Malureina 25

Studie

          |

1 Izarel sahlao cha Shiti liata pahrâ ei ta, Môaba sahlao sawchanôzy cha sihrykhei ei ta.

2 Ama khazohzy lâta ama atheihnazy liana chata hrua ei ta, nie ei ta, ama khazohzy lâta a bôh hra ei ta.

3 Izarel sahlao chata Peôr liata Baal cha a py haw hra ei ta. Chanatanachata Izarel sahlao chô liata ABEIPA pathi-ia ta.

4 ABEIPA ta Mawsi hnohta, “Zawpizy hyutuhpa zydua cha a chhi la, ABEIPA pathi-iana chichhih ngaitapa cha Izarel sahlao chô tawhtapa a pai thei nawpa ta nohchhôh a pavâhpa liata ABEIPA hmiakô liata pa-aosaosa teh,” tah ta.

5 Chatawhcha Mawsi ta Izarel sahlao pachiatuhpazy hnohna chata, “Nama chyhsa Peôr liata Baal a pyhpa maih cha thie khai chyu teh u,” tah ta.

6 Izarel pathlazy hry liatahpa pakha ta, ahmaohpakhyna poh-o chhikao liata ama cha hai nota, Mawsi mohmô liata nata Izarel sahlao pôh pakhypazy mohmô liata, Midia chanô pakha, a unawhpazy hnohta a vaw chhi ta.

7 Theihthaipa Arawna saw Eliaza sawchapawpa Phineha ta a hmô nahta, pôhpakhypa sahlao hry tawhtapa thyu ta, asei a la ta.

8 Izarel chyhsa poh-o chhôh liata a chadai ta, Izarel chyhsa nata ama pano chata a chô ta, chanô cha a py liata. Chatanachata Izarel pathlazy chô liata hriena cha dia ha ta.

9 Cha hriena liata a thipazy cha thy no nata sâh palih ama châ.

10 ABEIPA ta Mawsi chho ta.

11 “Theihthaipa Arawna sawchapawpa Eliaza sawchapawpa Phineha heta ei hiatliapa hawhta ama hry liata a hiatliana chata ei pathi-iana cha Izarel pathlazy hry tawhtapa papai haw ta, chatanachata ei hiatliana chata Izarel pathlazy cha pahleipadia leipa aw na ta.

12 Chavâta, ‘Ei adyhna biehrai cha a chô liata hraih aw na ta.

13 chatawhcha ano nata a hnôh lâta a pathlazy chata chhâzaw theihthaipa châna biehrai châ aw ta, a Khazohpa chata a hiatlia ta, Izarel pathlazy châta a dyhna a taopa vâta,’ tah teh,” tahpa ta.

14 Izarel chyhsa ama thiepa, Midia chanô nata ama thie hrapa moh cha Zimri, Simeona sahlao hry liata ama chhôhkha pawhrâhpa Salu sawchapawpa châ ta.

15 Midia chanô ama thie hawpa moh cha Kôzabi, Zua sawchanônô a châ, ano cha Midia sahlao chhôhkha hry liata ama hyutuhpa a châ.

16 ABEIPA ta Mawsi chho ta.

17 Midia sahlao cha ama nô papo ula, tusao teh u.

18 âmo chhaota Peôr kyh liata nata Peôr kyh liata hriepa ta ama sietanô Midia sahlaozy mo laipa sawchanônô ama thiepa Kôzabi kyh liata, piehpie ngaitapa ta ama cha dôpa hawhna khata cha dô tyh tlôh ei ta,” tahpa ta.