Malureina 8

¹ ABEIPA ta Mawsi chho ta.

² Arawna chho la, meiôhzy na pakhaih nahta meiôh miasari châta sathaw meiôh sona hmialâ a khaih awpa a châ, tah teh,” tahpa ta.

³ Arawna chata cha hawhna chata tao ta; ABEIPA ta Mawsi bie a piepa hawhna chata meiôh sona hmialâna chata meiôhzy cha pakhaih ta.

⁴ He meiôh sona taopa ngôh daipa a châ; a tôh thabypa nata a paw taihta daipa a châ; ABEIPA ta a nohthlapa Mawsi a pamosapa hawhna tlaita, meiôh sona cha tao ta.

⁵ ABEIPA ta Mawsi chho ta,

⁶ Livai sahlaozy cha Izarel pathlazy hry tawhtapa panano la, pathai teh.

⁷ Âmo pathai awpata he hawhna heta na tao awpa a châ; ama chô liata pathaina ti hie la, ama pôhpa hmi zydua pangyusa la, ama pohzy pasu sala, a pathaisa ei se.

⁸ Chatawhcha viahchao tôh dawpa pô kha, niepa hlâna sathaw pahlaopa viahdie di ngaitapa chhaota palasa la, molei atheihna châta viahchao tôh dawpa pô kha nâ chhi hra awpa a châ.

⁹ Livai sahlaozy cha ahmaohpakhyna poh-o liana chata a chhi la, Izarel pathlazy zawpi zydua cha pahmaohpakhysa khai teh.

¹⁰ Livai sahlaozy cha ABEIPA lâta hlâ aw chi ta, Izarel pathlazy châta Livai sahlaozy chô liata ama ku pahnieh aw ei ta.

¹¹ Arawna ta Livai sahlaozy cha ABEIPA ama chakao thei nawpa ta Izarel pathlazy moh ta hiepa hlâna ta ABEIPA lâta hlâ aw ta.

¹² Livai sahlaozy chata viahchao tôhpazy luh liana chata ama ku pahnieh aw ei ta, chatawhcha Livai sahlaozy chata aryhna tao nawpa ta pô kha cha molei atheihna châta, pô kha cha raopa hlâna ta ABEIPA lâta na hlâ awpa a châ.

¹³ Livai sahlaozy cha Arawna nata a sawchapawpazy hmiakô liana chata paysa aw chi ta, ABEIPA châta hiepa hlâna ta na hlâ awpa a châ.

¹⁴ Cha hawhna chata Izarel pathlazy hry tawhtapa Livai sahlaozy cha panano aw chi ta, Livai sahlaozy cha kei eih ama châ aw.

¹⁵ Cha khai tawhna chata Livai sahlaozy cha ahmaohpakhyna poh-o liata chakao awpa ta a ngia aw ei ta, nâma ta âmo cha pathai aw chi ta, hiepa hlâna ta na hlâ awpa a châ.

¹⁶ Izarel pathlazy hry liatahpa kei châta raopa châ tlôh ei ta; chhi a pahypa zydua Izarel pathlazy saw tuapa zydua vyuhpa ta, kei châta ei hnei haw.

¹⁷ Izarel pathlazy hry liata saw tuapa zydua cha kei eih châ ei ta, chyhsa nata sahrohzy chhaota, Izi râh liata saw tuapa zydua ei thie nona khata kei eih ta ei rao haw.

¹⁸ Izarel pathlazy hry liata saw tuapa zydua vyuhpa ta Livai sahlaozy he ei hnei haw.

¹⁹ Izarel pathlazy vyuhpa ta ahmaohpakhyna poh-o liata chakao awpa nata Izarel pathlazy ta su pathaihpa amâ vaw hniapa chhaota, Izarel pathlazy hry liata hri a charei lei nawpata aryhna tao awpa ta Izarel pathlazy hry tawhtapa Livai sahlaozy he Arawna nata a sawchapawpazy ei pie,” tahpa ta.

²⁰ Cha hawhna chata Mawsi zy, Arawna zy, Izarel pathlazy pôhpakhypa sahlao zydua chata, Livai sahlaozy chô liana chata tao ei ta; Livai sahlaozy kyh liata ABEIPA ta a piepa hawhna zydua chata ama chô liata Izarel pathlazy chata tao ei ta.

²¹ Livai sahlaozy cha, moleina tawhtapa a pathai ei ta, ama pohzy pasu ei ta; Arawna ta ABEIPA hmiakô liata hiepa hlâna ta hlâ ta, chatawhcha âmo pathai nawpa ta Arawna ta aryhna taopa ta.

²² Cha khai tawhta Livai sahlaozy cha Arawna nata a sawchapawpazy ry liata ama chakaona raihria hria awpa ta ahmaohpakhyna poh-o chhôh liata a ngia ei ta; Livai sahlaozy kyh liata ABEIPA ta Mawsi bie a piepa hawhta, ama chô liana chata tao ei ta.

²³ ABEIPA ta Mawsi chho ta.

²⁴ “Livai sahaozy tovyuh cha hezy he a châ; kô syno nata kô pangawh rakha tawhta a chôlâ châta ahmaohpakhyna poh-o liata chakaona raihria hria aw ei ta;

²⁵ kô sypangawhpa chyhsazy chata chakaona raihria cha a pahâ sai aw ei ta, chakao khao aw veih ei.

²⁶ anodeikuacha ahmaohpakhyna poh-o mohôhna kyh liana chata ama unawhpazy bao lymâ aw ei ta, chakaona deikua cha chakao khao aw veih ei. He hawhna heta Livai sahlaozy cha ama raihria na pachâpa awpa a châ,” tahpa ta.