Luka 23

Study

         

1 Chatawhcha ahmaopakhypa zydua cha thyu ei ta, Zisu cha Pila lâta a chhi ei ta.

2 “He chyhsa heta eima chizy paraoparâ ta, Kaisara hnohta chhiechei pakhâ ta, Mesia abeipa a tahpa eima thei,” tahpa ta leih ei ta.

3 Pila ta a hnohta, “Zuzy beipa na châ ma?” tahpa ta hiahri ta. Ano chata a hnohta, “Ei châpa ta na reih,” tah ta a chhy ta.

4 Pila ta theihthaipa abeizy nata zawpizy hnohna chata, “He chyhsa chô liana heta khâpahmah moleina hmô va na,” tah ta.

5 Châhrasala âmo chata, “Kalili râh liata pathao ta, he su taihna heta Zudah râh khi to liata pachupa ta chyhsa zydua a patypahrei tyh,” tahpa ta tei rili ei ta.

6 Pila ta cha cha a thei nahta, cha chyhsa cha Kalili râh mo a châ nahta châ lei hiahri ta.

7 Chatanachata Herawda a vaopa liatahpa a châ tahpa a pahnopa ta nahta, Herawda lâta tuah ha ta, cha nona chata ano chhao cha Zerusale khih liata y hra ta.

8 Herawda ta Zisu a hmô nahta aly ngaita ta, a thâtih a theipa vâta, cha hlâ tawh raita hmô khoh kaw ta, a hmonoâhpa taopa kheihawhpa chhâ hmô awpa a hnabeisei ta.

9 Chatawhcha bie hluhpi hiahri ta; châhrasala a kheihawhpa hmah a chhy tlôh va.

10 Theihthaipa abeizy nata Ryhpa pachutuhpazy chata a duahpa ta thata leih ei ta.

11 Herawda nata a pheisaihzy chata Zisu mohnao ei ta, pahneisaisona châta hmâh ei ta; poh rônah ngaitapa pabusapa ta, Pila lâta tuah ha heih ta.

12 Cha nona tlai chata Herawda nata Pila cha a chho thai kaw ei ta, cha hlâ zydua cha adyh leipa ei ta.

13 Pila ta theihthaipa abeizy, hyutuhpazy, chyhsa zydua aw pakhy ta,

14 ama hnohta, “Chyhsazy a paraoparâ tahpa ta, he chyhsa he kei lâta namâ vaw chhipa kha châ ta; nama hmiakô liata padai na ta, nama leih-na kyh liana khata, he chyhsa chô liana heta khâpahmah a moleina hmô va na;

15 Herawda chhaota hmô hra vei, keimo lâta a vaw tuah heih hih. Hmeiseihpa ta la, thina tlâh taihta khâpahmah tao vei;

16 chatanachata chhei aw na ta, ei pathlie aw,” tah ta.

17 Zawpakhô kyhchhi maihta Pila ta atâhpa pakha a papuapa tyh ei.

18 Châhrasala â raoh ngaitapa ta awh ei ta. “He chyhsa he pahleipadia la, Baraba tlao maniah papuapa teh,” tah ei ta.

19 Cha chyhsa cha khihpi liata atyna kheihawhpa vâ nata liany a cheihpa vâta atâhna o liata patâhpa a châ.

20 Pila deikua chata Zisu papua khoh ta, ama hnohta bie reih heih ta;

21 châhrasala awh ei ta, ‘Kraws liata khaipâ teh, kraws liata khaipâ teh!” tah ei ta.

22 Ano chata a ei thôhna ta ama hnohta, “Khazia maw, he chyhsa heta khâpa ma a parao? Thina tlâh taihta a chô liata khâpahmah hmô va na; chatanachata chhei aw na ta, ei pathlie aw,” tah ta.

23 Âmo deikua chata ao paro ngaitapa ta, kraws liata khaipâ awpa ta a haw ei ta. Chatawhcha ama ao chata pahnie ha ta.

24 Pila chata amâ hawpa hawhta tao awpa ta bie pathlâ ta.

25 Atyna nata lianycheina vâta atâhna o liata patâhpa ama hiapa kha papua ta; Zisu deikua cha ama khopa hawhta tao awpa ta pie ta.

26 Amâ chhi nota Saimaw Kurinia khihpa, lyurâhpa lâ tawhta a vypa patu ei ta. Zisu hnôh lâta a pia awpa ta a chô liata kraws cha pahnieh ei ta.

27 Zawpi a hluhpi nata chanô pachârôhkheipa ta a cha ngâpazy ta zi ei ta.

28 Zisu deikua chata âmo lâ a heih ta, “Zerusale sawchanôzy saih u, nâ chakhei khah u, nâmo nata nama sawzy châta cha teh u.

