8870. ‘Et ullam similitudinem’ significat instar illorum quae a Divino; constat ex significatione ‘similitudinis’ quod sit instar; quod sit instar illorum quae a Divino, patet ab illis quae praecedunt et ab illis quae sequuntur; ab illis quae praecedunt, quod non erunt dii alii coram faciebus Jehovae ¹ Dei, et quod ‘non facient sibi sculptile’, per quae significantur vera ² aliunde quam ex Divino, et tamen quae illis similia sistuntur; et ex illis quae sequuntur, ut ‘quae in caelis, ³ et quae in terra, et quae in aquis’, per quae intelliguntur ⁴ talia quae a Divino ubivis.

[2] Quid per instar illorum quae a Divino intelligitur, hic dicendum, quia de illis in sequentibus hujus versus ac in initio sequentis agitur; instar illorum quae a Divino fiunt ab hominibus cum ore loquuntur Divina, et quoque opere faciunt qualia a Divino mandata sunt, et sic inducunt credere quod in bono et vero sint, cum tamen prorsus aliud corde cogitant, nec nisi quam malum volunt; tales sunt simulatores, hypocritae, dolosi; hi sunt qui faciunt instar illorum quae a Divino; in altera vita faciunt mali spiritus ⁵ instar illorum ⁶ quae a Divino, qui sistunt similitudinem et apparentiam ⁷ in externis, in quibus intus nihil Divini est; hoc discunt simulatores, hypocritae, et dolosi in altera vita, in genere omnes qui ex frequenti usu habitum traxerunt aliud loquendi quam cogitant, et aliud faciendi quam volunt ⁸ ; ⁹ quidam per talia volunt aucupare famam ut videantur boni, et sic fallant, quidam ut imperent;

[3] sunt etiam talia ibi abusus correspondentiarum; sed ¹⁰ illis successive adimuntur externa per quae simulaverunt talia quae charitatis et fidei sunt, [et tunc patent interna, quae scelestia et horrenda sunt, ] nam sic agunt ex ipsa sua natura in mundo acquisita, non magis ¹¹ ex aliqua simulatione et hypocrisi ¹² ; illi ¹³ qui tales sunt, et appercipiunt quod externa illis adimenda sint, dicunt ¹⁴ quod si illis relinquerentur externa, potuissent aeque cum sociis in altera vita conversari et apparenter bona facere, sicut prius in mundo; sed hoc fieri non potest, quia per externa, quae ¹⁵ apparenter bona sunt, communicarent aliquo modo cum caelo, nempe cum illis qui in circuitibus ibi sunt ac simplices sunt, qui correspondent cuticulis in Maximo Homine; at per interna communicarent cum infernis; et quia mala quae intus sunt ¹⁶ dominantur, quoniam ea sunt voluntatis, et bona quae in externis simulantur serviunt ad acquirendum dominium ¹⁷ malis, idcirco est ¹⁸ contra ipsum ordinem Divinum relinquere illis licentiam ¹⁹ simulate et hypocritice agendi, sicut in mundo, quapropter talia illis auferuntur, ac ii in ipsum malum voluntatis suae remittuntur.

Poznámky pod čarou: