Hlazy 16

Studie

         |

1 Hy Khazohpa, na pabaosa teh, nâma liana cha ei ngâna pahnieh tlôh na ta.

2 ABEIPA lâna chata, “Na cha ei Abeipa na châ na; nâma leipa ta cha phana rai hnei va na,” tah na ta.

3 Alei liata mopathaihpa a ypa zy la, âmo cha chyhsa phapa ei lyna zydua yna cha ama châ.

4 Khazohpa hropa a tlyhtuhpazy cha ama pachârôhna a pôh; thisaih dopa ta hlâna liana cha hlâ hra leipa aw na ta, ei hmao chhaota ama moh pado beih hra vei.

5 ABEIPA cha ei ryutona nata ei nyu dopa châta ei tlyh; nâ ta ei tovyuh cha eina pa-ipa tyh chi.

6 Thliena ri cha su phapa liata ei châta a tla haw; ryu phapa cha ei to haw.

7 ABEIPA ryh na raopa tuhpa cha ei reithai aw; zâ ta chhao ei palôhrupa liata eina pachu tyh.

8 ABEIPA cha ei hmiakô liata khâ ei paysa tyh; ei ku chachâh lâ a ypa vâta, a chalyu aw va na.

9 Chavâta ei palôh a ly ta, ei thlahpa cha a tha a pha; ei sapa chhao a bohpa ta a y aw.

10 Sheôl ota na pie leipa aw chi ta, na moh pathaihpa cha khaotlô pahmôsa pasaih aw va chi.

11 Nâ ta hrona lâpi cha na pahmô chi ta; na yna liata cha lyna kipa cha a y, na ku chachâh lâna cha chhâzaw alyna a y.

Scroll to see more.