Malureina 9

Studie

          |

1 ABEIPA ta Izi râh tawhtapa ama vaw pua rakha tawhta kô nona, thla khana liata, Sinai râhpathohpa liata Mawsi bie a chho ta.

2 “Izarel pathlazy chata zawpakhô kyhchhi cha a daihti lymâ liata hnei mawh sy.

3 a daihti raopa liata, he thla noh hrawhleipalih zâ lâta nama hnei awpa a châ; cha liata tao awpa ta raopa zydua nata a yzie awpa zydua hawhna chata nama hnei awpa a châ,” tahpa ta.

4 Mawsi ta Izarel pathlazy cha zawpakhô kyhchhi hnei awpa ta chho ta.

5 Sinai râhpathohpa liana cha thla khana noh hrawhleipalih noh zâ lâta zawpakhô kyhchhi chhi hnei haw ei ta; ABEIPA ta Mawsi bie a piepa zydua hawhna chata, Izarel pathlazy chata tao ei ta.

6 Ahyzy tlyma a thihpa ri vâta pathaih leipa vaw y ei ta, cha noh liana chata zawpakhô kyhchhi liata a hlao thei leipa ei ta; cha noh liana chata Mawsi nata Arawna hmiakô lâna chata vawh ei ta.

7 cha sahlao chata a hnohta, “A thihpa ri vâta pathaih leipa châ pi ta; khâpa vâta e Izarel pathlazy hry liata a daihti raohpa ta ABEIPA lâta hmohlâpa eima hlâ hra awpa pakhâpa ta eima y?” tah ei ta.

8 Mawsi ta ama hnohta, “A chalih chy teh u, nâmo kyh liata ABEIPA ta kheihta e bie a pie aw tahpa ei pahno aw na,” tah ta.

9 ABEIPA ta Mawsi chho ta.

10 Izarel pathlazy hnohta, nama hry liatahpa rai, nama pathlazy hry liatahpa rai, a thihpa ri vâta a pathaih leipa tlyma, khi a tlyhpa tlyma ama y pathlei khiahtala, ABEIPA châta zawpakhô kyhchhi ama hnei hra awpa a châ.

11 Thla nona noh hrawhleipalih noh zâ lâta ama hnei awpa a châ, viahchhâ thinô pahlao leipa, âhnalasi khâpa chhaota ama nie awpa a châ.

12 A my lâ châta khâpahmah ama soh awpa châ leipa ta, a rupa amâ thli awpa châ hra vei; zawpakhô kyhchhi liata tao awpa ta raopa zydua hawhta ama tao awpa a châ.

13 Anodeikuacha a pathaihpa, khi tlyna hnei tlôh leipa ta, zawpakhô kyhchhi liata a hlao leipa cha a chiheihzy hry tawhtapa, cha chyhsa cha pathluapa a châ aw, a daihti raopa liata ABEIPA lâta hmohlâpa cha a hlâ leipa vâta; cha chyhsa chata a moleina maoh a phaoh aw.

14 Pho hropa chyhsa nama hnohta ypa ta, ABEIPA châta zawpakhô kyhchhi liata a hlao hra awpa ama khoh khiahtala zawpakhô kyhchhi liata tao awpa ta raopa nata yzie hawhta ama tao awpa a châ; he râh liata chyhsa nata pho hropa chyhsazy châta ryhpa miakha nama hnei awpa a châ, tahpa ta reih teh,” tah ta.

15 Achhyna byureih padua noh liana chata achhyna byureih pahnosana poh-o cha meih ta pahly ta; chatawhcha zâlâna chata achhyna byureih chô liata mei haw tlaita a mylâ my taihta y ta.

16 Cha hawhna chata y thlâh ha tyh ta; ameih chata pahly thlâh ha ta, mei hawhta a luah ta.

17 Ameih ta poh-o cha a paisaina maihta, Izarel pathlazy chata sie tyh ei ta, ameih a duana su maih liana chata Izarel pathlazy chata a rie tyh ei ta.

18 ABEIPA biepiepa ta Izarel pathlazy cha sie lymâ ei ta. ABEIPA biepiepa ta a rie tyh ei ta; achhyna byureih chô liata ameih cha a y chhôh zydua a rie thlâ ha tyh ei ta.

19 Achhyna byureih chô liata ameih cha bohpi a y khiahtala Izarel pathlazy chata ABEIPA bie cha zyh ei ta.

20 A châhta cha ameih cha achhyna byureih chô liana chata bohpi leipa ta dei y tyh ta, chatanachata ABEIPA biepiepa hawhta a rie ei ta; ABEIPA biepiepa hawhta ama sie tyh.

21 A châhta cha ameih cha zâlâ tawhta my taihta y ta; chatawhcha my ta ameih cha â pasâh sai khiahtala sie tyh ei ta, noh khata tlyma, zâ khata tlyma ypa ta ameih cha â pasâh sai khiahtala sie thlâh ha tyh ei ta.

22 Achhyna byureih chô liata ameih cha noh no tlyma, thla kha tlyma, kô kha tlyma rai ypa ta, cha liata a y thlâh ha khiahtala, Izarel pathlazy chata a rie thlâh ha tyh ei ta, sie tyh leipa ei ta; â pasâh khiahta deikua cha ama sie tyh.

23 ABEIPA biepiepa ta a rie tyh ei ta, ABEIPA biepiepa ta ama sie tyh; Mawsi hmâpa ta ABEIPA biepiepa ta, ABEIPA bie cha ama zyh.