Ryureihtuhpazy 13

Studie

          |

1 Izarel pathlazy chata ABEIPA mohmô liata hmo moleipa tao heih ei ta, ABEIPA ta Philistina mo ku liata kô sypalih paysa ta.

2 Zôrah khih liata Dana pho chyhsa pakha y ta, a moh cha Manôah châ ta; a lahpinô cha saw leipa châ ta, saw rai phaoh beih leipa ta.

3 ABEIPA vâlyuhchâpa cha chanô hnohta a vaw luah ta, a hnohta, “Saw leipa châ chi ta, saw rai phaoh leipa chi ta, châhrasala saw phaoh aw chi ta, sawchapawpa na sa aw.

4 Chavâta a sohsi teh, kresawti nata sahhma rai doh kha la, nie hrao leipa hmo rai chhao nie chachei ta khâ,

5 saw phaoh aw chi ta, sawchapawpa sa tlôh aw chi ta. A luh liana chata sâ ngyuna rai hmâh aw va chi, hawti cha chhi liata a y no tawhta Khazohpa châta Nazarai chyhsa châ tlôh aw ta; ano chata Izarel mozy he Philistina mozy ku tawhtapa cha a pachha pathao aw,” tah ta.

6 Chanô chata a vahpa hnohta, “Khazohpa chyhsa mo pakha ei hnohta a vy ta, a hmia cha vâlyuhchâpa hmia hawhta chichhipa a châ; khataih lâ chyhsa ma a châ tahpa hiahri leipa na ta, ano chata a moh na chho hra leipa ta;

7 anodeikuacha ei hnohta, ‘Saw phaoh aw chi ta, sawchapawpa na sa aw; kresawti nata sahhma rai doh kha la, nie hrao leipa hmo rai chhao nie chacheita khâ, hawti cha chhi liata a y no tawhta a thina taihta Khazohpa châta Nazarai châ tlôh aw ta,’ tah ta,” tahpa ta reih ta.

8 Chatawhcha Manôah chata ABEIPA lâta a haw ta, a hnohta, “Hy ABEIPA y, ngiachhiepa ta Khazohpa chyhsa na vaw tuapa kha, eima hnohta a vy hei sala, hawti a vaw pih awpa cha, kheihta e, eima tao aw maniah vaw pachu mawh sy,’ tah ta.

9 Khazohpa ta Manôah bie reipa cha nahthlie ta, chanô cha sibiepa su liata â tyu no ta a hnohta Khazohpa vâlyuhchâpa cha a vy heih ta; a vahpa Manôah deikua cha a hnohta y leipa ta.

10 Chanô cha a parah ngaitapa ta thlai a râ ta, a vahpa cha kei chho ta, a hnohta, “Moh tua! Zâkhano ta ei hnohta a vypa kha ei hnohta â vaw luah hei,” tah ta.

11 Manôah cha thyu ta, a lahpinô zi ta, cha chyhsa lâna cha kei tlô ta, a hnohta, “Nâma he ma chanô hnohta bie a reihtuhpa chi cha?” tah ta. Ano chata, “Ei châ cha,” tah ta.

12 Manôah chata, “Na bie lymâ hawhta vaw tlô mawh sy, hawti yzie awpa cha kheihta e, châ aw ta, khâpa e, a hria awpa a châ aw tly?” tah ta.

13 ABEIPA vâlyuhchâpa chata Manôah hnohta, “Chanô liata ei reipa zydua kha a phapa ta pachâ thlâh ha mawh sy.

14 Krezôh liatahpa rai cha nie awpa châ leipa ta, kresawti nata sahhma rai a doh awpa châ vei, nie hrao leipa rai chhao a nie awpa châ vei; bie ei pie hawpa zydua kha a phapa ta avao mawh sy,” tah ta.

15 Manôah ta ABEIPA vâlyuhchâpa hnohta, “Ngiachhiepata ta cha thlyu aw pi ta, mie taw eima chô chhuahnohpa tua aw,” tah ta.

16 ABEIPA vâlyuhchâpa chata Manôah hnohta, “Na thlyu hra la, na pati la nie aw va na; raopa hlâna châta a chhuahnohpa na châ khiahtala ABEIPA lâta na hlâ awpa a châ,” tah ta. Manôah chata ano cha ABEIPA vâlyuhchâpa a châ tahpa pahno tlôh leipa ta.

17 Manôah ta ABEIPA vâlyuhchâpa hnohta, “Na moh ahy maw, na bie reipa hawh tlaita a vaw tlô tita eima cha palyupalih thei nawpa ta?” tah ta.

18 ABEIPA vâlyuhchâpa chata a hnohta, “Khazia ei moh eina hiahri chi, rei awpa na kawh châ va?” tah ta.

19 Manôah ta mie taw cha niepa hlâna chhaota la ta, lôpanô chô liata ABEIPA lâta hlâ ta, vâlyuhchâpa chata hmonoâh ngaitapa tao ta. Manôah nata a lahpinô chata moh thlâh ha ei ta,

20 maisâh tawhta mei paleih cha avâ lâ a kiah nona chata ABEIPA vâlyuhchâpa cha maisâh liata mei palei liana chata kiah haw tlôh ta, Manôah nata a lahpinô chata moh thlâh ha ei ta; alei liata â khu lâta pao ei ta.

21 Anodeikuacha ABEIPA vâlyuhchâpa cha Manôah nata a lahpinô lâna chata a vaw luah khao vei. Chatanachata Manôah chata ABEIPA vâlyuhchâpa a châ tahpa pahno ta.

22 Manôah chata a lahpinô hnohta, “Khazohpa eima hmô hawpa vâna heta eima thi thlyu aw,” tah ta.

23 Châhrasala a lahpinô chata a hnohta, “ABEIPA ta thie maniah a chhuah khiahta cha raopa hlâna zy nata niepa hlâna eima hlâpa zy kha a chhy khoh aw mâ, he hawhpa zydua chhao he maniah pamosa leipa aw ta, he hawhpa hmozy chhao he atahmâ maniah chho hra aw vei,” tah ta.

24 Chanô chata sawchapawpa sa ta, a moh Sasawna bi ta; hawsaih cha vaw laiseih ta, ABEIPA ta byhnâ pie ta.

25 Zôrah nata Estawl likawh ta Mahaneda su liana chata ABEIPA Thlahpa ta vaw pahra pathao haw ta.

  
Scroll to see more.