Zawsua 17

Studie

          |

1 Manase pathlazy tovyuh cha hezy he a châ, ano cha Zawsi saw pih tuapa châ ta. Kilia paw Manase saw pih tuapa Makhia deikua cha adyuhpa chyhsa a châpa vâta Kilia nata Basana râh cha hnei ta."

2 Chatawhcha tovyuh cha Manase pathla hropa zydua chata ama chhôhkha yzie lymâ hawhta a châ, Abiaza pathlazy châta zy, Heleka pathlazy châta zy, Asriel pathlazy châta zy, Sheke pathlazy châta zy, Hepha pathlazy châta zy, Shemida pathlazy châta zy, chazy cha ama chhôhkha yzie lymâ hawhta Zawsi sawchapawpa Manase pathla chapaw zy cha ama châ.

3 Manase saw Makhia, cha saw Kilia, cha saw Hepha, cha saw Zelôpheha deikua chata sawchapaw hnei leipa ta sawchanô sai a hnei; cha a sawchanô moh zy cha: Mahlah zy, Naw zy, Hôklah zy, Milka zy, Tizah zy ama châ.

4 Theihthaipa Eliaza hmiakô liata nata Nuna sawchapawpa Zawsua hmiakô liata nata chhihthatuhpa sahlaozy hmiakô liata vawh ei ta, “Eima unawhpa zy hry liana heta tovyuh maniah pie hra awpa ta ABEIPA ta Mawsi kha bie a pie,” tahpa ta reih ei ta. Chatanachata ABEIPA ta bie a piepa hawhta ama paw unawhpa zy hry liana chata tovyuh pie haw hra ta.

5 Chatawhcha Zawdâh haosâ lâtahpa, Kilia nata Basana râh rei leipa ta Manase tovyuh ta su hrawh tlu ta;

6 Manase sawchanô zy chata a sawchapaw zy hry liata tovyuh ama hnei hrapa vâta a châ. Chatawhcha Kilia râh cha Manase sawchapaw hropa zy ta to ei ta.

7 Manase râhri cha Sekhe nochhi lâta a ypa Asera tawhta Miamethah taihta a châ: Chatawhcha râhri cha chachâh lâchhâh ta Entapua chyhsa zy yna taihta sie ta.

8 Tapua râh cha Manase eih châ ta. Manase râhri daih lâ Tapua deikua cha Ephrai pathlazy eih a châ.

9 Chatawhcha râhri cha Kana vatie lâta, chavah zy chho lâchhâh ta chô ta, cha khihpi zy cha Manase khihpi zy hry liatahpa Ephrai eih a châ. Chatawhcha Manase râhri cha chavah zy maw lâchhâh ta châ ta, chatawhcha tilaipi liata pua ta;

10 chho lâchhâh cha Ephrai eih a châ, maw lâchhâh cha Manase eih châ ta, tilaipi cha a râhri a châ; maw lâna chata Asera taihta châ ta, chho lâna chata Iskara taihta a châ.

11 Iskara nata Asera râh liana chata Manase ta Besia nata a chheipâh khih zy, Iblia nata a chheipâh khih zy, Dôra liata a ypa zy nata a chheipâh khihzy, Enadô liata a ypa zy nata a chheipâh khih zy, Tanakha liata a ypa zy nata a chheipâh khih zy, Mekidô liata a ypa zy nata a chheipâh khih zy, tlâh khih a sâhpa miathôh zy cha hnei ta.

12 Châhrasala Manase pathlazy chata cha khihpi zy liata a ypa zy cha papua thei leipa ei ta; Kana mozy cha cha râh liana chata ama y thlâh haw.

13 Châhrasala Izarel pathlazy cha ama tha a vaw tlô via rili nona chata Kana mozy cha raihriatuhpa ta paysa ei ta, papua khao veih ei.

14 Zawsi pathlazy ta Zawsua hnohta, “Kheihtazie ta tlyma ryu to awpa tovyuh su kha, tovyuh miakha deita maniah na pie tly, eima hluh thlâ bao nahta, ABEIPA hra ta atahmâ taihta byhnâ maniah a pie thlâh bao nah ta?” tahpa ta reih ei ta.

15 Zawsua ta ama hnohta, “Nama hluh thlâh ha hleikhô cha, Periza mozy, Rephai mozy râh râhmahpa zy khih nama y nawpa ta tao teh u, Ephrai tlâh râh he nama châta a bua tu tlôh khiahta cha,” tah ta.

16 Zawsi pathlazy chata, “Tlâh râh he eima châta a daih vei; bypi râh liata Kana mo a pahrâpa zydua Besia nata a khihpi liata a ypa zy nata Zezrel saikao liata a ypa zy heta thua talaili hnei chyu ei ta,” tah ei ta.

17 chatawhcha Zawsua ta Zawsi chhôhkha zy, Ephrai nata Manase pathlazy hnohna chata, “Hluh kaw eichi ta, nama thatlô hra ta; chatanachata tovyuh miakha deita la hnei aw veih eichi,

18 tlâh râh khih nâmo châta châ la vâ, râh râhhmâhpa hmah ta châ sala, pathaih aw eichi ta, a râh rakha zydua cha nâmo eih a châ aw, Kana mozy chata thua talaili zy hneipa ta ama tha tlô kaw hrasala nama papua aw,” tahpa ta reih ta.

Scroll to see more.