 :

apud Moschen,

Non efferes e domo de carne agni paschalis, neque os frangetis in eo, Exod. 12:46;

[4] ‘frangere ossa’ est destruere vera a Divino quae sunt ultima in ordine 9 , quibus innituntur et a quibus suffulciuntur vera et bona interiora, quae si destruuntur, etiam cadunt illa quae superinstructa sunt; vera ultima in ordine 10 sunt vera sensus litterae Verbi, in quibus 11 sunt vera sensus interni, et quibus haec innituntur sicut columnae suis stylobatis; quod ‘ossa’ sint vera, videatur n. 3812, 6592, 8005; ex his patet quid repraesentatum et significatum est per illa de Domino apud Johannem,

Venerunt ad Jesum; cum viderent Illum mortuum, non fregerunt 12 Illius crura: quod factum est ut Scriptura impleretur, Os non frangetis Illius, 19:[33, ] 36; causa erat quia Ipse erat ipsum Divinum Verum tam in primo quam in ultimo ordinis:

apud Esaiam,

Obligabit Jehovah fracturam populi Sui, et vulnus plagae ejus sanabit, 30:26:

apud Jeremiam,

13 Propheta usque ad sacerdotem quisque facit mendacium, et sanant fracturam populi Mei per nullius ponderis rem, 6:13, 14

apud eundem,

Super fracturam filiae populi Mei fractus sum, atratus sum, 8:21:

[5] apud Davidem,

Tremefecisti terram, confregisti; sana fracturas ejus, Ps. 60:4 [KJV Ps. 60:2]:

apud Sachariam, Ego excitabo pastorem in terra; 14 fractam non sanabit, stantem non sustentabit, 11:16:

apud Nahum, Non cicatrix fracturae tuae, 15 desperata plaga tua, 3:19;

in his locis ‘fractura’ significat damnum veris et bonis fidei, ita Ecclesiae, illatum; ‘sanare’ est emendare et restituere. Simile significatum est per quod vir cui fractura pedis, aut fractura manus, non accederet ad offerendum panem Dei, Lev. 21:17, 19, et per quod fractum non 16 offerretur Jehovae super altari, Lev. 22:22, ‘fractum’ enim significabat destructum 17 . Damnum 18 etiam significatur per ‘rupturam’, ut apud Esaiam,

Rupturas domus 19 Davidis vidistis, quod plurimae sint, 22:9:

et apud Amos, In die illo erigam tentorium Davidis collapsum et obsaepiam rapturas ejus; destructa ejus restituam et aedificabo ea juxta dies aeternitatis, 20 9:11;

‘domus Davidis’ et ‘tentorium Davidis’ pro Ecclesia Domini, ‘David’ enim in Verbo prophetico est Dominus, n. 1888 21 .

Poznámky pod čarou:

1. The Manuscript inserts de quo.

2. The editors of the third Latin edition made a minor correction here. For details, see the end of the appropriate volume of that edition.

3. destrui

4. The editors of the third Latin edition made a minor correction here. For details, see the end of the appropriate volume of that edition.

5. aedificantes

6. The editors of the third Latin edition made a minor correction here. For details, see the end of the appropriate volume of that edition.

7. quae significantur per illos

8. The editors of the third Latin edition made a minor correction here. For details, see the end of the appropriate volume of that edition.

9. in ultimo ordinis

10. in ultimo ordinis altered to ultima in ordine

11. The Manuscript inserts sicut.

12. confregerunt

13. Inserted in the Manuscript.

14. The editors of the third Latin edition made a minor correction here. For details, see the end of the appropriate volume of that edition.

15. The editors of the third Latin edition made a minor correction here. For details, see the end of the appropriate volume of that edition.

16. The editors of the third Latin edition made a minor correction here. For details, see the end of the appropriate volume of that edition.

17. falsum (in the margin) quod succedit loco veri, cum frangitur

18. The Manuscript inserts bonis et veris illatum.

19. Hebrew [ ] (ir) = a city

20. The editors of the third Latin edition made a minor correction here. For details, see the end of the appropriate volume of that edition.

21. quod per Davidem intelligatur Dominus, videatur Arcana Coelestia 1888, rupturae pro damnis similiter etiam alibi

  
/ 10837  
  

This is the Third Latin Edition, published by the Swedenborg Society, in London, between 1949 and 1973.

©2024 New Christian Bible Study Corporation. All rights reserved. Printed from newchristianbiblestudy.org