Hlazy 59

Studie

         |

1 Hy ei Khazohpa, ei khakhaipazy tawhtapa na pachha la, nâ dyuhtuhpazy tawhtapa su sâhpa lâta na soh mah y.

2 hmoparaona a taotuhpazy tawhtapa na pachha la, thisaih palo a hmâhpazy tawhtapa na pachha mah y.

3 Hy ABEIPA, ei paraona vâta châ leipa ta, ei moleina vâta châ hra leipa ta, Pachâ teh, ei hrona he a byh thlâh ha tlôh ei ta; thatlôpazy cha nâ dyuh awpa ta amâ pôhpakhy.

4 ei taopasi leipa chhaota a râ ei ta, a chhuahnoh ei ta. Eina bao awpa chi ta, a hra la, moh teh!

5 Hy ABEIPA Pheisaihzy Khazohpa, Izarel Khazohpa nâma tlai cha, Pho to a hmô awpa ta thyu la; hmoparaona taopasituhpazy cha ngiachhie kha y. Selah

6 Zâ lâta a vy heih ei ta, i hawta palopasah ei ta, khihpi cha chahlô ngâ ei ta.

7 Pachâ teh, ama pakah ta pa-ua ei ta, ama hmao liana chata zaozi zy y ta. “Ahy e a pahno?” tah ei ta.

8 Châhrasala hy ABEIPA, nâ ta âmo cha tlao pahneisao aw chi ta; pho to cha na pahneisao aw.

9 Hy tha na patlôtuhpa, ei cha hâ thlâh ha aw; Khazohpa cha ei kuh sâhpa châ tlôh ta.

10 Ei chô liata zawngiahna Khazohpa chata na dy aw ta; Khazohpa ta ei khakhaipazy chô liata ei khona bie reina cha eina pahmôsa aw.

11 Âmo cha thie kha y, chata leipa ta cha ei chyhsa zy ta ama my pathlei aw na; hy ABEIPA, eima vyhphao chaipa, na hmotaotheina ta papai la, panawh mah y!

12 Ama pakah moleina vâ nata ama hmao liata bie ruapa vâta, amâ palaina tlai liana chata a ao ei se. Ama bie rei tyhpa chhiesana nata haipa bie vâta chhao,

13 âmo cha hiehâhpa ta pahleipadia la, ama y khao lei awpa ta pahleipadia la, Khazohpa ta Zakaw sahlao hry liata ryu a reih tahpa pahno chyu ei se, kaoki chhâna taihta. Selah

14 Ei khakhaipazy cha zâ lâta a vy heih ei sala, i hawta palopasah ei sala, khihpi cha chahlô ei se.

15 Âmo cha niepa tlua awpa ta a khie ngâ aw ei ta, ama rih a bie vei khiahta cha zo zâkhihdei ta ama y aw.

16 Châhrasala kei chata na thatlôna kyh he hla thata sa aw na ta; myna chata na zawngiahna kyh he thaphapa ta hla ta ei sa aw. Nâ cha ei kuh sâhpa, ei nôpona noh liata ei pabohna châ tlôh chi ta.

17 Hy tha na patlôtuhpa, nâma reithaipa ta sa aw na ta, Khazohpa cha ei kuh sâhpa, ei chô liata zawngiahna Khazohpa cha châ tlôh ta.

Scroll to see more.