Malureina 6

Study

          |

1 ABEIPA ta Mawsi chho ta.

2 lzarel pathlazy hnohta reih la, ama hnohta, chapaw tlyma, chanô tlyma, kheihawhpa tlyma bietaina ABEIPA châta piepa ta Nazarai bietai a taih nona chata.

3 kresawti nata sahhma dopa châ vei; kresawti thaopa chhao, sahhma thaopa chhao, dohpa châ leipa ta, kre ti chhao doh leipa ta, kre thei a thiehpa chhao, a chawhpa chhao a nie awpa châ hra vei.

4 A panano chhôh zydua chata krezo liatahpa, a theipa hmô chhao, ahyh chhao niepa châ vei.

5 A pananopa ta bie a taih chhôh zydua cha, a luh chhao a ngyu chachei’pa châ vei; ABEIPA chata a pananona chhôh noh â ki hlâta cha pathaihpa châ aw ta; a luh sâ â paseisa awpa a châ.

6 ABEIPA chata a panano chhôh zydua cha a thihpa ri â hnia awpa châ leipa ta,

7 a paw zy, a nô zy, a unawhpa zy, a sietanô zy tlyma, thina kyh liata chhao a papuapalei awpa châ vei; Khazohpa châta â pananona chata a chahry khaipa vâta.

8 Â panano chhôh zydua cha ABEIPA châta pathaihpa a châ aw.

9 A kiapâh liata chyhsa sôkhata thipa ta a pananona luh cha vaw papuapalei haw sala, a pathaih noh a noh sari noh ta, a luh a ngyu awpa a châ.

10 A noh charie noh ta ahmaohpakhyna poh-o chhikao liata theihthaipa hnohta vachhuh pô no tlyma, pivaw pô no tlyma a vaw cheih awpa a châ.

11 chatawhcha theihthaipa chata pô kha cha molei atheihna châta hlâ aw ta, pô kha cha raopa hmohlâpa ta, athihpa vâta a hmo paraona liata aryhna tao pa aw ta. Cha noh ualuana chata a luh cha a pathaih awpa a châ,

12 chatawhcha thailei atheihna châta mietahkupa taw a chapawhpa kô khapa vaw cheih pata a pananona nohzy cha ABEIPA lâta a tao heih aw, a pananona cha papuapaleipa a châ hawpa vâta a hmialâ tahpa kha khâpa hrao leipa châ haw tlôh ta.

13 He he Nazarai chyhsa ama pananona noh â ki tita taonazie awpa cha a châ: ahmaohpakhyna poh-o chhikao liata a chhipa châ aw ta.

14 ABEIPA châta hmohlâpa ta mietahkupa tôhpa kô khapa seina a hnei leipa raopa hlâna ta pô kha, molei atheihna châta mietahkupa taw a chanôhpa kô khapa seina a hnei leipa pô kha, adyhna hlâna châta mietahkupa tôhpa seina hnei leipa pô kha.

15 thinô pahlao leipa viahchhâ nata viahdie di ngaitapa sathaw ta nypa taopa viahchhâ tlâ nata sathaw ta hniapa viahchhâ a pâhpa hrâbyh hmo kha, ama niepa hlâna châta nata dopa hlâna châta zy chhaota ama hlâ awpa a châ.

16 Chatawhcha theihthaipa ta chazy cha ABEIPA hmiakô liata hlâ aw ta, a molei atheihna nata raopa hlâna cha a hlâ aw.

17 mietahkupa tôhpa cha hrâbyh liata viahchhâ thinô pahlao leipazy chhaota adyhna atheihna hlâna châta zy, ABEIPA lâta hlâ aw ta; theihthaipa châta niepa hlâna nata dopa hlâna chhao cha a hlâ hra aw.

18 Nazarai chyhsa châta ahmaohpakhyna poh-o chhikao liata a pananona luh cha ngyu aw ta, a pananona sa cha la aw ta, adyhna atheihna hlâna ry liata mei liana chata a rao awpa a châ.

19 Chatawhcha theihthaipa chata mietahkupa tôhpa palaih pasyu chiehpa nata hrâbyh liata thinô pahlao leipa viahchhâ tlâ kha nata thinô pahlao leipa viahchhâ pâhpa tlâ kha la aw ta, Nazarai chata a pananopa luh a ngyu khai nahta chabasa aw ta.

20 theihthaipa chata hiepa hlâna ta ABEIPA hmiakô liata a hie awpa a châ; he he theihthaipa tovyuh a châ aw, hiepa palôh nata chaluahpa phei chhaota; cha khai nah chata Nazarai chata kresawti a doh thei ha aw.

21 He he Nazarai bietai ryhpa nata ABEIPA hmiakô liata ama hmohlâpa ryhpa cha âmo lôhthai ta hlâpa rei leipa ta; a pananona ryhpa bietai yzie lymâ ta a tao awpa a châ, tah teh,” tahpa ta.

22 ABEIPA ta Mawsi chho ta.

23 Arawna nata a sawchapawpazy hnohta, he hawhna heta Izarel pathlazy byhnâ nama aw pa awpa a châ: ama hnohta,

24 ABEIPA ta byhnâ cha awpa ei sala, cha vaih lymâ ei se:

25 ABEIPA ta a hmia nama chô liata pakhaihsa sala, cha ngiachhie mawh sy.

26 ABEIPA ta nâmo lâ a vaw heih sala thlalôhna cha pie mawh sy:tahpa ta reih teh u, tahpa reih teh.

27 Cha hawhna chata Izarel pathlazy liata ei moh paysapa châ aw ta, chatawhcha kei ta âmo cha byhnâ ei aw pa aw,” tahpa ta.