Zawsua 20

Studie

         |

1 Chatawhcha ABEIPA ta Zawsua chho ta,

2 “Izarel pathlazy hnohta, ‘Abohna khihzy tao teh u, Mawsi hmâpa ta nama hnohta ei rei haw khawh,

3 ahyrai pahno leipa ta chyhsa a thie tlamaw tuhpa cha, cha liana chata a râ thei nawpa ta; chatanachata thisaih phuh a latuhpa tawhna chata nama châta a abohna a châ aw.

4 Cha khihpi zy hry liata a kheihawhpa liana tlyma chata a râ aw ta, khihpi kuh chhikao a ngiana liata a kei duah aw ta, cha khih machâzy nahkhao theina liata a thâtih cha tlôkhei aw ta; âmo chata khih chhôh lâta ama hnohta a chhi aw ei ta, ama hnohta a pahrâ thei nawpa ta yna awpa cha ama raopa aw.

5 Chatawhcha thisaih phuh a latuhpa chata a vaw chadai khiahtala, a thietuhpa cha a ku liata ama pie awpa châ vei; a vaih cha pahno leipa ta a thiepa châ ta, cha hlâta a haona hnei tlôh lei khâh ta.

6 Zawpi hmiakô liata pachiapa awpa ta â duah hlâta nata cha nota theihthaipa abei a ypa cha a thi hlâ lei cha, cha khih liana chata a y thlâh ha awpa a châ; cha hnôh lâna chata chyhsa a thietuhpa cha, ano khihchhôh tlai a rasaipa khih ano o chhôh lâna tlai chata a ngia heih awpa a châ,’ tahpa ta rei mah y,” tahpa ta.

7 Chatanachata Nathalai tlâh râh lâta, Kalili liata Kedesa khih zy, Ephrai tlâh râh liata Sekhe khih zy, Zudah tlâh râh liata Kiriathaba khih (cha cha Hebraw a châ) zy cha rao haw ei ta.

8 Zawdâh khôlâ ta Zerikô nochhi lâta Rubena pho râh liata, râhpathohpa bypi liata Beza khih zy, Kada pho râh liata Kilia râh Ramo khih zy, Manase pho râh liata Basana râh liata Kôlâ khih zy rao ei ta.

9 Cha khih zy cha Izarel pathla zydua nata ama hry liata pho hropa a ypa zy châta raopa a châ; ahyrai chyhsa a thie tlamawtuhpa cha cha lâna chata a râpa ta, zawpi zy hmiakô liata a duah hlâ lei cha, thisaih phuh a latuhpa ku liata a thi lei nawpa ta.

Scroll to see more.