Zawsua 11

Studie

          |

1 Hazaw khih abei Zabi ta cha cha a thei nahta, Madô khih abei Zôbaba zy, Shimrôma khih abei zy, Aksha khih abei zy,

2 maw lâ tlâh râh abei sahlao zy, Chinerô chho lâta Arabah abei zy, bypi râh abei zy, notla lâchhâh ta Daw khih tlâh sâhpa abei zy,

3 nochhi lâ nata notla lâta a ypa Kana mo zy, tlâh râh liata a ypa Amawri mo zy, Periza mo zy, Zebu mo zy, Mizpah tlâh ry liata a ypa Hivi mo lâta chyhsa tuah ta.

4 Chatawhcha ama pheisaih sahlao zydua chhaota chyhsa hluhpi ama hluhna zie cha tilaipi kiah liata leisadi zie tlai, arâ nata talaili hluhpi chhaota a thao ei ta.

5 Cha abei sahlao zydua cha atyhpakhy ei ta, Izarel sahlao zy cha adyuh a chhuahpa ta Merô tizy liana chata a riepakhy ei ta.

6 ABEIPA ta Zawsua hnohta, “Âmo chi khâ, mylâ atahmâ tina heta âmo sahlao cha thie chiehpa ta Izarel zy ei vaw pie aw; ama arâ chazawzy chhaw pa aw chi ta, ama talailih zy cha mei ta na rao pa aw,” tah ta.

7 Chatanachata Zawsua nata adyuhpa chyhsa zydua cha Merô tizy lâna chata sôkha ta pua ei ta, adyuh ei ta.

8 Chatawhcha ABEIPA ta âmo cha Izarel zy ku liata pie ta, adyuh ei ta, Sidaw Rôhnahpa taihta zy, Mirephôthami taihta zy, nochhi lâchhâh ta Mizpah saikao taih zy ta a chadai ei ta; pakha hmah pahlôh leipa ta thie khai ei ta.

9 ABEIPA ta bie a piepa hawhta Zawsua chata ama chô liata tao ta; ama arâ chazawzy chhawh pa ta, ama talaili zy mei ta rao pa ta.

10 Cha nona chata Zawsua cha kua heih ta, Hazaw khih cha la ta, ama abei zaozi ta thie ta; cha hlâta cha Hazaw cha cha chheipâh liata râh zydua hry liata khihpi chaipa a châ.

11 Cha khih liata a ypa zydua cha zaozi ta thie khai ta, pamo khai ei ta; a hrohpa maih cha pakha hmah pahlôh veih ei, chatanachata Hazaw cha mei ta rao haw ta.

12 Cha abei sahlao khihpi zydua nata ama abei zydua cha Zawsua ta patu khai ta, zaozi ta chhawhsaopa ta thie ta, pamo khai ha ta, ABEIPA chakaotuhpa Mawsi ta bie a piepa hawhna khata.

13 Tlâh byuhpa liata khihpi padua chiehpa zy deikua cha Hazaw dei leipa ta cha Izarel sahlao zy chata miakha hma mei ta rao veih ei; cha khih deikua cha Zawsua ta mei ta a rao.

14 Cha khihpi zy liata ama hraona zydua nata sahroh zy cha Izarel pathlazy chata âmo hraona chata â la ei ta; chyhsa deikua cha ama pahleipadia khai hlâlei cha zaozi ta thie lymâ ei ta, a hrohpa maih cha pahlôh veih ei.

15 ABEIPA ta a chakaotuhpa Mawsi bie a piepa hawhta, Mawsi chhaota Zawsua cha bie pie hra ta, cha hawhna chata Zawsua ta tao lymâ ta; ABEIPA ta Mawsi bie a piepa zydua cha a tao leipa rai y vei.

16 Chatanachata Zawsua ta cha râh zydua, tlâh râh zy, Neke râh zydua zy, Kôse râh zydua zy, bypi râh zy, Arabah zy, Izarel sahlao tlâh râh zy, ama bypi râh zy chhaota la khai ta.

17 Seira Tlâh a kaw dytuhpa Halaka Tlâh tawhta Hamaw Tlâh ry liata Lebanaw saikao liata Baalkada taih ta. Ama abei zydua zy cha patu ta, tusao ta, thie ta.

18 Zawsua ta cha abei sahlao zydua cha bohpi âdyuh.

19 Kibia liata a ypa Hivi mozy dei leipa ta cha, Izarel sahlao zy nata aryhna a taopa khih rai y veih ei; adyuhpa ta ama lapa sai a châ.

20 ABEIPA ta Mawsi bie a piepa hawhta pamo khaipa ta, khokheina hnei chachei leipa ta a pahleipadia thei nawpa ta ama pathipalôh kuh pachhasapa ta Izarel sahlao padyuhsatuhpa cha ABEIPA châ tlôh ta.

21 Cha nona chata Zawsua cha sie ta, tlâh râh tawhta zy, Hebraw tawhta zy, Debi tawhta zy, Anaba tawhta zy, Zudah tlâh râh zydua tawhta zy, Izarel tlâh râh zydua tawhta zy ta, Anaki mo cha pamo khai ta; Zawsua chata âmo nata ama khihpi zy chhaota pahleipadia khai ta.

22 Izarel pathlazy râh liana chata Anaki mo cha pakha hmah y veih ei; Kaza khih liata zy, Katha khih liata zy, Asadô khih liata zy deikua cha ama y.

23 Chatanachata ABEIPA ta Mawsi hnohta a reipa zydua hawhna khata Zawsua chata râh zydua la haw ta; Zawsua chata Izarel sahlao cha âmo pho a pachhaihna yzie lymâ hawhta ama ryuto châta pie chyu ta. Chatanachata râh cha a dyuhna paipa ta thlalôhpa ta y haw ta.

  
Scroll to see more.