Ryureihtuhpazy 18

Studie

         |

1 Cha nona chata Izarel râh liata abei y leipa ei ta, cha nona chata Dana chizy chata râh pahrâ awpa tlua ei ta, Izarel chizy hry liata râh pahrâ awpa to hra tlôh leipa ei ta.

2 Chatawhcha Dana pathlazy chata ama pho zydua hry liatahpa chyhsa riahphapa papangawh Zôrah nata Estawl khih tawhta râh moh paru awpa nata kei ngia awpa ta tuah ei ta; ama hnohta “Sie ula, râh cha kei ngia teh u,” tah ei ta. Chatanachata Ephrai tlâh râh liata Mika o cha kei tlô ei ta, cha liana chata a rie ei ta.

4 Ano chata ama hnohta, “Mika heta he hawhna heta na tao ta; na hrua ta, a theihthaipa ta ei y,” tah ta.

5 Âmo chata a hnohta, “Eima siena awpa liana heta thlaochhipa ta eima y aw ma, y vei aw ma tahpa, eima pahno thei nawpa ta Khazohpa maniah hiahripa tua mah y,” tah ei ta.

6 Chatawhcha theihthaipa ta ama hnohta, “Thlalôh ngaitapa ta sie teh u. Nama siena awpa cha ABEIPA ta a cha pahnokhei lymâ ei,” tah ta.

7 Chatanachata chyhsa papangawh zy cha pua ei ta, Laisha khih liata a ngia ei ta, cha liata chyhsa zy cha Sidaw mozy hawh hra ta, chhôhmo ngaitapa nata thlalôh ngaitapa ta ama yna zie kei hmô ei ta, cha râh liana chata khâpahmah ta a parao thei awpa bie a hneituhpa hlei ahyhmah y leipa ei ta, Sidaw mozy nata a hla kaw ei ta, ahmâ pahlaona rai hnei rairieh veih ei.

8 Chatawhcha Zôrah nata Estawl khih lâta ama unawhpa zy lâna chata kua haw ei ta: ama unawhpa zy chata ama hnohta, “Kheihta e a châ?” tah ei ta.

9 Âmo chata, “Thyu teh u, adyuh ei suh u; râh cha hmô haw tlai pi ta, a pha kaw na. Thyu aw veih eichi mâ? Cha râh liata a ngiapa ta pahrâ awpa ta hawh kha u.

10 Nama sie khiahtala chhôhmohpa ta a ypa chyhsa zy nama hmô aw. Lyurâh hra cha lai kaw tlôh ta; Khazohpa ta a cha pie haw ei, alei liata hmo a ypa liata la, khâpahmah phahla awpa y leina su a châ,” tah ei ta.

11 Chatanachata Zôrah nata Estawl khih tawhna chata Dana phozy cha adyuhna chhaichhi atobipa ta chyhsa za charu pua ei ta,

12 khy ei ta, Zudah râh Kizaziari khih liata ariena su tao ei ta. Chavâta cha su cha atahmâ taihta Mahaneda ama tah; Kizaziari notla lâta a y.

13 Cha tawhna chata Ephrai tlâh râh lâ pangai ei ta, Mika o cha tlô ei ta.

14 Chatanachata Laisha râh mohparu awpa ta chyhsa papangawh a puapa zy chata a chhy ei ta, ama unawhpa zy hnohta, “He ozy liana heta ephod zy, teraphi zy, khazoh nohthlapa taopa zy, khazoh nohthlapa leihpa zy a y tahpa nama pahno ma? Chatanachata kheihta e, nama tao aw,” tah ei ta.

15 Cha tawhtapa cha tlei ei ta, a thâtih hiahri ei ta.

16 Dana pathla chyhsa za charu adyuhna chhaichhi a tobipa zy cha kuh chhikao kiapâh liata a duah ei ta;

17 chyhsa papangawh râh a mohparutuhpa zy cha khy ei ta, khazoh nohthlapa taopa zy, ephod zy, teraphi zy, khazoh nohthlapa leihpa zy la ei ta; chatawhcha theihthaipa cha chyhsa za charu adyuhna chhaichhi a tobipa zy hry liata kuh chhikao kiapâh liata a duah hra ta.

