Hlazy 25

Study

          |

1 Hy ABEIPA, nâma liata ei palôhrupa khâchâ ei pahnieh.

2 Hy ei Khazohpa, nâ ei cha ngâ na, maophyuhpa ta na paysa kha y; ei khakhaipazy pahniepa ta na paysa kha y.

3 Nâma cha hâtuhpa zydua cha maophyuhpa ta y beih veih ei; a kyh y leipa ta a piepietupazy cha tlao ama maohphyu aw.

4 Hy ABEIPA, na lâpizy cha na pahnosa la; na lâthlôhzy cha na pachu mah y.

5 Na bie hmeihseihpa liana cha nâ chhi la, na pachu mah y, nâ cha ei pachhana Khazohpa châ tlôh chi; noh noh y ta ei cha hâ thlâh ha hi.

6 Hy ABEIPA, na zawngiahna thapasana a thei thlâh ha la, na kyhpachâ ngiachhiena chhao, hlâno tawhta a vaw y hapa châ tlôh ei ta.

7 Ei thyutlia noh hmoparaona nata moleina, a thei thlâh ha leipa la; hy ABEIPA, na phana vâta nata na kyhpachâna vâ tlaita nâ thei thlâh ha mah y!

8 ABEIPA cha phapa nata adopa a châ; chavâta moleipazy cha lâthlôh a pamosa.

9 Areisipa cha adona kyh liata a chhitha, areisipa cha a lâthlôh cha a pachu tyh.

10 A biehraina nata pahnosana a pyhtuhpazy châta cha, ABEIPA lâpi zydua cha kyhpachâna nata ngâchhihna sai a châ.

11 Hy ABEIPA, na moh vâna chata, ei moleina a ngiahthai la, thata châ tlôh ta.

12 ABEIPA a chipa chyhsa cha ahy e a châ? Cha chata a lâthlôh a tlyh awpa cha a pamosa aw.

13 A hrona kyh cha lôhrâtlô ngaitapa ta y aw ta, a pathlazy ta râh cha ama to aw.

14 ABEIPA aviasana cha ano chituhpazy hnohta y ta, a bietaipa cha âmo a pahnosa tyh.

15 Ei mozy ta ABEIPA lâ a moh tyh, ano chata ei pheizy he sao tawhta a daophi tlôh aw ta.

16 Keima lâ a vaw heih la, na ngiachhie mah y; yrupa nata pasa taopa châ tlôh na ta.

17 Ei palôhrupa tymâna he na pachha la, ei nôpona tawhtapa he na thao mah y.

18 Ei rietheina nata pasana he na pachâ la, ei moleinazy nâ ngiahthai mah y.

19 Pachâ tua, na khakhaipazy cha a hluhpi châ ei ta, thata nâ hao tlôh ei ta.

20 Ei hrona he vaih la, na pachha mah y; maohphyupa ta na paysa kha y, nâma liata ei ngâna pahnieh tlôh na ta.

21 Ei palôhrupa siana nata phana heta na pabohsa tlai sala, cha hâ thlâh ha tlôh na ta.

22 Hy Khazohpa, Izarel sahlao he, ama nôpona zydua tawhtapa chatlai mah y.

  
Scroll to see more.