1
Khazohpa cha eimâ pabohna nata eima thatlôna, nôpo nota thlai baotuhpa a hnia thlâh hapa a châ.
2
Chavâta leilô he a vaw nanopa ta, tlâhzy he tilaipi chhôh lâ syulyupa ta a pasie hra sala, chi aw ma pi;
3
a tizy cha paro ngâpa ta a chalâhparâ ngâ hra sala, a chatlaopa ta tlâh zy he a chalyu ngâ hra sala chi hlei aw ma pi. Selah
4
Chavah vah kha y ta, cha pachiahpa zy chata Khazohpa khihpi cha a palysa tyh, Chônôchaipa pahrâna su pathaihpa cha.
5
Khazohpa cha a lialiah liata y ta, pasiepa ta y aw vei; Khazohpa ta mydina chata a bao aw.
6
Phopizy ta hiehâhpa ta sa ei ta, khihnarâh zy pasiepa ta y ta; ano cha ao papua ta, leilô he vaw zao khai haw ta.
7
Pheisaih zy ABEIPA cha eima hnohta y ta; Zakaw Khazohpa cha eimâ bohna a châ. Selah
8
A vy ula, ABEIPA hmotaopa zy he moh teh u, leilô liata hmo a parao zie zy hih.
9
Ano chata adyuhna zy cha kaoki taihta chalihsa tyh ta; libaw cha thlie ta, asei cha tai pathlah tyh ta, talailizy cha mei liata a rao tyh!
10
“A chalih ula, Khazohpa ei cha tahpa pahno teh u. Phopi zy hry liata pachônôsapa ta y aw na ta, leilô liana heta pachônôsapa ta ei y aw!” tah ta.
11
Pheisaih zy ABEIPA cha eima hnohta y ta; Zakaw Khazohpa cha eimâ bohna a châ.
