Hlazy 35

Studie

  

1 Hy ABEIPA, nâ eituhpazy cha ei la; nâ dyuhtuhpazy cha a dyuh mah y!

2 Vyhphao nata pakhâna patu la, na bao awpa ta thyu teh!

3 A sei chhao phia la, nâ chadaituhpa pakhâ mah y! Ei hrona hnohna cha,” Kei he na pachhana ei châ,” tah mah y.

4 Ei hrona pahlei a chhuahpa ta a tluatuhpa zy cha pamaophyupa ta nopazapa ta y ei se! Na parao awpa ta a pachâtuhpa zy cha parâpaisapa ta patypamâpa ta y ei se!

5 ABEIPA vâlyuhchâpa ta to lymâna chôta saviah thlih ta a phaohpa hawhta y ei se!

6 ABEIPA vâlyuhchâpa ta a chadai lymâpa ta, ama lâpi cha zohkaluhpa nata pahnia ngaitapa châ mawh sy!

7 A chhâpa y leipa ta ama sao cha na chôhkhâh ei ta; a chhâpa y leipa ta ei hrona he khaotlô ama chao khâh.

8 Amâ pachyh hlâta ama chôta paraona tlô mawh sy! Ama sao chôpa liana cha âmosasyh ta a ao ei se; cha liana cha tla sao ei se!

9 Chatawhcha ei thlahpa cha ABEIPA liata thapha aw ta, a pachhana liana chata aly aw.

10 Ei rupa zydua chata, “Hy ABEIPA, sipasapa a khoh thei rimâ leipa tawhtapa a pachhatuhpa, sipasapa nata dyhchhiepa a parao khohtuhpa tawhtapa a pachhatuhpa nâ hawhpa he ahy e a y?” a tah aw.

11 Pahnokheituhpa sia leipa zy thyu ei ta; hmo ei pahno beih leipa zy eina hiahri ei.

12 Hmo phapa vyuhpa ta moleina ta viari na thô ei ta; ei hrona pahleina taih tlaita.

13 Keima deikua chata ama tlâh lei nona cha latho poh a bu na ta. nie leipa ta keimasasyh ta rie ei pathei. Ei thlahchhâna cha keima lâ tlaita vaw kua heih ta,

14 ei viasa tlyma, unawhpa tlyma rai châ sala ama chô liata ei yzie awpa hawhta na ei y; chyhsa a no a chakheituhpa hawhta mâchhiesapa ta a bôh na ta.

15 Ei chapia nona chata thaphapa ta apakhy ei ta, keima nâ dyuh awpa ei ta, a pahmaohpakhy ei ta; cha cha pahno leipa na ta, bâh leipa ta na taochhie ei ta;

16 thata pahneiparâsaopa ta na taola ei ta, ama hâhzy cha eina charieh chie ei.

17 Hy ABEIPA, nâ ta khachâ e na moh aw ei? Ei hrona he parao amâ chhuahna tawhta na pachha la. ei hrona he chakeibarôhneipa zy tawhta na pachha mah y!

18 Apakhyna rôhnahpa liana chata alyna bie ei cha hlâ aw; chyhsa hluhpi hryta ei cha reithai aw.

19 Ei khakhaipa ei chôta moleina kyh ta a taotuhpa zy cha ei chôta ama thaphapa pasaih leipa la, hrao leipa ta nâ haotuhpa zy cha ama mo ta ama chho awpa pasaih kha y.

20 Adyhna bie rai reih tlôh leipa ei ta, he râh liata a y molo thlâh hapa zy dôveina bie tlao ama pachâ tyh.

21 Ama pakah ta thata na reipachhie ei ta;” Khaw, khaw, eima mo ta a hmô haw,” ama tah tyh.

22 Hy ABEIPA, na hmô haw; a chalihsa kha y! Hy ABEIPA, rie nâ hla kha y!

23 Ei Khazohpa nata ei Beipa, na pachia awpa ta, ei bie na châkhei awpa ta thyu la, a hra teh!

24 Hy ABEIPA, ei Khazohpa, na siana kyh hawhta na pachia la; ei chô liana chata aly kha ei se!

25 Âmo chata, “Khaw, cha hawhpa cha na eima khoh!” tah kha ei se. Âmo chata, “Eima palâ khai haw,” tah hra kha ei se.

26 Ei vâchhiena kyh liata alypa zydua cha maophyuhpa ta nata nôpopa ta y ei se! Ei chô liata apalaipa zy cha maophyuna nata nozana pabusapa ta y ei se!

27 Ei siana kyh liata aly khohpa zy cha thapha nata alypa ta awh ei se,” A chakaotuhpa vâhneina liata aly tyhpa, ABEIPA Rôhnahpa cha reithai viata y mawh sy,” tah ei se.

28 Chatawhcha ei paleih heta na siana bie reih aw ta, na reithaina chhao noh noh y ta ei palyupalih aw.

  
Scroll to see more.