Theihthaina 19

Studie

          |

1 ABEIPA ta Mawsi chho ta.

2 Izarel pathla zawpi sahlao zydua cha chho la, ama hnohta, nama pathaih awpa a châ: Kei ABEIPA nama Khazohpa he pathaih tlôh na ta.

3 Chyhsa to ta, nama nô nata nama paw nama za awpa châ ta, ei pahânohzy cha nama ô awpa a châ: Kei he ABEIPA nama Khazohpa cha ei châ.

4 Khazohpa nohthlapa lâ a heih khah ula, nohthlapa patlaipa khazohzy nama châta tao hra khah u: Kei he ABEIPA nama Khazohpa cha ei châ.

5 ABEIPA chata adyhna hlâna namâ theih tita, a pyh tlâh châ awpata nama hlâ awpa a châ.

6 Nama hlâna noh nata a mylâ ta nie awpa châ ta, noh thôh noh taihta a y khiahtala mei ta rao awpa a châ.

7 Noh thôh noh ta niepa a châ rai khiahtala pasichhihpa châ ta; a pyhpa châ leipa aw ta.

8 a niepa maih chata ABEIPA hmo pathaihpa a papuapaleipa vâta a hmo paraona maoh phaoh aw ta, cha chyhsa cha a chiheihzy hry tawhtapa pathluapa ta a y aw.

9 Nama lyu liata sâh nama hria tita, nama lyu sâh adihliapazy taihta nama tai khai awpa châ leipa ta, a kâmo chhao nama tho awpa châ vei.

10 Nama kresadô liata a kâmo nama tho awpa châ leipa ta, nama kresadô liata a thei a zôpa chhao namâ huah awpa châ leipa ta, sipasapa nata râh hropa chyhsazy châta nama pahlôhpa awpa a châ: Kei he ABEIPA nama Khazohpa cha ei châ.

11 Nama paru awpa châ leipa ta, dôpakheipa ta hmo nama tao awpa châ leipa ta, haipa ta nama chho awpa châ hra vei.

12 Nama Khazohpa moh pachhiepa ta ei moh reipa ta, haipa ta chhie nama sa awpa châ vei: Kei he ABEIPA cha ei châ.

13 Na vaihzy na dô awpa châ leipa ta, na paru pa awpa châ hra vei. A hlaopa hlao cha azo zâkhidei ta a mylâ taihta nâ vao awpa châ vei.

14 Nahpâpa cha chhie na sapa awpa châ leipa ta, mochaopa hmiakô liata chapiasana na soh awpa châ hra vei, na Khazohpa na chi awpa a châ mâ tâh: Kei he ABEIPA cha ei châ.

15 Ryureina liana chata a sia leipa ta nama pachia awpa châ vei, sipasapa châ leipa ta, chyhsa hmo a tao theipa na za hlei awpa châ leipa ta, a sia ngaitapa ta na vaih ryu na reih awpa a châ.

16 Na chiheihzy hry liata chyhsazy kyh reipa ta nâ khie awpa châ leipa ta, na vaih thisaih kyh liata a no leipa ta na châkhei awpa châ hra vei: Kei he ABEIPA cha ei châ.

17 Na palôhrupa ta na unawhpa nâ hao awpa châ vei, na vaih cha na chhorei awpa a châ, a moleina liata na pathaih nawpa ta.

18 Phuh na la awpa châ leipa ta, na chiheih pathlazy a haona na hnei awpa châ hra vei, nâma kyh nâ pachâpa hawhta na vaih kyh na pachâ awpa tlao a châ: Kei he ABEIPA cha ei châ.

19 Ei biepiepazy cha nâ pyh awpa a châ. Na sahroh cha chi hropazy pathlasa khâ; na lyu liata âhnalasi chi no, a chi cheih khah la; hmo chi hropa miano sa pahlaopa poh nâ bu awpa châ hra vei.

20 Ahyrai seichanô vahpa a pahawhtuhpa a hneipa, chatlai leipa, pathlie leipa chanô nata â zia khohpa maih cha, hriepa ama châ aw, thie awpa la châ vei, ano cha pathlie leipa a châpa vâta.

21 Ahmaohpakhyna poh-o chhikao liata ABEIPA lâta a paraopa hlâna, mietahkupa tôhpa tlai paraopa hlâna châta a chhi awpa a châ.

22 Chatawhcha a hmo parao hawpa a paraona liana chata ABEIPA hmiakô liata paraona hlâna mietahkupa tôhpa cha ta, theihthaipa ta aryhna a tao pa aw; chatanachata a hmo parao hawpa a paraona liana chata a ngiahthaipa a châ aw.

23 “Râh cha pahrâpa ta niepa châta theilâpa kô chi to nama loh tita, a theilâpa cha pathai leipa ta nama pachâ awpa a châ; nama châta kô thôh pathai leipa ta nama pachâ awpa châ ta; nie chachei lei awpa a châ.

24 A kô palih kô chata a theipa zydua cha ABEIPA reithai nawpata a eih ta panano awpa a châ.

25 chatawhcha a kô pangawh kô chata nama châta a pôh lymâ thei nawpa ta, a theilâpa cha nama nie awpa a châ: Kei he ABEIPA nama Khazohpa cha ei châ.

26 A thisaih chhaota khâpahmah nama nie awpa châ leipa ta, na dyuzy hmâpata, pachaopazy nama hmâh awpa châ hra vei.

27 Na siali tawhta â dôpata na luh nâ ngyu awpa châ leipa ta, kâhmi kâ â lâna taih tai awpa châ hra vei.

28 A thihpa vâta nama pôhpa nama â awpa châ leipa ta, namâ chapai awpa châ hra vei: Kei he ABEIPA cha ei châ.

29 Sihrypa ta tao awpa ta na sawchanônô papuapalei khâ, râh cha apheina râh ta vaw châ aw ta, moleina ta a bie pathlei aw na.

30 Ei pahânohzy cha namâ ô awpa châ ta, ei su pathaihpa cha nama za awpa a châ: Kei he ABEIPA cha ei châ.

31 Lyurâhripa pachao thaipa a peihpazy cha pangai khah ula, dyuthaipazy chhao nama pualei nawpa ta âmo cha tlua khah u: Kei he ABEIPA nama Khazohpa cha ei châ.

32 Luh pawhpazy hmiakô liana chata nâ duah lymâ tyh awpa châ ta, machâpa hmia cha na za awpa a châ; Khazohpa cha na chi awpa a châ: Kei he ABEIPA cha ei châ.

33 Râh hropa chyhsa nama râh liata a y hrapa ama y khiahtala, âmo chôta â do leipata tao aw vei eichi.

34 Râh hropa chyhsa nama hry liata a ypazy cha, nama châta nama râh liata chyhsa hawhta ama châ awpa châ ta, nâma kyh nâ pachâpa hawhta kyh na pachâ awpa a châ; nâmo chhao Izi râh liana khata râh hropa chyhsa nama châpa kha: Kei he ABEIPA nama Khazohpa ei châ hih.

35 Ryureina kyh liata zy, thliena liata zy, khopathliana liata zy, panuana liata zy a sia leipata nama tao awpa châ vei.

36 Khopathliana â do ngaitapa, khopathliana lô â do ngaitapa, ephah â do ngaitapa, hin â do ngaitapa nama hnei awpa a châ: Kei he ABEIPA nama Khazohpa Izi râh tawhta châ chhihthatuhpa kha ei châ.

37 Chatawhcha ei biepiepa zydua nata ei ryhpa zydua a pyh aw eichi ta, nama zyh awpa a châ: Kei he ABEIPA cha ei châ, tah teh,” tahpa ta.