Maka 11

Study

         

1 Zerusale khih ama tlô chyta Ôli Tlâh liata, Bethapha nata Bethani khih ama tlô nahta a pachupazy hry tawhta pano tuah ta,

2 ama hnohta, “Nama hmia lâta khih lâta sie ula, namâ ngia nahta, ahyma ta ama kia beih leipa alâtaw hraipa cha hmô aw eichi ta; pathlâ ula, a vaw chhi muh vy.

3 Chatawhcha ahyrai ta, “Khazia kha kha nama tao?’ ama cha tah khiahta cha, ‘Abeipa ta a khoh, he liata thlai a vaw soh heih a w,’ tah muh vy,” tah ta.

4 Chatawhcha sie ha ei ta, othliah ochhi khôtho liata alâtaw hraipa va hmô ei ta; cha cha pathlâ ei ta.

5 Chatawhcha cha liata aduahpa thokhazy chata ama hnohta, “Khazia e alâtaw kha nama pathlâ?” tah ei ta.

6 Âmo chata Zisu reipa hawhna khata ama hnohta chho ei ta; chatanachata pasiesa haw ei ta.

7 Alâtaw cha Zisu hnohta a vaw chhi ei ta, ama pohzy cha a chô liata padia ei ta; Zisu cha a chô liata kiah ha ta.

8 Chyhsa hluhpi ta lâpi liata ama pohzy phaw ei ta, a hropazy chata lyu liatahpa thochiahzy chhawpa ta phaw hra ei ta.

9 Chatawhcha a hmia lâta siepazy nata a hnôh lâta a vaw pazipazy chata, “Haozana! Abeipa moh ta a vypa cha reithaipa ta y mawh sy!

10 Khihnarâh a vaw tlô awpa eima Paw Davi Khihnarâh cha reithaipa ta y mawh sy! Chônôchai liana khita Haozana!” tahpa ta awh ei ta.

11 Zerusale liata a ngia nahta, achhyna-o lâta vawh ta; chatawhcha ato a mo khai nahta, vaw zâlâ ha ta, pua ta; pahrawhleinozy chhaota Bethani lâta sie ha ei ta.

12 A mylâpa ta, Bethani tawhta amâ vy nahta, a no di kaw ta.

13 Chatawhcha lâhlapi tawhta theiku kô a hna hneipa hmô ta, a thei hmôpa hnabeiseipa ta vawh ta. A kei tlô nah deikua cha a hna dei leipa cha khâpahmah hmô vei, theiku pathei daihti a châ leipa vâta.

14 Zisu ta theiku kô hnohta, “Atahmâ tawhta khati no hmahta nâma tawhta ahyhmah ta a theipa nie kha ei se,” tah ta. A pachupazy ta cha cha pahno ei ta.

15 Zerusale khih cha tlô ei ta. Khazohpa achhyna-o liata a ngia ta, achhyna-o liata hmo a zuahtuhpazy nata a chaleituhpazy cha papua ta, tâkâ a rituhpa tlâhkhaizy nata vachhuh a zuahtuhpa dyuchhaizy chhao chati pathla ta;

16 achhyna-o liana chata ahyhmah ta hmo a cheipa pasai khaoh leipa ta.

17 Ama hnohta, “ ‘Ei o cha pho to zydua châta thlahchhâna o ama bi aw,’ tahpa ropa châ vei ma? Nâmo deikua ta cha a parupa lôpu ta nama tao,” tahpa ta pachu ta.

18 Chatawhcha theihthaipa beizy nata Ryhpa pachutuhpazy cha cha pahno ei ta, ano chipa vâta pahleipadiana awpa zie tlua ei ta, zawpi zydua chata a pachuna cha noâh tah kaw ei ta.

19 Chatawhcha zâlâ maihta khihpi tawhtapa cha pua tyh ei ta.

20 My ta ama sie nota, theiku kô cha a thari taihta raoh khaipa ta hmô ei ta.

21 Pity chata a vaw thei heih ta, a hnohta, “Pachutuhpa, mo tua! Theiku kô chhie na sapa kha a raoh khai haw,” tah ta.

22 Zisu ta ama hnohta, “Khazohpa angiapâ teh u.

23 Hmeihseihta ta, ei cha chho ei chuh, ahyrai he tlâh hnohna heta, ‘A pasie la, tilaipi liata a vaw thy teh,’ tahpa ta a pathipalôh liata a lôh-leina a hnei leipa ta cha, a bie reipa hawhta a vaw y aw tahpa a ngiapâpa ta cha, a châta taopa ta a y aw.

24 Chatanachata ei cha chho ei chuh, khâparai thlahchhâna ta nama hiapa maih cha, hmô hawpa ta a ngiah ula, chatanachata nama hmô aw.

25 Chatawhcha thlahchhâpa ta namâ duana maihta, ahy chôta rai biepeipa nama hneipa maih cha a ngiahthai ula; nama Paw avâ liatahpa chhaota nama paraonazy cha a châ ngiahthai thei hra na awpa ei ta,” tah ta.

27 Zerusale cha tlô heih ei ta. Khazohpa achhyna-o liata a charei nota, theihthai beizy, nata Ryhpa pachutuhpazy, machâzy cha a hnohta a vy ei ta,

28 a hnohta, “Khâpa biehneina hmâpa ta ma he hmozy he na tao, he hmozy taopa ta ahyma bie cha pie?” tah ei ta.

29 Zisu ta ama hnohta, “Kei chhaota bie kawh kha ei cha hiahri hra aw ei; nâ chhy ula, chatanachata he ahy bie ta ma ei tao ei cha chho ei.

30 Zawhana bâtina kha avâ tawhtapa ma chyhsa tawhtapa? Nâ chhy teh u,” tah ta.

31 Amosasyh ta a pachâ ei ta, ‘Avâ tawhtapa, eima tah khiahta cha, ‘Khazia e a bie nama zo vei?’ miah tah aw ta.

32 ‘Chyhsapa tawhtapa,’ eima tah thlâh ha aw tlyma?” tah ei ta, châhrasala zawpi cha chi tlôh ei ta, chyhsa zydua ta Zawhana cha hrohsopa hmeihseihpa ta rao tlôh ei ta.

33 Zisu a chhy ei ta, “Pahno ma pi” tah ei ta. Zisu ta ama hnohta, “Kei chhaota ahy bie ta ma he hmozy he ei tao cha chho hra aw veih ei na,” tah ta.;

  
Scroll to see more.