Bible

 

Hoschea 4

Studie

   

1 Audite verbum Domini, filii Israël, quia judicium Domino cum habitatoribus terræ : non est enim veritas, et non est misericordia, et non est scientia Dei in terra.

2 Maledictum, et mendacium, et homicidium, et furtum, et adulterium inundaverunt, et sanguis sanguinem tetigit.

3 Propter hoc lugebit terra, et infirmabitur omnis qui habitat in ea, in bestia agri, et in volucre cæli ; sed et pisces maris congregabuntur.

4 Verumtamen unusquisque non judicet, et non arguatur vir : populus enim tuus sicut hi qui contradicunt sacerdoti.

5 Et corrues hodie, et corruet etiam propheta tecum. Nocte tacere feci matrem tuam.

6 Conticuit populus meus, eo quod non habuerit scientiam : quia tu scientiam repulisti, repellam te, ne sacerdotio fungaris mihi ; et oblita es legis Dei tui, obliviscar filiorum tuorum et ego.

7 Secundum multitudinem eorum sic peccaverunt mihi : gloriam eorum in ignominiam commutabo.

8 Peccata populi mei comedent, et ad iniquitatem eorum sublevabunt animas eorum.

9 Et erit sicut populus, sic sacerdos ; et visitabo super eum vias ejus, et cogitationes ejus reddam ei.

10 Et comedent, et non saturabuntur ; fornicati sunt, et non cessaverunt : quoniam Dominum dereliquerunt in non custodiendo.

11 Fornicatio, et vinum, et ebrietas auferunt cor.

12 Populus meus in ligno suo interrogavit, et baculus ejus annuntiavit ei ; spiritus enim fornicationum decepit eos, et fornicati sunt a Deo suo.

13 Super capita montium sacrificabant, et super colles ascendebant thymiama ; subtus quercum, et populum, et terebinthum, quia bona erat umbra ejus ; ideo fornicabuntur filiæ vestræ, et sponsæ vestræ adulteræ erunt.

14 Non visitabo super filias vestras cum fuerint fornicatæ, et super sponsas vestras cum adulteraverint, quoniam ipsi cum meretricibus conversabantur, et cum effeminatis sacrificabant ; et populus non intelligens vapulabit.

15 Si fornicaris tu, Israël, non delinquat saltem Juda ; et nolite ingredi in Galgala, et ne ascenderitis in Bethaven, neque juraveritis : Vivit Dominus !

16 Quoniam sicut vacca lasciviens declinavit Israël ; nunc pascet eos Dominus, quasi agnum in latitudine.

17 Particeps idolorum Ephraim : dimitte eum.

18 Separatum est convivium eorum ; fornicatione fornicati sunt : dilexerunt afferre ignominiam protectores ejus.

19 Ligavit eum spiritus in alis suis, et confundentur a sacrificiis suis.

   

Ze Swedenborgových děl

 

Vera Christiana Religio # 314

Prostudujte si tuto pasáž

  
/ 853  
  

314. In SENSU SPIRITUALI per Moechari, intelligitur adulterare bona Verbi, et falsificare vera ejus: quod haec etiam per Moechari intelligantur, hactenus ignotum fuit, quia Sensus spiritualis Verbi hactenus latuit; quod non aliud per Moechari, adulterari, et scortari in Verbo significetur, constat manifeste ex his locis, Discurrite per plateas Hierosolymae, et quaerite, si inveniatis virum, qui FACIT JUDICIUM, ET QUAERIT VERITATEM, cum saturavi eos, SCORTATI SUNT, Jeremias 5:1, 7. In Prophetis Hierosolymae vidi obfirmationem horrendam, ADULTERANDO ET EUNDO IN MENDACIO, Jeremias 23:14. Fecerunt stultitiam in Israele, SCORTATI SUNT, ET LOQUUTI SUNT VERBUM MEUM MENDACITER, Jeremias 29:23. SCORTABANTUR, quia Jehovam dereliquerunt, Hoschea 4:10. 1 Exscindam animam, quae respicit ad pythones et hariolos AD SCORTANDUM POST ILLOS, Leviticus 20:6. 2 Non pangendum est foedus cum habitatoribus terrae, ne SCORTENTUR POST DEOS illorum, Exodus 34:15. 3 Quoniam Babylon prae caeteris adulterat et falsificat Verbum, ideo illa vocatur MAGNA MERETRIX, et haec de illa dicuntur in Apocalypsi, Babylon a vino irae Scortationis suae potavit omnes Gentes, 14:8. Angelus dixit, monstrabo tibi judicium Meretricis magnae, cum qua scortati sunt Reges terrae, 17:1-2. Judicavit Meretricem magnam, quae corrupit terram scortatione sua, 19:2. Quoniam Gens Judaica falsificaverat Verbum, ideo illa a Domino vocata est GENERATIO ADULTERA, Matthaeus 12:39; 16:4, Marcus 8:38. Et SEMEN ADULTERI, Esaias 57:3. 4 Praeter multis aliis in locis, ubi per adulteria et scortationes intelliguntur adulterationes et falsificationes Verbi, ut Jeremias 3:6, 8; 13:27, Ezechiel 16:15-16, 26, 28-29, 32-33; 23:2-3, 5, 7, 11, 14, 17, 5 Hoschea 5:3; 6:10; Nahum 3:4. 6

Poznámky pod čarou:

1. Prima editio: 7.
2. Prima editio: 5.
3. Prima editio: 3.
4. Prima editio: 56.
5. Prima editio: 2, 3, 5, 7, 11, 14, 16, 17.
6. Prima editio: Nahum 3:1, 3, 4.

  
/ 853