Mathai 25

Study

         

1 Cha noh liana chata vârâh Khihnarâh cha laihsakôpa pahrawh, ama meiôh cheipa ta, myuhneituhpa dy awpa ta a puapazy nah chata pakhopa a châ.

2 Ama hryta papangawh hru ei ta, papangawh ama so.

3 Ahrupazy chata ama meiôh ama chei nahta, a ti a chei tlôh leipa ei ta;

4 a sopazy deikua chata ama meiôhzy ama chei nahta a ôh liata a ti a cheipâ hra ei ta.

5 Chatawhcha myuhneituhpa cha charâta a vy leipa vâta ama zydua ta tla-uah ei ta, a mô haw ei ta.

6 Zâcho chhôh liana chata, ‘Nahthlie teh u, myuhneituhpa cha a vy na! Dy awpa ta pua teh u,’ tahpa ta awpa pyu vaw y ta.

7 Chatawhcha laihsakôpazy cha thlai thyu khai ei ta, ama meiôh zy cha rao ei ta.

8 Ahrupazy chata a sopazy hnohta, Nama meitipa kha maniah pie hra teh u, eima mei-ôhzy a thi aw na,’ tah ei ta.

9 Châhrasala a sopazy chata, ‘Keimo nata nâmo châta a daih aw vei; a zuahtuhpazy hnohta vawh ula, tlao chalei teh u,’ tahpa ta a chhy ei ta.

10 Chalei awpa ta ama vawh chhôhta myuhneituhpa cha vaw tlô ha ta, a mâ chiehpazy cha ano nata kialao nie awpa ta a ngia ei ta; ochhi cha khaw ha ei ta.

11 Cha khai tawhna chata laihsakôpa a hropazy chhao cha a vy ei ta, ‘Abeipa, Abeipa, maniah pahypa teh,’ tah ei ta.

12 Ano deikua chata, Hmeihseihta ta, ei cha chho ei chuh, cha pahno veih ei na,’ tah ta a chhy ta.

13 Cha vâna chata a hrohrua teh u, a noh nata dawh cha nama pahno tlôh leipa vâta.

14 Chyhsa, râh hro lâta a sie chy ta, a seizy aw ta, a sôhzy ama hnohta a pavaosapa hawhta châ tlôh ta;

15 sei pakha hnohta talent miapangawh pie ta, sei hropa hnohta talent miano pie ta, sei hropa hnohta talent miakha pie ta, ama tao theina rakha chyu ta pie ta. Chatanachata sie ha ta.

16 Talent miapangawh a vaotuhpa sei cha sôh thlai palie ta; talent miapangawh a hropa papôhsa ta.

17 Cha hawhna hra chata talent miano a vaotuhpa sei chhao chata talent miano a hropa papôhsa ta.

18 Talent miakha a vaopa deikua chata sie ta, alei chao ta, a zibeipa tâkâ cha tlao nyu ta.

19 Noh hluhpi a châ tawhta cha seizy zibeipa cha vaw tlô ta, ama hnohta a sôh thâtih cha pasia ta.

20 Talent miapangawh a pavaosapa cha a vy ta, talent miapangawh a hropa vaw cheih ta, Ei zibeipa, nâma ta talent miapangawh eina pavaosapa chi kha; moh teh, talent hropa miapangawh ei papôhsa,’ tah ta.

21 A zibeipa chata a hnohta, ‘Sei phapa nata ngâchhihpa, na tao pha na; hmo chyhta chô liata ngâchhih chi ta, a hluhpi chô liata ei cha paysa aw; na zibeipa alyna liata a ngia teh,’ tah ta.

22 Talent miano a pavaosapa chhao kha a vy ta, ‘Ei zibeipa, nâma ta talent miano eina pavaosapa chi kha, moh teh, talent miano a hropa ei papôhsa,’ tah ta.

23 A zibeipa chata a hnohta, ‘Sei phapa nata ngâchhihpa, na tao pha na; hmo chyhta chô liata ngâchhih chi ta, a hluhpi chô liata ei cha paysa aw; na zibeipa alyna liata a ngia teh,” tah ta.

24 Chatawhcha talent miakha a pavaosapa chhao kha a vy ta, ‘Ei zibeipa, chyhsa chakhiechariehpa na châ tahpa ei pahno, na hie leina liata chhao â tyh chi ta, na papai leina liata chhao na hria tyh;

25 chavâta chi na ta, sie na ta, na talent kha alei liata nyu na ta. Moh teh, na eih ualua ta na hmô heih hih,’ tah ta.

