1
Zisu ta he biezv he a rei khai nahta, Kalili râh tawhta pua ta, Zawdâh chavah haosâ lâ Zudia râh liata a ngia ta;
2
zawpi a hluhpi ta ano zi ei ta, cha liana chata âmo cha patlâhsa ta.
3
Pharisaizy cha a hnohta a vy ei ta, ano pasia nawpa ta, “Chyhsa ta khâpa kyh rai ta a lahpinô ma awpa âna ma?” tahpa ta hiahri ei ta.
4
Ano chata, “A thao tuana tawhta a taotuhpa ei khata chapaw nata chanô a tao.
5
He vâna heta chapaw ta a nô nata paw siesai aw ta, a lahpinô a patu aw, ama pano ta sapa miakha ama vaw châ ha aw,’ tahpa rei beih veih eichi ma?
6
Chatanachata pano châ khao leipa aw ei ta, sapa miakha ama vaw châ ha aw. Cha vâna chata Khazohpa ta a pazaopa maih cha chyhsa ta pachhaih khah se,” tah ta a chhy ta.
7
Âmo chata a hnohta, “Cha khiah khazia cha Mawsi ta amana châ pie ta, ma awpa bie a pie tlôh?” tah ei ta.
8
Ano chata ama hnohta, “Mawsi ta nama pathipalôh ku a chhapa vâta nama lahpinôzy ma a pasaih, châhrasala a thaona liana cha cha hawhta châ vei.
9
Kei chata ei cha tah ei chuh; ahyrai apheina vâ châ leipa ta, a lahpinô ma ta a hropa a hneipa maih cha apheipa a châ,” tah ta.
10
Pachupazy chata a hnohta, “Cha hawhta chapaw kyh a châ khiahta cha a hneina he pha vei,” tah ei ta.
11
Ano deikua chata ama hnohta, “Cha bie cha chyhsa tota a pyh thei veih ei, piepazy dei leipa ta cha.
12
Ama pie patanahta chyhsa hrilyupazy y ei ta, chyhsa hrilyupa chyhsa ku ta hrilyupazy y hra ei ta, vârâh Khihnarâh vâta hrilyupa ta atao chhypazy y hra ei ta. Ahyrai a pyh theipa maih ta, a pyh ei se,” tah ta.
13
Cha nona chata hawti chyhpatazy ama chôta ku pazawhpa ta thlah a chhâpa thei nawpa ei ta, a hnohta a vaw chhi ei ta. A pachupazy deikua chata âmo ra ei ta;
14
Zisu deikua chata, “Hawti chyhpatazy ei hnohta pa vy sa ula, dytha khah u; vârâh Khihnarâh cha he hawhpa hawti chyhpatazy eih châ tlôh ta,” tah ta.
15
Ama chôta a ku pahnie ta, cha tawhtapa cha sie ha ta.
16
Chyhsa pakha Zisu hnohta a vy ta, “Pachutuhpa, chhâzaw hrona ei hnei thei nawpa ta hmophapa khâpa e ei tao aw?” tah ta.
17
Ano chata, “Khazia hmophapa thâti eina hiahri chi? Phapa cha pakha deita a y. Hrona liata nâ ngia khoh khiahta cha, biepiepazy a pyh teh,” tah ta.
18
Ano chata a hnohta, “Kheihawhpazy maw?” tah ta. Zisu ta, “Lianyh na cheih awpa châ vei; Nâ phei awpa châ vei; Na paru awpa châ vei; Chyhsa na leih awpa châ vei;
19
Na nô nata na paw palyupalih teh; tahpa nata Nâma kyh nâ pachâpa hawhta na vaihzy kyh na pachâ awpa a châ,” tahpa hih tah ta.
20
Satlia chata a hnohta, “Cha zydua cha a phapata ta ei zyh tyh; khâpa e ei phahla heih?” tah ta.
21
Zisu ta a hnohta, “Pha pakipa ta y na khoh khiahta cha, sie la, na hneipa zydua cha zuah la, dyhchhiepazy hnohta pie teh, chatanachata avâ liata ryu na hnei aw; chatawhcha a vy la, na zi teh,” tah ta.
22
Satlia deikua chata cha bie cha a thei pata nahta pachârôhpa ta siesai syulyu ha ta; a hneirôh kawpa vâta.
23
Zisu ta a pachupazy hnohta, “Hmeihseihta ta, ei cha chho ei chuh, chyhsa hneirôhpa chata vârâh Khihnarâh a ngia cha a ru ngâsâ kaw.
24
Ei cha chho heih ei chuh, chyhsa hneirôhpa Khazohpa Khihnarâh a ngiapa hlâta cha râraoseipa chhiephoh khaoh liata a ngia tlao a nao via,” tah ta.
25
A pachupazy ta cha cha ama thei nata ama noâh ngâsâ ta, “Ahy e, pachhapa ta a châ thei aw tly?” tah ei ta.
26
Zisu ta âmo cha moh ta, “Chyhsa châta cha tao theipa rih châ vei, Khazohpa châta cha ato tao theipa a châ,” tah ta.
27
Pity ta a hnohta, “Pachâ teh, keimo ta ato siesaipa ta eima cha zi. Khâpa ma eima hmô aw tly?” tah ta.
28
Zisu ta ama hnohta, “Hmeihseihta ta, ei cha chho ei chuh, khizaw thiehpa liana chata, Chyhsa Sawchapawpa a rôhnahna beidyuchhai liata a tyuh tita, nâmo na zituhpa sahlao chi he beidyuchhai sâhrawhleino liata atyuh aw eichi ta, Izarel pho hrawhleinozy cha ryu nama reih aw.
29
Chatawhcha ahyrai ozy tlyma, unawhpazy tlyma, sietanôzy tlyma, paw tlyma, nô tlyma, sawzy tlyma, râhzy tlyma ei moh vâta a siesaipa maih cha a lie za kha ta hmô aw ei ta, chhâzaw hrona ama to pâ hra aw.
30
Châhrasala chyhsa hluhpi hmiatuapazy cha hnôh chaita y aw ei ta, hnôh chai tahpazy chhao hmia chaita ama y aw.;
