Theihthaina 13

Studie

         |

1 ABEIPA ta Mawsi nata Arawna hnohta,

2 Chyhsa a sapa vo a thloh tlyma, a hmah chaku a tao tlyma, a pabôpa tlyma, a vo liata phawhpa hri a châ awpata a lyu khiahtala, theihthaipa Arawna lâta tlyma, a sawchapawpa theihthaipazy hryta, ahy lâta tlyma chhitha awpa a châ,

3 theihthaipa chata sapa vo liata hri cha vaw moh aw ta; a hri yna liata hmi cha phawhpa ta a hri cha a sapa vo hlâta â thuhpata â lâ khiahtala phawhpa hri cha ta theihthaipa chata ano vaw moh aw ta, chyhsa pathaih leipa a châ tahpa a phuah awpa a châ.

4 A sapa vo liata pabôpazy cha vaw râh ta, a vo hlâta a thupa ta â lâ leipa ta, a hmi cha arâh leipa khiahtala, hri a ohtuhpa cha theihthaipa ta noh sari â nano ta khawhlôh aw ta;

5 theihthaipa chata noh sari noh ta ano cha moh aw ta, chatawhcha a hri cha ualua ta hmô ta, a hri cha vo liata a kawh via leipa khiahtala theihthaipa chata noh sari â nano ta khawhlôh heih aw ta;

6 chatawhcha theihthaipa ta noh sari noh ta moh heih aw ta, hri cha vyhpa ta, a vo liata a kawh leipa khiahtala, theihthaipa chata a pathaih tahpa a phua awpa a châ; riatha dei a châ, a pohzy pasu aw ta, a vaw pathaih aw.

7 Anodeikuacha a pathaihna awpata theihthaipa a pamosa tawhta riatha cha a vo liata a kawh khiahtala, theihthaipa a pamosa heih awpa a châ.

8 theihthaipa chata vaw moh aw ta, riatha cha a vo liata a kawh khiahtala, theihthaipa chata pathaih leipa a châ tahpa a phuah aw; phawhpa hri a châ.

9 Phawpa hri chyhsa ta a oh khiahtala theihthaipa lâta chhitha awpa a châ;

10 theihthaipa ta vaw moh aw ta, vo liata a râhpa ta thlohpa ta a hmi papawhpa ta, a thlohpa cha a taopalie khiahtala.

11 phawhpa hri parohpa a sapa liata a ypa cha ta, theihthaipa ta pathaih leipa a châ tahpa phuah aw ta; â nano ta khawhlôh awpa châ leipa ta, pathaih leipa châ tlôh ta.

12 Chatawhcha phawhpa cha vo liata kawhpa ta, a hri a ohtuhpa cha a vo a luh tawhta a phei pawhmao taihta theihthaipa pahno theipa rakha phawhpa ta a bu khiahtala.

13 Theihthaipa ta moh aw ta, phawhpa ta a sapa zydua a bu haw khiahtala, hri a ohtuhpa cha a pathaih tahpa a phuah awpa a châ; râh khai ha ta, a pathai haw.

14 Anodeikua cha a sapa a taopalie khiahtala pathaih leipa a châ aw.

15 Theihthaipa chata sapa taopaliepa cha moh aw ta, pathaih leipa a châ tahpa a phuah awpa a châ, phawhpa a châ.

16 Anodeikua cha sapa taopaliepa cha a vaw nano leipa ta a vaw râh heih khiahtala theihthaipa chata hri a ohtuhpa cha pathaih leipa châ vei tahpa a phuah awpa a châ a pathaih haw.

18 Chatawhcha sapa vo liata kheihluh y ta, vaw tlâh haw ta.

19 a kheihluh yna su liata a râhpa ta a kaw byuh tlyma, a râhpa a saihpâpa ta a pabô tlyma khiahtala, theihthaipa pamosa awpa a châ.

20 theihthaipa ta vaw moh aw ta. vo hlâta a thuhpa ta â lâ ta, a hmi cha a pawh khiahtala, theihthaipa ta pathaih leipa tahpa a phuah awpa a châ; phawhpa hri cha ta, kheihluh liata a vaw pua.

21 Anodeikuacha theihthaipa ta vaw moh ta, hmi pawhpa y leipata, bâhta a vyhpa dei a châ khiahtala, theihthaipa ta noh sari â nano ta khawhlôh aw ta.

22 chatawhcha vo liata a kawh khiahtala vachhuh tlyma ahmaohpakhyna poh-o chhikao kiapâh liata theihthaipa lâta a cheih awpa a châ.

