Malureina 36

¹ Zawsi chhôhkhapazy hry liatahpa Manase sawchapawpa, Makhia sawchapawpa Kilia pathlazy chhôhkha pawhrâhpazy hry liatahpazy chata a vaw hnia ei ta, Mawsi nata hyutuhpa Izarel pathla pawhrâhpazy hmiakô liana chata bie reih ei ta.

² ABEIPA chata eima mahpaw cha Izarel pathlazy cha pachaopa ta ama to awpa râh pie awpa ta bie pie ta; ABEIPA ta eima mahpaw cha eima unawhpa Zelôpheha to awpa cha a sawchanôzy pie awpa ta bie pie ta.

³ Âmo chata Izarel pathlazy hry liatahpa pho hropa ahy sawzy rai hnei sala, eima mahpawzy râh ama topa cha la pâpa ta ama kei hlaonazy pho râh liata bai awpa châ aw ta; cha hawhna chata eima râh tovyuh tawhtapa cha papuapa vaw châ aw ta.

⁴ Izarel pathlazy zubili a vaw tlô tita ama râh cha ama kei hlaona awpazy maih pho râh liata baipa châ aw ta; eima mahpawzy pho râh tawhtapa cha ama râh pahryupa vaw châ aw ta,” tah ei ta.

⁵ Mawsi chata ABEIPA bie hawhta Izarel pathlazy cha bie pie ta, “Zawsi sawchapawpazy pho heta ama reipa â do na.

⁶ Zelôpheha sawchanôzy kyh liata ABEIPA ta bie a piepa cha he hawhna heta a châ, ‘A pha ama tahpa maih hnei ei sala; anodeikuacha ama pawzy phopi hry liatahpa tlai ama hnei awpa a châ,’ tahpa ta.

⁷ Izarel pathlazy râh cha pho hropa tawhta pho hropa lâta pasie ngâpa châ aw vei; Izarel pathlazy chata ama mahpawzy pho râh cha ama to lymâ awpa a châ.

⁸ Izarel pathlazy hry liata ryutotuh awpa sawchanô maih cha Izarel pathlazy ta ama mahpawzy râh ama to chyu lymâ thei nawpa ta a paw phopi hry liatahpa tlai lahpinô a châ awpa a châ.

⁹ Chatanachata râh cha pho hropa pho hropa lâta pasie ngâpa châ aw vei; Izarel pathlazy chata âmo râh chyu cha ama to lymâ awpa châ tlôh ta,” tahpa t.

¹⁰ ABEIPA ta Mawsi bie a piepa hawh tlaita, Zelôpheha sawchanôzy chata tao ei ta.

¹¹ Zelôpheha sawchanô Mahlah zy, Tirzah zy, Hôklah zy, Milka zy, Naw zy chata ama paw unawhpa sawchapawpazy ama hnei.

¹² Zawsi sawchapawpa Manase sawchapawpazy hnei ei ta, ama ryutona cha ama paw pho liana chata a y thlâh haw.

¹³ Hezy he ABEIPA ta Mawsi hmâpa ta Zerikô dady Zawdâh haosâ Môaba bypi liata Izarel pathlazy a piepa biepiepazy nata pachiana ryhpazy cha a châ.