1
Ei paleih heta hmo a parao lei nawpa ta, ei yzie zy he a phapa ta vaih aw na ta; hmoparaopa zy ama y chhôh liana cha, ei pakah he hmao chahryna ta ei chahry aw,” tah na ta.
2
Reih pathlie leipa ta a chalihpa ta y na ta, a phana kyh lâ chhao ei thlih thlâh haw; ei pachâ chhiena deikua tlao a pôh rili,
3
ei chhôh liata ei pathipalôh cha sapa ta. Ei pachâ ngâ nata cha mei vaw ia ta; ei paleih heta bie a reih haw.
4
“ABEIPA, ei chhâ nawpa noh nata ei hrona noh zy cha na pahnosa la; ei pachyu leizie he na pahnosa mah y!
5
Ei hro noh he pazah tie deita ta tao chi ta, na mohmô liana cha ei hrona noh he khâpa hmah châ vei. Chyhsa to he hu deita ta tlâ a duahpa a châ tlai na! Selah
6
Chyhsa to he nohpahlipa deita ta charei chyu ei ta! Tlâ amâ tymâ chakhy; ryu pachô ta, a pakhytuh awpa pahno tlôh va!
7
“Chatawhcha ABEIPA, atahmâ he khâpa e ei hâ? Nâma liata ei hnabeiseihna cha a y.
8
Ei hmoparaona zydua tawhtapa na pachha la, ahrupa mohnaopa ta na paysa kha y!
9
Nâma taopa a châpa vâta; reih pathlie leipa ta hmao mopa ta ei y.
10
Eina tuna chi he ei tawhtapa na lapa ha la; na ku pathlana vâta leidiapa ei châ hih.
11
Chyhsa a hmoparaona vâta na chhorei nota, a kho chhihna he chhôma-u hawhta parao tyh chi ta; chyhsa to he hu deita ta tlâ a duahpa a châ tlai na! Selah
12
“Hy ABEIPA, ei thlahchhâna he thei la, ei awna he nahthlie mah y; ei mothlih tlapa he a chalih thlâh ha kha y! Na khichhaipa châ na ta, na pathlatuhpazy hawhna khata apaihpa dei ei châ.
13
He tawhta puapa ta, ei y khao vei hlâna heta, alyna ei pahno thei nawpa ta na pahra heih mah y!