23 Anodeikuacha cha pabôpa râhpa cha a yna ualua ta ypata a kawh leipa khiahtala, kheihluh hmahdawpa dei châ ta; theihthaipa ta a pathaih tahpa a phuah awpa a châ.

24 Chatawhcha sapa vo cha mei ta kâpata a kâpa taopaliepa cha a râhpa a saihpata tlyma, a râhpa tlyma ta a pabô khiahtala,

25 theihthaipa ta moh aw ta, a pabôpa liana chata hmi cha pawhpa ta, vo hlâta a thuhpata â lâ khiahtala phawhpa châ ta; mei kâpa liata a vaw luahpa a châ, chatanachata theihthaipa ta pathaih leipa a châ tahpa a phuah awpa a châ; phawhpa hri a châ.

26 Anodeikuacha theihthaipa ta vaw moh ta, pabôpata hmi a pawhpa y leipa ta, vo hlâta a thuh leipa ta, bâhta a vyhpa dei a châ khiahtala theihthaipa ta noh sari â nano ta khawhlôh aw ta,

27 chatawhcha theihthaipa ta noh sari noh ta ano cha moh aw ta; vo liata a kawh khiahtala theihthaipa ta pathaih leipa a châ tahpa a phuah awpa a châ; phawhpa hri a châ.

28 Chatawhcha a pabôpa a yna ualua ta y thlâh hapa ta, vo liata kawh leipa ta, bâhta a byuhpa dei a châ khiahtala, mei kâpa thlohna dei châ ta, theihthaipa ta a pathaih tahpa a phuah awpa a châ; mei kâpa hmahdawpa dei a châ.

29 Chapaw tlyma, chanô tlyma ta a luh liata tlyma, a kâ liata tlyma hri a a hnei khiahtala.

30 theihthaipa ta hri cha moh aw ta, vo hlâta a thuhpata a lâpa ta hmi a maihpa a dipa ta a y khiahtala, theihthaipa ta pathaih leipa a châ tahpa a phuah awpa a châ; riatha chata luh tlyma, kâ tlyma phawhpa a châ.

31 Chatawhcha theihthaipa ta riatha hri cha moh ta, vo hlâta a thuh leipata â lâ ta, a hmi vyhpa a y vei khiahtala, theihthaipa ta riatha hri a hneituhpa cha noh sari ânano ta khawhlôh aw ta,

32 noh sari noh ta, theihthaipa ta hri cha moh aw ta; riatha cha kawh leipa ta, hmi maihpa y leipa ta, riatha cha vo hlâta a thupata a lâ vei khiahtala,

33 ngyu awpa châ ta, riatha deikua cha a hmi a ngyu awpa châ vei, chatawhcha theihthaipa ta riatha a hneipa cha noh sari hropa ânano ta khawhlôh aw ta;

34 noh sari noh ta theihthaipa ta riatha cha moh heih aw ta, riatha cha vo liata kawh leipa ta, vo hlâta a thuhpa ta â lâ vei khiahtala, theihthaipa ta a pathaih tahpa a phuah awpa a châ; chatawhcha pohzy pasu aw ta, a vaw pathaih ha aw.

35 Anodeikuacha riatha cha a pathaih khai tawhta a vo liata a kawh khiahtala,

36 theihthaipa ta ano cha moh aw ta, riatha cha vo liata a kawh khiahtala theihthaipa chata hmi maihpa cha moh cheingei byuh aw vei; pathaih leipa a châ.

37 Anodeikuacha riatha cha a ualua ta a ypa ta hmô ta, hmi vyhpa a thao khiahtala, riatha cha a tlâhpa châ ta, a pathaih; theihthaipa ta a pathaih tahpa a phuah awpa a châ.

38 “Chatawhcha chapaw tlyma, chanô tlyma, ama sapa vo liata a pabôpa, a pabôpa a râh ngaitapa a y khiahtala,

39 theihthaipa ta moh aw ta, ama sapa vo liata pabôpa cha bâhta a vyhpa dei a châ khiahtala, pabô chakhyhpa châ ta, vo liata vaw puapa châ ta; a pathaihpa a châ.

40 “Chyhsa a sâ a py khai khiahtala, luh pôlôpa châ ta, châhrasala a pathaihpa a châ.

