Mathai 22

¹ Zisu ta ama hnohta pakhona bie ta reih heih ta.

² Vârâh Khihnarâh cha abei ahy tlyma a sawchapawpa châta kialao taopa nah chata pakhopa a châ.

³ Kialao nie awpa ta a hruapazy cha aw awpa ta a seizy tuah ta; châhrasala a vy khoh leipa ei ta.

⁴ Chatawhcha ano chata, Ei hruapazy hnohta, kyhchhi cha ei mâ haw, ei viahchao tôhpazy nata ei sahroh pasapa thawhpazy thie na ta, ato amâ pata a châ haw; kialao nie awpa ta a vy teh u,’ tah teh u, tahpa ta sei hropazy tuah heih ta.

⁵ Châhrasala vaw uasa leipa ei ta, sie haw ei ta, pakha cha lyu lâ sie ta, a hropa cha sôhdaona lâta,

⁶ chyhsa hropazy chata a seizy cha patu ei ta, noza chhih ngaitapa ta tao ei ta, thie ei ta.

⁷ Abei cha a hie hâh ta, a pheisaih sahlaozy tuah ta, cha liany a cheituhpazy cha pahleipadia ei ta, ama khih chhao rao ei ta.

⁸ Chatawhcha a seizy hnohna chata, ‘Kialao cha amâpa a châ ha na, ei hruapazy deikua chata nie tlâh châ veih ei.

⁹ Chatanachata sie ula, lâtlei liata atyuhpazy nama hmôpa maihta kialao nie awpa ta hrua teh u,’ tah ta.

¹⁰ Cha seizy cha pua ei ta, opâhzy lâta sie ei ta, ama hmôpa maih a chhiepa nata a phapa chhao pakhy khai ei ta; chatanachata kialao chhôhpadâhpa cha khichhaizy chata vaw bie haw ei ta.

¹¹ “Châhrasala abeipa cha hruapazy moh awpa ta a vaw ngia ta, chyhsa pakha ahneina poh a bu leipa cha liana cha hmô ta;

¹² a hnohta, ‘Kaduapâh, kheihtazie ta e, a hneina poh leipa ta he liana heta nâ vaw ngia tly?’ tah ta. Châhrasala ano cha a chalih thlâh ha ta.

¹³ Chatawhcha abei chata a seizy hnohta, ‘A ku nata phei chahry ula, khôtho lâ zohna liata thy teh u, cha liana chata cha nata hârieh a y aw,’ tah ta.

¹⁴ Hruapazy cha a hluhpi châ ei ta, a tlyhpazy deikua cha chyhta ama châ,” tah ta.

¹⁵ Cha nona chata Pharisaizy chata a bie reipa liata ama patu thei nawpa zie pachâ ei ta.

¹⁶ Chatawhcha ama pachupazy, Herawda py liata chyhsazy chhaota a hnohta tuah ei ta, chazy chata, “Pachutuhpa, chyhsa dopa na châ na, ngâchhihpa ta Khazohpa bie pachu tyh chi ta, a papeisapa ahyhmah ta hnei va chi, tahpa eima pahno na; ahyhmah ta thluapa hlei hnei tlôh leipa chi ta.

¹⁷ Chatanachata kheihta e na pachâ maniah chho teh, Kaisara hnohta chhie chei he âna ma na vei maw?” tah ei ta.

¹⁸ Zisu ta amâ chhuahna do leipa cha pahno ta, “Haiphiahpa saih u, khazia e eina pasia eichi?

¹⁹ Chhie tâkâ cha na pamosa teh u,” tah ta. Chatawhcha tâkâ vaw cheih ei ta.

²⁰ Ano chata ama hnohta, “He he ahy nohthlahpa nata moh e a châ?” tah ta.

²¹ Âmo chata a hnohta, “Kaisara,” tah ei ta. Zisu ta ama hnohta, “Kaisara hmozy cha Kaisara hnohta pie ula, Khazohpa hmozy cha Khazohpa hnohta pie teh u,” tah ta.

²² Cha biezy cha ama thei nahta, ama noâh ngâsâ ta; ano cha siesai ei ta, ama sie syulyu haw.