18 Chazy cha Mika o liata a ngiapa ta, khazoh nohthlapa taopa zy, ephod zy, teraphi zy, khazoh nohthlapa leihpa zy, ama la nata theihthaipa ta ama hnohta, “Khâpa ma nama tao tly?” tah ta.

19 Âmo chata, “A chalih teh, na ku ta na hmao kha chahu teh, eima hnohta a vy hra la, eima paw ta nahta theihthaipa ta vaw y teh, na châta dykha deita theihthaipa ta ypa ma a pha via, Izarel hry liata chi kha nata pho kha theihthaipa ta ypa ma?” tah ei ta.

20 Chatawhcha theihthaipa palôhrupa cha a ly kaw ta; ephod zy, teraphi zy, khazoh nohthlapa taopa zy cha la ta, zawpi sahlao hry liana chata ahlao haw hra ta.

21 Chatanachata sie ei ta, ama sawnawh chyhpa ta zy, sahroh zy, hmobao zy cha ama hmia lâta pasiesa lymâ ei ta.

22 Mika o tawhta vâro ama sie ha tawhta Mika opa mozy cha apahmaohpakhy ei ta, Dana pathla sahlao cha a chadaipa ta pha haw ei ta.

23 Dana pathla sahlao cha awsao ei ta, âmo cha a vawh heih ei ta, Mika hnohta, “Khâpa na tah maw, chyhsa khazie zydua nâ vykhei tly?” tah ei ta.

24 Ano chata, “Ei khazoh taopa zy nata theihthaipa cha siekhei chi ta, sie syulyu eichi ta, khâpa e ei hnei khao? Kheihtazie ta e, ‘Khâpa ma na tao,’ eina tah thlâh eichi?” tah ta.

25 Dana pathlazy chata a hnohta, “Eima hry liata bie rei chakhyh khâ, chata leipa ta la chyhsa pathi chhiepa ku pasa tao pathlei aw chi ta, na chhôhkhapa zy chhao heta nama hrona nama pahlei pathlei aw na,” tah ei ta.

26 Chatanachata Dana pathlazy cha sie haw ei ta; Mika chata a dyuh ngâh awpa rimâ a châpa ta pahno tlôh leipa ta a o lâna chata a di haw heih ta.

27 Chatawhcha Mika hmotaopa nata a theihthaipa hneipa cha siekhei haw ei ta, Laisha khih chhôhmohpa ta a ypazy lâna cha tlô ei ta, zaozi ta thie ei ta, khih cha mei ta rao haw ei ta.

28 Sidaw tawhta a hla ngaitapa vâta a pachha awpa ahyhmah y tlôh leipa aw ei ta, ahy nata hmahta a hmâna rai hnei hra leipa ei ta. Berehô kiapâh saikao liata a ypa a châ. Chatawhcha khih cha padua heih ei ta, cha liana chata pahrâ ei ta.

29 A khih moh cha Izarel saw ama pathlatuhpa, Dana bi hnâpa ta Dana bi ei ta; anodeikuacha hmiatua ta cha, cha khih cha Daisha ama tah tyh.

30 Dana pathlazy chata khazoh nohthlapa taopa cha âmo châta patyu ei ta; Mawsi sawchapawpa Kesaoma sawchapawpa Zawnatha nata a sawchapawpa zy cha râh cha chyhsa ta ama la hlâ lei cha Dana chizy theihthaipa ta y haw ei ta.

31 Chatanachata Mika taopa khazoh nohthlapa taopa cha Shilôh khih liata Khazohpa o a y chhôh zydua cha patyu ei ta.

  
Scroll to see more.