Theihthaina 1

Studie

         |

1 ABEIPA ta Mawsi aw ta, ahmaopakhyna poh-o tawhta bie a chho ta,

2 “Izarel pathlazy cha chho lâ, ama hnohta, nama hryta ahyrai ta hmohlâpa ABEIPA lâta nama hlâ nota, sahroh viahchao hri nata mietahkupa zaw hry liatahpa nama hlâ awpa a châ.

3 “A hmohlâpa cha viahchao hri hry liatahpa raopa hlâpa a châ khiahtala, a chapawpa seina a hnei leipa a hlâ awpa a châ; cha cha ABEIPA hmiakô liata a pyhpa a châ thei nawpa ta, ahmaopakhyna poh-o chhikao thaby liata a hlâ awpa a châ.

4 raopa hlâpa luh chô liana chata a ku pahnieh aw ta, chatanachata ano chata aryhna taona awpata a pyhpa a châ aw.

5 ABEIPA hmiakô liata viahchao tôhpa thiâ aw ta; Arawna sawchapawpa theihthaipazy ta thisaih cha hlâ aw ei ta, ahmaopakhyna poh-o chhikao hmiakô liata maisâh cha thisaih chata ama hie awpa a châ.

6 Chatawhcha raopa hlâpa cha a vo hlai aw ta, a pachhaih awpa a châ;

7 theihthaipa Arawna sawchapawpazy chata maisâh liata mei soh aw ei ta, mei chô liata tho ama pacho aw;

8 Arawna sawchapawpa theihthaipazy chata a sapa zy, a luh zy, a thaw zy cha maisâh liata mei chôta tho liana chata soh aw ei ta;

9 a chhôrihzy nata a pheizy deikua cha ti ta a pasi aw, theihthaipa chata ABEIPA châta rohpahâh ngaitapa mei ta hlâpa raopa hlâpa chata tlokhuh ta maisâh liata a rao awpa a châ.

10 Hmohlâpa cha raopa hlâpa châta, sahro zaw hry liatahpa mietahkupa tlyma, mie tlyma a châ khiahtala a chapawpa seina a hnei leipa a hlâ awpa a châ;

11 maisâh kâ maw lâchhâh ta ABEIPA hmiakô liata thie aw ta, chatawhcha Arawna sawchapawpa theihthaipazy chata maisâh cha a thisaih chata ama hie awpa a châ.

12 Pachhaih aw ta, a luh chôta, mei chôta, tho liana chata a soh aw;

13 a chhôrihzy nata a pheizy deikua cha ti ta a pasi aw. Chatawhcha a zydua ta theihthaipa ta hlâ aw ta, maisa liata a rao awpa a châ; ABEIPA chata rohpahâh ngaitapa, mei ta hlâpa raopa hlâpa a châ.

14 ABEIPA chata hmohlâpa cha, raopa hlâpa pavaw lâ a châ khiahtala, a hmohlâpata vachhuhzy tlyma, pivaw tawzy tlyma, hlâ awpata a vaw cheih awpa a châ.

15 Theihthaipa ta maisâh liata vaw cheih aw ta, maisâh liata a rao aw; a thisaih cha maisâh kâ liana chata pathlao aw ta.

16 a daoh cha a hmi chhaota thy aw ta, maisâh kiapâh nochhi lâchhâh ta buchâh sona su liana chata thy aw ta;

17 a mathlawzy cha chamieh pachho aw ta, pachhaih pathla leipata. Chatawhha theihthaipa ta maisâh liata mei chôta tho liana chata a rao awpa a châ; cha cha ABEIPA châta rohpahâh ngaitapa mei ta hlâpa raopa hlâna a châ.