²³ Cha noh lilaw na chata Saduasizy, thyuheina y vei a tahpa zy cha a hnohta a vypa ta a hnohta,

²⁴ “Pachutuhpa, Mawsi ta, ‘Chyhsa saw hnei leipa ta thi sala, a unawhpa ta a lahpinô cha hneipa ta, a unawhpa chata chi a pathla awpa a châ,’ tah ta.

²⁵ Eima hry liata unawh pasari y ei ta; a uhthei chaipa ta lahpinô hnei ta, thi ta, chi a pathla leipa vâta, a lahpinô cha a unawhpa to awpa ta y ta.

²⁶ Cha hawhna hra chata a panona nata pathôhna chata tah hra ei ta, a pasarina taihta ama tah sai.

²⁷ Chatawhcha ama zydua ta ama thi khai nahta chanô chhao cha thi ha ta.

²⁸ Chatanachata thyuheina liana chata ama pasarizy hry liana chata ahy lahpinô e a châ aw? Ama zydua ta hnei chyu tlôh ei ta,” tahpa ta hiahri ei ta.

²⁹ Zisu ta ama hnohta, “Khazohpa châ na ta hmotaotheina nama pahno leipa vâta nama pachâpasipa a châ.

³⁰ Thyuheina liata cha nô nata vah ahiana y leipa aw ta, avâ liata vâlyuhchâpazy hawhta tlao ama y aw.

³¹ Chatawhcha athihpa thyuheina kyh Khazohpa ta nama hnohta a reipa,

³² ‘Kei Abaraha Khazohpa, Aisika Khazohpa nata Zakaw Khazohpa ei châ,’ tahpa ta a reipa kha reih beih veih eichi ma? Khazohpa cha athihpa Khazohpa châ leipa ta, ahrohpa Khazohpa tlao a châ,” tahpa ta a chhy ta.

³³ Zawpizy chata cha cha ama pahno nahta, a bie pachupa cha noâh tah ngâsâ ei ta.

³⁴ Pharisaizy deikua chata Zisu ta Saduasizy cha a padei haw tahpa ama pahno nahta apakhy ei ta.

³⁵ Ama hryta pakha Ryhpa pachutuhpa chata ano pasia nawpa ta.

³⁶ “Pachutuhpa, ryhpa bie liana chata kheihawhpa biepiepa ma a rôhnah chai?” tahpa ta hiahri ta.

³⁷ Zisu ta a hnohta, “Abeipa na Khazohpa cha na pathipalôh tlokhuh ta, na thlahhmipa tlokhu ta nata na palôhrupa tlokhu ta kyh na pachâ awpa a cha,” tahpa hih.

³⁸ He he biepie rôhnahpa nata hmiatua chaipa a châ.

³⁹ A mianona a lyupa cha he he a châ, ‘Nâma kyh nâ pachâpa hawhta na vaihzy chhao kyh na pachâ awpa a châ, tahpa hih.

⁴⁰ He biepiepa miano liana heta ryhpa bie nata hrohsopa bie zydua a pahnieh khaipa a châ,” tah ta.

⁴¹ Pharisaizy ama pahmaopakhy nona chata, Zisu ta âmo cha bie hiahri ta,

⁴² “Mesiah cha kheihta e nama pachâ? Ahy Sawchapawpa e a châ?” tah ta. Âmo chata a hnohta, “Davi Sawchapawpa,” tah ei ta.

⁴³ Ano chata ama hnohta, “Kheihtazie ta e, Davi cha Thlahpa ta pareisapa ta ano cha Abeipa a tah tly?

⁴⁴ ‘Abeipa chata ei Beipa hnohta,na khakhaipazy na pheipazah ry ta ei soh khai hlâ lei la,ei chachâh lâta a tyuh teh’.tah tlôh ta.

⁴⁵ Davi ta ano cha Abeipa, a tah tlôh khiahta cha kheihta e a sawchapawpa a châ thei?” tah ta.

⁴⁶ Ahyhmah ta kawh kha chhao achhy thei leipa ei ta, cha noh rakha tawhna chata ahyhmah ta bie hropa chhao hiahri ngâh khao veih ei.;