29 Pachâ teh u, noh a vaw tlô aw, cha nohzy liana chata, ‘Chanô saw leipazy, saw phaoh beih leina chhizy, saw pazy beih leipa sâhpizy cha a nohlao na!’ ama tah aw.

30 Cha tina chata chyhsazy ta tlâhpizy lâta, ‘Maniah vi teh,’ tah aw ei ta; tlâh byupazy lâta, ‘Maniah khu teh,’ ama tah aw.

31 Tho hrohpa liata hmahta he hawhta ama tao khiahta cha, a raohpa liana cha kha tluta ma ama tao aw tly?” tah ta.

32 Chatawhcha a hnohta mo hropa pano moleipa thie awpa ta a chhi hra ei ta.

33 Luh-ru ama tahpa su cha ama tlô nahta, cha liana chata kraws liata khaipâ ei ta. moleipazy chhaota, a chachâh lâta pakha, a chavei lâta pakha.

34 Zisu ta, “Ei Pâ y, âmo he a ngiahthai teh; ama hmotaopa he ama pahno vei na,’ tah ta. Chatawhcha a chysiazy cha a rai awpa ta pachao ei ta.

35 Chatawhcha vâtlâh sahlao chata aduahpa ta sai ei ta; hyutuhpazy chhaota, ‘Mo hropa hmahta a pachha tyh mâ tâh; Khazohpa a tlypa Mesia a châ tlai khiahta cha ano chhao a pachha se!” tahpa ta taola ei ta.

36 Chatawhcha pheisaihzy chhaota ano cha pahneisaisona ta hmâh ei ta, ano lâ a vy ei ta, sahma thaopa pie ei ta.

37 “Zuzy beipa na châ tlai khiahtala, nâsasyh ta a pachha teh!” tah ei ta.

38 Chatawhcha a chô lâna chata, “He he Zuzy Beipa a châ,” tahpa ta ropa ta a y.

39 Moleipa ama khaipâpa pakha chata Zisu ra ta, “Mesia cha châ va chi mâ? A pachha la, keimo chhao maniah pachha teh!” tah ta.

40 Châhrasala pakha chata a chhypa ta ra ta, “Khazohpa tlai chhao na chi tla maw, miakhasai ta ama cha hriepa he?

41 Keimo la hrie tlâh rai eima châ; eima hmotaopa ty dei a hmôpa eima châ; he chyhsa he la khâpahmah parao vei,” tah ta.

42 Chatawhcha, “Zisu, na Khihnarâh na tlô tita nâ thei thlâh ha mah y,” tah ta.

43 Ano chata a hnohta, “Hmeiseihta ta, ei cha chho hih, atanoh he ei hnohta Paradi liata na y hra aw,” tah ta.

44 Dawh hrawhleino rachhôh châ ta, cha tawhna chata zâlâ dawh thôh taihta râh tlokhuh vaw zoh ha ta,

45 noh khaih khao leipa ta, Khazohpa achhyna-o poh-raipa cha a liahliah ta a vaw hrie ha ta.

46 Zisu ao paro ngaitapa ta awh ta, “Ei Pâ y, na ku liata ei thlahpa ei cha pavaosa!” tah ta. A tah khai nahta a thlahpa pathlie ha ta.

47 Chatawhcha pheisaih zakha hyutuhpa chata hmo yzie cha a hmô nahta, “He chyhsa he chyhsa siapa a châ tlai na!” tahpa ta, Khazohpa rei thai ta.

48 Cha moh phapa cha sai awpa ta a vaw pakhypa zydua chata, hmo yzie zydua ama hmô nahta ama chachôhnazy a chôpata a di haw ei ta.

49 Chatawhcha a pahnopatheipa zydua nata chanô Kalili râh tawhta a vaw zipazy cha, cha hmozy cha saipa ta lâhlapi ta aduah ei ta.

50 Chyhsa pakha a moh Zawsi, ryureituhpa, chyhsa sia ngaitapa y ta,

51 ama reipa nata ama hmotaopa chhao kha a ryh ta tah leipa rai châ ta, Zu chyhsa Arimathai khihpa, Khazohpa Khihnarâh hnabei a seih tyhpa châ ta.

52 Cha chyhsa cha Pila lâta vawh ta, Zisu ri hiah ta.

53 Chatawhcha la ta, poh rih dipa ta pahly ta, thlâ alô khiepa ahyhmah ama pazia beih leina liata pazia ta.

54 Cha noh cha Pachyhnoh châ ta, pahânoh vaw châ daihmâ ha tlôh ta.

55 Chanô Kalili râh tawhta a hnohta a vypazy khata zi lymâ ei ta, thlâ nata a ri pazianazie cha hmô ei ta.

56 Chatawhcha a di ei ta, khâpaleipa rohpahâhpazy nata sathaw rohpahâhpazy a chhuahnoh ei ta. Pahânoh chata ryhpa biepiepa hawhta a pahâ ei ta.;