Zawsua 18

Studie

          |

1 Izarel pathla zawpi zydua cha Shilôh khih liata a pahmaoh ei ta, cha liana chata achhyna poh-o parai ei ta; râh cha ama bie ry liata y haw ta.

2 Izarel pathlazy hry liana chata ama tovyuh rai leipa pho sari y ei ta.

3 Chatanachata Zawsua ta Izarel pathlazy hnohta, “ABEIPA nama pathlatuhpa zy Khazohpa ta a cha pie hawpa râh he khachâ e pahrâ leipa ta nama y aw tly?

4 Pho hropa chyu liatahpa chyhsa pathôh lymâ a tlyh ula, âmo cha tuah aw na ta, âmo cha pua aw ei ta, râh cha kei chahryh aw ei ta ama tovyuh awpa chyu lymâ ta roh aw ei ta, chatawhcha kei lâta vaw kua heih aw ei ta.

5 Âmo châta su sari ta pachhaih aw ei ta, Zudah sahlao cha chho lâta ama tovyuh liata y aw ei ta, Zawsi chhôhkha zy cha Maw lâta ama tovyuh liata ama y aw.

6 Chatawhcha râh cha su sari ta pachhaih ula, cha ropa thâtih cha na vaw pie teh u; chatanachata he liana heta ABEIPA eima Khazohpa hmiakô liata ei cha pachao pa aw ei.

7 Livai mo deikua heta cha nama hry liata tovyuh hnei leipa ei ta, ABEIPA theihthaina raihria he ama tovyuh châ tlôh ta; chatawhcha Kada mozy, Rubena mozy nata Manase pho khophie zy khata cha Zawdâh haosâ nochhi lâna khata ama tovyuh cha ABEIPA chakaotuhpa Mawsi ta a vaw piepa kha to haw ei ta,” tah ta.

8 Chatanachata cha chyhsa zy cha pua haw ei ta; chatawhcha râh thâtih ro awpa cha Zawsua ta, “Râh cha va chahryh ula; vaw roh khai ula, kei lâta vaw tlôkhei heih ula, he liata Shilôh khih liana heta ABEIPA hmiakô liata ei cha pachao pa aw ei,” tahpa ta bie pie ta.

9 Chatawhcha chyhsa zy sie ei ta, râh cha chahryh ei ta, su sari ta pachhaih ei ta, châbu liata a khih zydua ta roh khai ei ta; ariena su Shilôh lâna chata Zawsua lâta a vy heih ei ta,

10 Zawsua ta Shilôh liana chata ABEIPA hmiakô liata pachao pa ta; cha liana chata Zawsua ta Izarel pathlazy cha amâ chhaihna yzie lymâ hawhna chata râh cha rai ta.

11 Pachaopa cha Benzami pathlazy pho, ama chhôhkha yzie lymâ hawhta ama chô liata tlu ta, ama râhri cha Zudah pathlazy nata Zawsi pathlazy likawh ta a châ.

12 Maw lâchhâh ta ama râhri cha Zawdâh tawhta a châ; chatawhcha râhri cha Zerikô kâ lâ maw lâchhâh ta khy lymâ ta, notla lâchhâh ta tlâh râh lâta khy lymâ ta, râhri chhâna cha Beve râhpathohpa liata a châ.

13 Cha râhri cha Luza lâta, (cha cha Bethel a châ), a kâ lâta chho lâchhâh ta sie lymâ ta, chatawhcha râhri cha Behôrô mathi lâtahpa chho lâchhâh ta tlâh kiahpa ta, Atarôthada lâta chô ta.

14 Chatawhcha râhri cha sie lymâ ta, Behôrô chho lâchhâh ta tlâh kiahpa tawhna chata notla lâta chho lâchhâh ta pakoh ta, cha cha Kiriazabaal (cha cha Kiriaziari a châ), Zudah pathlazy khihpi liata chhâ ta, cha cha notla lâchhâh râh cha a châ.

15 Chatawhcha chho lâchhâh ta râh cha Kiria­ziari chhâna tawhta a châ; chatawhcha râhri cha notla lâta pua ta, Nephatô chavah lâna chata sie lymâ ta;

16 chatawhcha râhri cha Rephai maw lâchhâh saikao liata Hinô sawchapawpa saikao kiapa ta tlâh pai lâna chata chô ta; chatanachata Zebu mo kâ lâta chho lâchhâh ta Hinô saikao lâta chô ta, Enrôkel lâta chô ta;

17 chatawhcha maw lâ heih ta sie ta, Enaseme lâta sie ta, Adumi khyna a daih lâ Kelilô lâta sie ta; Rubena sawchapawpa Bôha alô lâta chô ta;

18 Arabah kâ lâ maw lâchhâh ta sie lymâ ta, Arabah lâta chô ta;

19 chatawhcha râhri cha Behôklah kiah maw lâchhâh ta sie lymâ ta; chatawhcha râhri cha Zawdâh chho chhâna Tilaipi Iahpa maw lichakoh liata a châ; cha cha chho lâ râhri a châ.

20 Zawdâh cha chho lâchhâh ta râhri a châ, cha cha Benzami pathlazy ama chhôhkha yzie lymâ hawhta ama tovyuh râh ta a pahlyna chhôh cha a cha.

21 Benzami pathlazy ama chhôhkha yzie lymâ hawhta ama khihpi zy cha Zerikô zy, Behôklah zy, Emekezezi zy,

22 Betharaba zy, Zemarai zy, Bethel zy,

23 Avima zy, Parah zy, Ôphra zy,

24 Kepharamôni zy, Ôphani zy, Keba zy; khihpi miahrawhleino nata a khih chheipâh zy chhaota:

25 Kibia zy, Ramah zy, Berô zy,

26 Mizpeh zy, Kephirah zy, Môzah zy,

27 Reke zy, Iripel. zy, Taralah zy,

28 Zela zy, Helepha zy, Zebu (cha cha Zerusale a châ) zy, Kiria­ziari zy, Kibia zy a châ, khihpi miahrawhleipalih nata a khih chheipâh zy chhaota; cha cha Benzami pathlazy ama chhôhkha yzie lymâ hawhta ama tovyuh raopa cha a châ.

  
Scroll to see more.