Malureina 10

Study

          |

1 ABEIPA ta Mawsi chho ta,

2 Tâkâri chiahmie miano tao la; daipa ta na tao awpa a châ; zawpi sahlao aw pakhy nawpa nata pasiesa nawpa ta na hmâh awpa a châ.

3 Cha cha ama tô khiahtala zawpi zydua cha nâ lâta ahmaohpakhyna poh-o chhikao kiapâh liata amâ vaw pakhy khai awpa a châ.

4 Miakha deita ama tô khiahtala Izarel zawpizy hyutuhpa chhihthatuhpazy deita nâ lâta amâ vy pakhy awpa châ aw ta.

5 Zikyurâna tôpa ta nama tô khiahtala nochhi lâchhâh ta a ypa sahlaozy ama sie awpa a châ aw.

6 Zikyurâna tôpa ta nama tô heih khiahtala, chho lâchhâh ta a ypa sahlaozy ama sie awpa a châ. Ama siena awpa ta zikyurâna tôpa ta ama tô awpa a châ.

7 Anodeikuacha zawpizy ahmaohpakhyna awpa châta tô aw eichi ta, zikyurâna tôpa deikua tô leipa ta.

8 Arawna sawchapawpa theihthaipa sahlaozy chata chiahmie cha ama tô awpa a châ. Chazy cha nama châta nama pathlazy taihta chhâzaw ryhpa awpa a châ.

9 Nama râh liata khakhaipa cha pasaipa-ituhpa a dyuh awpa ta nama sie tita zikyurâna tôpa ta chiahmiezy cha nama tô awpa a châ, chatanachata ABEIPA nama Khazohpa hmiakô liata a thei thlâh hapa châ aw eichi ta, nama khakhaipazy tawhna chata pachhapa nama châ aw.

10 Nama thaphana noh liata zy, nama kyhchhi daihti raopa hneipa liata zy, nama thla thiehpa liana zy chata nama raopa hlâna liata nata nama adyhna hlâna atheihna liana zy chata chiahmie nama tô awpa a châ; nama Khazohpa hmiakô liata nama châta a thei thlâh hana a châ aw: Kei he ABEIPA nama Khazohpa ei châ hih,” tahpa ta.

11 Kô nona, thla nona, cha thla noh synona liana chata ameih cha pahnosana achhyna byureih chô tawhtapa cha a pasâh haw ta.

12 Izarel pathlazy cha ama siena yzie hawhna chata Sinai râhpathohpa tawhtapa cha pua ei ta; Paran râhpathohpa liana chata ameih cha a duah haw ta.

13 Mawsi hmâpa ta ABEIPA biepiepa hawhta pua tua tlai ei ta.

14 A hmiatua chaipa ta Zudah pahnosana liatahpa sahlao ama sahlao hluhna yzie lymâ hawhta pua ei ta, a hyutuhpa cha Aminada sawchapawpa Nashona châ ta.

15 Iskara chi hyutuhpa cha Zuara sawchapawpa Nethanel châ ta.

16 Zebulawna chi hyutuhpa cha Helawna sawchapawpa Eliaba châ ta.

17 Achhyna byureih phie ei ta, Kasao sawchapawpazy nata Merari sawchapawpazy achhyna byureih a sytuhpazy cha pua ei ta.

18 Rubena pahnosana liatahpa sahlao cha ama sahlao hluhna yzie lymâ hawhta pua ei ta, a hyutuhpa cha Shedia sawchapawpa Elizua châ ta.

19 Simeona chi sahlao hyutuhpa cha Zurashadai sawchapawpa Shelumiel châ ta.

20 Kada chi sahlao hyutuhpa cha Deuel sawchapawpa Eliasapha a châ.

21 Chatawhcha Koha sahlaozy chata hmo pathaihpazy cha a sy ei ta, pua ei ta, a hropazy chata ama tlô hlâta achhyna byureih cha vaw padua haw ei ta.

22 Ephrai pahnosana liatahpa sahlao cha ama sahlao hluhnazie lymâ hawhta pua ei ta; a hyutuhpa cha Amihu sawchapawpa Elisama châ ta.

23 Manase chi sahlao hyutuhpa cha Pedazu sawchapawpa Kamaliel châ ta.

24 Benzami chi sahlao hyutuhpa cha Kidioni sawchapawpa Abidana châ ta.

25 A hnôh chaipa ta Dana pahnosana liatahpa sahlao cha ama hluhnazie lymâ hawhta pua ei ta; a hyutuhpa cha Amishadai sawchapawpa Ahieza châ ta.

26 Asera chi sahlao hyutuhpa cha Okra sawchapawpa Pakiel châ ta.

27 Nathalai chi sahlao hyutuhpa cha Ena sawchapawpa Ahira châ ta.

28 Cha hawhna chata Izarel pathlazy ama sahlao hluhnazie lymâ hawhta ama sienazie a châ, cha hawhna tlai chata pua haw ei ta.

29 Mawsi puhpa Midia chyhsa Reuel sawchapawpa Hoba hnohta Mawsi ta, ‘Ei cha pie aw ei,’ ABEIPA ta a tahpa su liana chata eima sie awpa châ ta; eima hnohta a vy hra la, a pha ngaitapa ta na chô liata eima tao aw; ABEIPA chata Izarel pathlazy kyh cha a pha ngaitapa ta reih haw tlôh ta,” tah ta.

30 Ano chata a hnohta, “A vy aw va na; keimo râh liata ei heinawhzy hnohta tlao ei sie aw na,” tah ta.

31 Ano chata, “Na siesai cheita khâ, râhpathôhpa liana chata riena su eima tao awpa pahno via tlôh chi ta, eima châta mokhaoh na châ aw.

32 Eima hnohta na sie hra khiahtala, ABEIPA ta hmo phapa maniah a taopa lymâpa hawhta, eima tao pâ lymâ aw,” tah ta.

33 ABEIPA tlâh tawhta noh thôh sie liana chata sie ei ta; ABEIPA Biehrai Byh cha ama châta pahâna su rypaohpa tluapa ta ama hmia lâta noh thôh siena liata, hmia lâta vaw sie ta.

34 Amâ riena su tawhtapa ama pua nahta ABEIPA ameih cha nohchhôh lâta ama chôta y lymâ ta.

35 Chatawhcha Byh cha a pua chy maihta, Mawsi ta, “Hy ABEIPA y, vaw thyu la, na khakhaipazy papai la, châ haotuhpazy cha na hmiakô liata râpai ei se,” tah tyh ta.

36 A pachhohna maihta, “Hy ABEIPA y, Izarel zawpi sahlao hnohna heta vaw kua heih mah y,” tah tyh ta.