Zawsua 13

Studie

         |

1 Zawsua vaw machâ ta, pawpi kaw ha ta; ABEIPA chata a hnohta, “Machâ ha chi ta, pawpi kaw ha chi ta, râh hra cha la awpa hluh kaw tlô ta.

2 He râhzy he na la mâh leipa cha a châ, Philistina râh zydua nata Kesuri mo râh zydua cha,

3 Izi râh kiapâh liata a ypa sahlao tawhta maw lâchhâh ta, Ekraw râhri taita (cha cha Kana mozy râh ta pachâpa a châ); Philistina mo abei papangawh, Kaza mozy, Asadô mozy, Askelaw mozy, Kiti mozy nata Ekraw mozy cha, chho lâta Avima mo râh chhao,

4 Kana mozy râh zydua nata Sidaw mozy râh liata Merah Amawri mo râhri Aphe khih taihta,

5 chatawhcha Kebal mozy râh nata nohchhina lâ Lebanaw râh zydua Hamaw Tlâh ry Baalkada tawhta Hama khih a ngiana taihta,

6 Lebanaw tawhta Misrephôthama su taihta, tlâh râh liata a pahrâpa zydua Sidaw mo zydua cha âmo cha Izarel pathlazy hmiakô liana heta papua aw na ta; bie ei cha piepa hawhna khata Izarel sahlao zy ryuto ta taopa mah y.

7 Chatanachata he râh he pho chaki nata Manase pho khophie zy ryuto ta pachhaih mah y,” tah ta.

8 Manase pho khophie nata Rubena mozy nata Kada mozy chata Zawdâh nochhi lâchhâh liana chata ama tovyu awpa Mawsi ta a piepa cha vaw hnei haw ei ta, ABEIPA chakaotuhpa Mawsi tlai ta a vaw pie hawpa hawhna khata:

9 Arnaw saikao liata a ypa Arôera khih tawhta nata saikao liah liahta khihpi liata nata Medebah bypi râh zydua Dibô taihta;

10 Amawri mo beipa Sihaw, Hesbaw liata abei ta a ypa khihpi zydua Amawna pathlazy râhri taihta;

11 Kilia râh nata Kesuri mo nata Maakah mo râhri rakha nata Hamaw Tlâh zydua nata Basana râh zydua Salekah khih taih ta.

12 Astarô nata Edrei khih liata abei ta a ypa Basana râh nata Ôka râh zydua chhaota, (chazy cha Rephai mo a y chhôpa zy ama châ); cha sahlao cha Mawsi ta siehnao ta, a papua haw.

13 Anodeikuacha Kesuri mozy nata Maakah mozy cha Izarel pathlazy chata papua veih ei; Kesuri mo nata Maakah mo cha he noh taih heta Izarel sahlaozy hry liata tlao ama y.

14 Livai phozy deita ryuto awpa a pie leipa ama châ; a hnohta a vaw rei hawpa hawhna khata ABEIPA Izarel zy Khazohpa chata mei ta hlâpa zy ta ama ryuto tlao châ tlôh ta.

15 Chatawhcha Rubena pathlazy pho cha ama chhôhkha yzie lymâ hawhta, Mawsi ta râh vaw pie haw ta.

16 Chatawhcha ama râhri cha Arnaw saikao kiah liata a ypa zy Arôera khih tawhta saikao lialiah liata khihpi nata Medebah bypi râh zydua;

17 Hesbaw nata cha bypi râh liata khihpi zydua; Dibô zy, Bamôbaal zy, Bebalmeôna zy,

18 Zaha khih zy, Kedemô zy, Mephata zy.

19 Kiriathai zy, Shibamah zy, saikao tlâh liata Zeresaha zy,

20 Bepeôr zy, Piska baihkhaihpa zy, Bezeshimô zy,

21 bypi râh khihpi zydua zy, Hesbaw liata ryu a reipa Amawri mozy, abei ta a ypa Evi zy, Rekema zy, Zure zy, Hura zy, Reba zy, ama yna râh chhaota Mawsi ta a vaw pahleipadia hawpa zy chhao khata a châ, Sihaw beizy ta cha râh cha ama pahrâ.

22 Beôra sawchapawpa Balama pachao thaipa chhao Izarel pathlazy ta mo hropa ama thiepa zy hry liana chata zaozi ta thie pâ hra ei ta.

23 Chatawhcha Rubena pathlazy râh cha Zawdâh nata a ngiakâh zydua cha a châ. He râh nata khihpi zy nata khih zy he Rubena pathlazy chata ama chhôhkha yzie lymâ hawhta ryuto ta ama raopa cha a châ.

24 Mawsi ta Kada chi Kada pathlazy cha ama chhôhkha yzie lymâ hawhta râh pie ta

25 Ama râhri cha Zaza khih nata Kilia râh khihpi zydua nata Amawna pathlazy rah khophie, Rabah khih daih lâta a ypa Arôera taih ta.

26 Hesbaw tawhta Ramamizeh nata Betôni taih ta, Mahandi tawhta Debi râhri taihta,

27 saikao liana chata Behara zy, Benirah zy, Sukô zy, Zaphôna zy, Hesbaw abeipa Sihaw râh hropa zy, Zawdâh nata a ngiakâh zy, Zawdâh haosâ nochhi lâchhâh ta Chinere Tipo chhâna taihta a châ.

28 Hezy he Kada pathlazy chata ama chhôhkha lymâ hawhta ama ryuto ta raopa cha a khihpi zy nata khihzy cha a châ.

29 Mawsi ta Manase pho khophie zy cha râh pie ta, Manase chi khophie zy chata aama chhôhkha yzie lymâ hawhta a pie.

30 Ama râhri cha Mahanai tawhta Basana râh zydua, Basana râh abeipa Ôka râh zydua nata Basana râh liata Zaira khihpi zydua chhaota, cha cha khih sycharu a châ;

31 Kilia râh khophie nata Basana râh abeipa Ôka râh liata Astarô zy, Edrei zy chhaota, chazy cha Manase sawchapawpa Makhia pathla, Makhia pathla khophie zy chata ama chhôhkha yzie lymâ hawhta raopa a châ."

32 He Môaba bypi Zerikô dady Zawdâh haosâ nochhi lâchhâh zy he Mawsi ta ama ryuto châta a pachhaihpa cha a châ.

33 Livai chizy deikua cha Mawsi ta ryuto awpa pie vei; ama hnohta a vaw rei hawpa hawhta ABEIPA ta Izarel pathlazy Khazohpa cha ama ryuto tlao a châ.

  
Scroll to see more.