26 A zibeipa chata a hnohta, ‘Sei moleipa nata thathipa! Ei hie leina liata chhao â na ta, ei papai leina liata chhao ei hria tyh tahpa na pahno ma?

27 Cha hawhta a châ khiahta cha ei tâkâ cha sôhpalietuhpazy hnohta na vaw soh ha bâ awpa a châ, ei vy nata a pôhna chhaota ei hmô heih awpa a châ.

28 Chatanachata a talent miakhapa kha lapa ula, talent miahrawh a hneituhpa hnohta pie teh u.

29 Ahyrai a hneipa maih ama pie baichha aw, a hluhpi a hnei nawpa ta; ahyrai a hnei leipa maih deikua cha, a hneichhôhpa chhao ama lapa aw.

30 Sei phahnai leipa kha khôtho lâ zohna liana chata thy teh u; cha liana chata chana nata hâriena cha a y aw,’ tah ta a chhy ta.

31 Chyhsa Sawchapawpa he a vâlyuhchâpa zydua chhaota rôhnah ngaitapa ta a zu tina chata, a rôhnahna dyuchhai liata a tyuh aw ta.

32 A hmiakô liana chata phopi to apakhy aw ei ta, mietahkuvaihtuhpa ta mie hry tawhta mietahkupazy a pahruapa hawhta, âmo sahlao cha a pahrua aw.

33 mietahkupazy cha a chachâh lâta soh aw ta, miezy deikua cha a chavei lâta a soh aw.

34 Cha tina chata Abeichaipa chata a chachâh lâta a ypazy hnohna chata, ‘Ei Paw ta byhnâ a piepa saih u, a vy ula, khizaw tao tua no tawhta khihnarâh a chhuahdypa cha to teh u;

35 ei nodi ta nâmo ta niepa na pie eichi ta, ei dâhphi ta dopa na pie eichi ta, khichhai châ na ta, na patlôsa eichi ta,

36 thluahruapa ta y na ta, na pabusa eichi ta, tlâh leipa na ta, nâ hmô eichi ta, lô-o liata y na ta, ei hnohta a vy tlôh eichi ta,’ a tah aw.

37 Cha tina chata a siapazy chata, ‘Abeipa, khatita e nodipa ta châ hmô pi ta, niepa eima cha pie tly, dâhphipa ta cha hmô pi ta, dopa eima cha ei tly?

38 Khatita e khichhaipa ta châ hmô pi ta, eima cha patlôsa tly, thluahruapa ta cha hmô pi ta, eima cha pabusa tly?

39 Khatita e tlâh leipa ta tlyma lô-o liata tlyma cha hmô pi ta, na hnohta eimâ vy?’ tahpa ta amâ chhy aw.

40 Abeichaipa chata ama hnohta, ‘Hmeihseihta ta ei cha chho ei chuh, ei unawhpa chyh chaipazy hry liata pakha chô liata nama taopa cha, ei chô liata a taopa nama châ,’ tahpa ta â chhy aw.

42 ei nodi ta nâmo ta niepa na pie leipa eichi ta, ei dâhphi ta, dopa na pie leipa eichi ta;

43 khichhai châ na ta, na patlôsa leipa eichi ta, thluahruapa ta y na ta, na pabusa leipa eichi ta, tlâh leipa na ta, lô-o liata ei y nota nâ hmô vei chi,’ a tah aw.

44 Cha tina chata âmo chhaota, ‘Abeipa, khatita nodipa ta tlyma, dâhphipa ta tlyma khichhaipa ta tlyma tlâh leipa ta tlyma lô-o liata tlyma cha hmô pi ta, eima cha chakao vei?’ tahpa ta amâ chhy aw.

45 Ano chata ama hnohta, ‘Hmeihseihta ta ei cha chho ei chuh, he chyhsa chyh chaipazy hryta pakha chô liata nama tao leipa cha, ei chô liata a tao leipa nama châ,’ tahpa ta â chhy aw.

46 Chazy cha chhâzaw hriena liata sie aw ei ta, chyhsa siapazy deikua cha chhâzaw hrona liata ama sie aw,” tah ta.;

  
Scroll to see more.