Luka 21

Study

         

1 Zisu cha mohmia pasaih ta, chysa hneirôhpazy ta thyu pakhyna byh liata ama thyuna pathla haipa hmô ta;

2 nôhmei dyhchhiepa ta ahy tlyma phusâ dipa sâno a vaw pathlapa hmô hra ta.

3 Zisu ta, “Hmeiseihta ta, ei cha chho ei chuh, he zydua hlâna heta he nôhmei dyhchhiepa heta a pathla hluh via;

4 he zydua heta ama hnei laipa liatahpa thyupakhyna liata ama pathla, ano deikua heta, a kho ngaitapa a pahrona awpa ta a hnei chhôhpa ta a pathla khai haw,” tah ta.

5 Chatawhcha ahyzy tlyma Khazohpa achhyna-o kyh, alô pha ngaitapa nata hmo piepa ta ama pangiazie cha ama rei nota, ano chata,

6 “He hmozy nama hmôpa he, pacho leipa ta alô a ypa rai he liana heta y aw vei, cha hawhpa noh cha a vaw tlô aw,” tah ta.

7 Âmo chata a hnohta, “Pachutuhpa y, chazy cha khatita ma a vaw y aw tly? Chazy cha a vaw tlô chy liata ngiana khâpa a y aw?” tahpa ta hiahri ei ta.

8 Zisu ta, ‘Ama cha dô lei nawpa ta a a chado teh u; chyhsa hluhpi ta, ‘Ano cha ei châ!’ ‘A daihti a tlô daihmâ ha na!’ tahpa ta, keima moh reipa ta amâ vy aw. Cha chyhsazy cha zi khah u.

9 Adyuhna kyh nata tyhreina kyh nama thei tita, chi khah u; chazy cha a tlô tua awpa raina a châ, chhâna deikua cha thlai tlô mâh aw vei,” tah ta.

10 Ama hnohta, “Pho hropa nata pho hropa adyuh aw ei ta, râh hropa nata râh hropa adyuh aw ei ta;

11 alosihpa ru ngaitapazy y aw ta, su hluhpi liata chakâhnazy y aw ta, hrizy charei hra aw ta; avâ tawhta hmo chichhihpazy nata ngiana rarôhy ngaitapazy a y aw.

12 Châhrasala cha zydua tlô hlâna chata cha patu aw ei ta, apakhyna-o liata chyhsazy nata patâhna o liata chyhsazy lâta chhihthapa ta cha taola aw ei ta, keima moh vata abeizy nata hyutuhpazy hmiakô liata a châ chhi aw ei.

13 Nama thai châna a châ via pachai aw.

14 Chatanachata a chhyna awpa pachâ chhielie leipa ta, nama palôhrupa liata a pa-i teh u;

15 nama khakhaipa zydua ta ama ei thei lei nawpa nata ama châ dyuh thei lei nawpa ta pakah nata sona cha pie tlôh aw ei na ta.

16 Chatawhcha nama nô nata nama pawzy, nama unawhpazy, nama heinawhzy chhaota ama cha patusa aw ei, thokha cha pathiesa aw ei ta;

17 keima moh vâta chyhsa zydua a haopa nama châ aw.

18 Châhrasala nama sâbu sâkha chhao leidia aw vei.

19 Nama tiamana ta nama hrona nama pabohsa aw.

20 “Châhrasala pheisaih sahlaozy ta Zerusale khih ama padôpa nama hmô tita, leidiana a hnia tahpa pahno teh u.

21 Cha tina chata Zudia râh liata a ypazy cha tlâh lâtazy a râ ei se, khihpi chhôh liata a ypazy chata puasai ei se, râh liata a ypazy cha a chhôh liata a ngia khah ei se;

22 cha noh cha phuh lana noh a châ, bie ama ropa zydua a vaw tlô thei nawpa ta.

23 Cha nohzy liana chata saw a phaohpazy nata hawsaih a pyhpazy chô liana chata ama hu a po aw! Khizaw liana heta rietheina thata a tlô awpa vâ nata he chizy chô liana heta hiehâna a vaw tlô awpa vâta;

24 zaozi ta thie aw ei ta, pho to lâta sei ta chhihthapa ta ama y aw. Zenitaizy noh a ki hlâ lei cha Zerusale khih cha Zenitaizy tly pâpa ta a y aw.

25 “Chatawhcha noh liata zy, thlâpâ liata zy, awhsi liata zy ngiana y aw ta, tilaipi pyu nata a chatlaona vâta alei liata chhao pho to rietheina nata nôpona a tlô aw,

26 chyhsazy rietheina vâta nata khizaw liata hmo a vaw tlô awpa cha pachâna vâta chipa ta ama no a maoh aw; avâ hmotaotheinazy cha a chalyu tlôh aw ta.

27 Cha daihti liana chata Chyhsa Sawchapawpa he hmotaotheina nata rônah ngaitapa ta meihdo hry liata a zupa ama hmô aw.

28 Cha hmo cha a vaw tlôpa ta nahta a chô lâta moh ula, nama chatlaina cha a hnia kawpa vâta,” tah ta.

29 Ama hnohta pakhona bie reih ta, “Theiku kô nata tho zydua moh teh u;

30 a chhy panyupa a thaopa nama hmô nahta nopi a hnia aw tahpa nama pahno tyh.

31 Cha hawhna hra chata nâmo chhaota chazy cha a vaw tlôpa nama hmô tita cha, Khazohpa Khihnarâh a hnia haw tahpa pahno teh u.

32 Hmeiseihta ta, ei cha chho ei chuh, hmo zydua a tlô paki hlâ leita cha he chhâ he leidia aw vei.

33 Alei nata avâ tlao a leidia aw, ei bie deikua cha leidia aw vei.

34 ‘Anodeikuacha a chado teh u, chata leipa ta la rihbie tupa ta nata sahma parina chhaota hro chhôh khihsana pachâna vâta nama palôhrupa pabiepa ta a y pathlei aw na, cha noh liana chata khohei hawhta sôkhata nama chô liata a vaw tlô pathlei aw na;

35 cha hawhna tlai chata alei liata a pahrâpa zydua chô liana chata tlô chyu tlôh aw ta.

36 Cha hmo a vaw tlô awpa zydua cha khôkhâh tlâh awpa nata Chyhsa Sawchapawpa hmiakô liata a duah tlâh awpa ta raopa nama châ thei nawpa ta, khâpa no rai chhaota thlahchhâna chôta riavaih teh u,” tah ta.

37 Noh to Khazohpa achhyna-o liata pachusa tyh ta, zâ tato ta pua ta, Ôli tlâh ama tahpa liana chata a rie tyh ta.

38 My dikarita a bie nahthlie awpa ta chyhsa zydua Khazohpa achhyna-o liata a hnohta amâ vy tyh.;