41 A laki sâ a py khai khiahtala, luh tlypa châ ta, châhrasala a pathaihpa a châ.

42 Anodeikuacha luh pôlôpa liata tlyma, luh liata tlyma, hri a saipata a râpa a y khiahtala, a luh pôlôpa tlyma, a luh tlypa tlyma liata vaw puapa phawhpa a châ.

43 Chatawhchata theihthaipa ta moh aw ta, a luh pôlôpa tlyma, a luh tlypa tlyma liata, hri a vaw puapa cha phu saihpa ta sapa vo liata phawhpa hawhta â lâ khiahtala.

44 chyhsa phawhpa châ ta, pathaih leipa a châ; theihthaipa ta pathaih leipa a châ tahpa a phuah thlyu awpa a châ; phawhpa cha a luh liata a châ.

45 “Phawhpa hri a ohpa cha, a phozy hriepa châ aw ta, a sa zy pathlia aw ta, a hmao chô lâ khu aw ta, ‘Pathaih leipa, pathaih leipa,’ tahpa ta a awh awpa a châ.

46 Phawhpa ta a bu chhôh cha a puapa châ aw ta; a pathaih leipa châ ta; â nano ta a y awpa a châ, a yna awpa cha ariena su khôtho lâ a châ.

47 “Chysia chhao, sahmi chysia tlyma, pala ri dipa chysia tlyma,

48 atôh liata tlyma, a phei liata tlyma rai, pala ri dipa tlyma, sahmi tlyma rai, savo tlyma khâpa rai savo ta taopa liata tlyma,

49 phawhpa hri ypata, cha hri cha chysia liata tlyma, savo liata tlyma, a tôh liata tlyma, a phei liata tlyma, khâpa rai savo ta a taopa liata tlyma, a hrohpâpata tlyma, a saihpâpa ta tlyma ta, a vaw lâ khiahtala, phawhpa hri châ ta, theihthaipa pamosa awpa a châ.

50 Chatawhcha theihthaipa ta hri cha moh aw ta, hri a hneipa cha noh sari â nano ta khawhlôh aw ta;

51 noh sari noh ta hri cha moh aw ta, hri cha chysia a tôh liata tlyma, a phei liata tlyma, savo khâpa châta rai ta ama hmâpa, savo liata zy tlyma, pakawhpa ta a y khiahtala, hri cha phawhpa hri a kawh ngâpa chi châ ta, pathaih leipa a châ.

52 Chysia cha, a tôh liata tlyma, a phei liata tlyma, sahmi tlyma, pala ri dipa tlyma, savo ta taopa chi rai tlyma, phawhpa yna maih cha mei ta a rao awpa a châ, phawhpa a kawh ngâpa chi châ tlôh ta; rao thlyu awpa a châ.

53 Chatawhcha theihthaipa ta vaw moh ta, chysia a tôh liata tlyma, a pheih liata tlyma, savo ta taopa chi maih liata chhao hri cha a kawh leipa khiahtala,

54 hri yna cha theihthaipa ta pasu awpa bie pie aw ta, noh sari a hropa â nano ta a khawhlôh heih aw;

55 chatawhcha hri yna pasu khai tawhna chata theihthaipa ta moh heih aw ta. Hri â luanazie cha â nano vei khiahtala, hri cha kawh vei hrasala, pathaih hlei vei; mei ta na rao awpa a châ, a phawhpa hri cha a chhôh lâ tlyma, a khôtho lâ tlyma rai châ sala.

56 Chatawhcha theihthaipa ta vaw moh ta, pasu khai tawhta, a vyhpâpa dei a châ khiahtala, chysia tawhtapa tlyma, savo tawhtapa tlyma, a tôh tawhtapa tlyma, a pheih tawhtapa tlyma cha hrie aw ta,

57 chysia cha, a tôh liata tlyma. a pheih liata tlyma, savo ta taopa zy liata tlyma a la thlâh ha khiahtala a vaw pua heihpa cha ta, hri a hneipa cha mei ta na rao awpa a châ.

58 Chatawhcha chysia cha, a tôh tlyma, apheih tlyma, khâparai savo ta taopa chi rai tlyma, na pasu nahta hri ta a paisai khiahtala, pasu heih awpa châ ta, chatanachata a vaw pathaih aw.

59 He he chysia sahmi tlyma, pala ri dipa tlyma a tôh liata tlyma, a pheih liata tlyma, savo ta taopa chi rai zy tlyma liata phawhpa hri a ypa, a pathaih nata pathaih lei phuana ryhpa awpa cha a châ tahpa ta chho ta.