Ruthi 4

¹ Bôaza cha kuh chhikao lâna chata khy ta, cha liana chata a tyuh ta; ama heinawh hniapa kyh Bôaza ta a reipa kha a vy ta. Cha chyhsa hnohna chata, “Nâ kha a vy la; a vaw tyuh tua,” tah ta. Ano cha vawh ta, a tyuh ta.

² Cha khih liata machâ sahlao hry liatahpa pahrawh a chhi ta, ama hnohta, “He liata a tyuh teh u,” tah ta; chatanachata a tyuh haw ei ta.

³ Ama heinawh a hniapa hnohna chata, “Môaba râh tawhta a vaw kuapa Naomi chata eima unawhpa Elimeleka râh kha zuah ta.

⁴ Cha thâtih cha ei cha chho khoh, na khohpa khiahla he a tyuhpa zy mohmô liata nata eima machâ zy mohmô liana heta chalei teh; anodeikuacha na chatlai khoh vei khiahtala ei pahno thei nawpa ta na chho mah y, nâma leipa ta cha ahyhmah a chatlaituh awpa hropa y tlôh lei khâh ei ta, chatawhcha kei he, cha pazipa châ na ta,” tahpa ta pahnosa ta. Cha chyhsa chata, “Ei chatlai aw na,” tah ta.

⁵ Bôaza chata, “Naomi hnoh tahpa cha râh na chalei noh liana chata a thipa lahpinô, Môaba chanô Ruthi liata a thipa moh dia leipa ta a ryu a totuh awpa ama y lymâ thei nawpa ta na chalei hra awpa a châ,” tah ta.

⁶ Ama heinawh a hniapa chata, “Keima chata chatlai thei va na, cha leipa ta la keima ryuto kyh liata ei parao pathlei aw na. A chatlai thei awpa ei châna tovyuh cha nâma ta to teh, kei la chatlai thei va na,” tah ta.

⁷ Hlâno ta Izarel zy hry liata hmo ato ama pa-i nawpa ta ama chatlaina zie nata amâ riena zie cha he hawhna he a châ; pheiky pahluh ei ta, ama vaihzy pie ei ta, cha cha Izarel zy hry liata ama pa-ina zie a châ.

⁸ Chatanachata ama heinawh a hniapa chata Bôaza hnohta, “Nâma ta na châta tlao chalei teh,” tah ta, a pheiky pahluh ta.

⁹ Bôaza chata machâ zy nata zawpi zydua hnohta, “Atanoh he nâmo sahlao heta Elimeleka hmo hneipa zydua nata Kiliôna nata Malô hmo hneipa zydua, Naomi liatahpa ei chalei tahpa a pahnotuhpa châ eichi ta.

¹⁰ Cha dei cha leipa ta a thipa cha a moh dia leipa ta ryutotuhpa taopa awpa nata a thipa cha a unawhpa zy hry liata nata a yna su kuh chhikao liata a moh a lei lei nawpa ta Môaba chanô Ruthi, Malô lahpinô cha ei lahpinô châta chalei na ta; cha cha atanoh he nâmo sahlao he a pahnotuhpa zy nama châ,” tah ta.

¹¹ Chatawhcha kuh chhikao liata zawpi zydua nata machâ zy chata, “Pahnotuhpa zy eima châ, na o liata chanô a vaw ngiapa cha, Rakheli nata Liah, Izarel chhôhkha a paduatuhpa pano hawhna khata ABEIPA ta tah mawh sy. Ephratha liana chata hlaotlohpa ta tao la, Bethlehe liana chata mohpathâhpa ta y mah y;

¹² ABEIPA ta he laihsa liana heta pathla a cha taopa awpa vâna heta na chhôhkha cha Tamari ta Zudah a sa pâpa Periza chhôhkha hawhta vaw châ mawh sy,” tah ei ta.

¹³ Chatanachata Bôaza chata Ruthi cha a chhi ta, a lahpinô vaw châ haw ta; chatawhcha hnei ta, ABEIPA chata saw paphaosa ta, sawchapawpa sa ta.

¹⁴ Chatawhcha chanô zy chata Naomi hnohta, “Atanoh tlaita heinawh a hniapa phahla leipa ta cha paysatuhpa ABEIPA cha reithaipa ta y sala; Izarel zy hry liana heta a moh vaw pathâh mawh sy!

¹⁵ Ano cha na hrona cha pathiehtuhpa nata na machâna lâta cha pasatuhpa châ aw ta; na myuhnô kyh châ pachâtuhpa, sawchapawpa pasari hlâta na châta a pha viapa chata ano cha sa haw tlôh ta,” tah ei ta.

¹⁶ Naomi chata hawsaih cha la ta, a pyh ta, hâ ta.

¹⁷ Chatawhcha a vaih chanô zy chata a moh bi pa ei ta, “Naomi chata sawchapawpa vaw pih ta,” tahpa ta! A moh Obeda bi ei ta; ano cha Davi paw, Zese paw châ ta.

¹⁸ Hezy he Periza pathlazy ama châ. Periza ta Hezraw sa ta,

¹⁹ Hezraw ta Ramah sa ta, Ramah ta Aminada sa ta,

²⁰ Aminada chata Nashona sa ta, Nashona chata Salmô sa ta,

²¹ Salmô chata Bôaza sa ta, Bôaza chata Obeda sa ta,

²² Obeda chata Zese sa ta, Zese chata Davi a sa.