Zawhana 8

Study

         

1 Zisu deikua cha Ôli Tlâh lâta tlao sie ta.

2 My ta Khazohpa achhyna-o liata a ngia heih ta, chyhsa zydua ano lâta a vy ei ta; ano cha a tyuh ta, âmo pachu ta.

3 Ryhpa pachutuhpazy nata Pharisaizy ta chanô pakha a phei hai nota ama patupa a vaw chhi ei ta, a lialiah liata paduasa ei ta.

4 Zisu hnohta, “Pachutuhpa y, he chanô he a phei hai nota patupa a châ, a phei hai no tlaita.

5 Ryhpa châbu liata Mawsi ta he hawhpa chyhsa he alô ta vawhsao awpa bie maniah pie ta; nâma ta kheihta na pachâ?” tah ei ta.

6 Cha bie cha ano pasia nawpa ta tao ei ta, ano leih-na awpa ta ama hmô thei nawpa ta. Chatanachata Zisu a bôh ta, a kudy ta alei liata roh ta.

7 Ama hiahri ngâpa vâta ano cha thyu ta ama hnohta, “Nama hryta molei a hnei leipa maihta ano cha alô ta vawh tua mawh sy,” tah ta.

8 Chatawhcha a bôh heih ta, a kudy ta alei liata roh heih ta.

9 Âmo chata a bie reipa cha ama thei nahta, machâ chaipa tawhta pua pathao ei ta, a chhâna taihta pakha pakha ta pua lymâ ei ta; chatanachata Zisu deita y ha ta, chanô a lialiah liata a yna ualua liata a ypa chhao khata.

10 Zisu thyu ta a hnohta, “Chanô, khataih lâ ama y khai haw, ahyhma ta thai lei ama cha pachâsa tlâ ma?” tah ta.

11 Ano chata, “Abeipa y, ahyhma ta thai lei na pachâsa veih ei,” tah ta. Zisu ta, “Kei chhaota thai lei cha pachâsa va na, sie la, atahmâ tawhta molei khao kha y,” tah ta.

12 Zisu ta ama hnohta bie reih heih ta, “Kei, khizaw khaihpa ei châ; ahyrai nâ zipa cha a zohna liata charei cheita leipa aw ta, hrona khaihpa tlao a hnei aw,” tah ta.

13 Pharisaizy ta a hnohta, “Nâma bie a pahnosapa na châ, na bie pahnosapa a do vei,” tah ei ta.

14 Zisu ta ama hnohta, “Keima bie a pahnosa hra aw sala ei bie pahnosapa a do, kei ta ei vaw puana nata ei siena awpa ei pahno na, nâmo la ei vaw puana nata ei siena awpa chhao pahno veih eichi.

15 Nâmo ta sapa hawhta nama sei tyh, kei la ahyhma sei va na.

16 Sei hra aw sala, ei seina a do aw, keima deita châ leipa na ta, kei nata Paw nâ tuahtuhpa tlao châ tlôh pi ta.

17 Nama ryhpa châbu liata chhao, chyhsa pano bie a do tahpa ropa a châ hra mâ tâh;

18 kei he keima bie pahnosatuhpa ei châ, Paw nâ tuahtuhpa chata ei bie a pahnosa hra,” tah ta a chhy ta.

19 Âmo chata a hnohta, “Na Paw khataih liata a y?” tah ei ta. Zisu ta, “Nâmo ta kei na pahno veih eichi, ei Paw chhao pahno veih eichi; eina pahno khiah eichi ta la, ei Paw chhao nama pahno aw,” tahpa ta a chhy ta.

20 Cha biezy cha Khazohpa achhyna-o liata a pachu nota thyuna sona su liata reih ta; ahyhma ta ano patu veih ei, a daihti a tlô mâh leipa vâta.

21 Ano chata ama hnohta, “Ei sie aw hih, nâmo ta na tlua aw eichi ta, nama moleina hnei thlâh hapa ta nama thi aw; ei siena awpa lâ a vy thei aw veih eichi,” tah heih ta.

22 Zuzy ta, “‘Ei siena awpa lâ a vy thei aw veih eichi,’ a tahpa he, a thi aw tlyma?” tah ei ta.

23 Ano chata ama hnohta, “Nâmo a ry lâta a puapa nama châ, kei la a chô lâta a puapa ei châ; nâmo he khizaw liata a puapa nama châ, kei la he khizaw liata a puapa he châ va na.

24 Chavâta nama hnohta nâmo moleina hnei thlâh hapa ta nama thi aw, ei tahpa kha, ano cha ei châ tahpa namâ ngiapâ vei khiahtala, nama moleipa hnei thlâh hapa ta nama thi aw,” tah ta.

25 Âmo chata a hnohta, “Ahyma na châ?” tah ei ta. Zisu ta ama hnohta, “A thaota tawhta nama hnohta ei reih tyhpa kha.

26 Nâmo kyh liana heta hmo hluhpi reih awpa nata pachia awpa ei hnei; khâparai châ sala nâ tuahtuhpa cha a dopa a châ, ano tawhta bie ei theipa maih khizaw hnohta ei chho hih,” tah ta.

27 Paw thâtih ama hnohta a reih tahpa pahno veih ei.

28 Chatanachata Zisu ta, “Nâmo ta Chyhsa Sawchapawpa he nama chaluah tawhta, ano cha ei châ tahpa nata kei ta kei reih ta hmo khâpahma tao leipa na ta, Paw eina chhopa lymâ hawhta he biezy he tlao ei reipa a châ tahpa nama vaw pahno aw.

29 Nâ tuahtuhpa cha ei hnohta y ta; na pathlua vei, a hmo kho viapa maih ei tao tyhpa vâta,” tah ta.

30 Cha biezy cha a rei hai nota chyhsa hluhpi ta ano cha a ngiapâ haw ei ta.

31 Zisu ta ngiapâtuhpa Zuzy hnohna chata, “Ei bie liata nama y thlâh ha khiahtala, ei pachupazy nama châ hmeiseih aw,

32 bie hmeiseihpa pahno aw ei chi ta, bie hmeiseihpa chata kho ta a cha palaisa aw ei,” tah ta.

33 Âmo chata a hnohta, “Abaraha pathlazy eima châ mâ tâh, atahmâ taihta ahy sei ta hmahta y beih ma pi, “Kho ta a cha palaisa aw ei,’ kheihtazie ta a tahpa ma na châ?” tahpa ta a chhy ei ta.

34 Zisu ta ama hnohta, “Hmeiseihta ta, hmeiseihta ta, ei cha chho ei chuh, ahyrai hmo a paraopa maih moleina sei a châ.

35 Sei cha chhâzaw ta o liata y thlâh ha vei; Sawchapawpa deikua cha chhâzaw ta a y thlâh ha tyh.

36 Sawchapawpa ta kho ta a cha palaisa khiahtala, khotalaipa nama châ hmeiseih aw.

37 Abaraha pathlazy nama châpa ei pahno na; châ hra ula thie nâ chhuah eichi, ei bie ta nama palôhrupa liata yna a hnei leipa vâta.

38 Kei ta ei Paw tawhta hmo ei hmôpa cha ei reih tyh, nâmo chhaota nama Paw tawhta hmo nama theipa cha tao tyh eichi ta,” tah ta.

39 Âmo chata a hnohta, “Eima paw Abaraha a châ,” tahpa ta a chhy ei ta. Zisu ta ama hnohta, “Abaraha sawzy nama châ khiahtala, Abaraha hmo nama tao aw,

40 châhrasala atahmâ thie nâ chhuah tlôh ei chi, Khazohpa tawhta bie hmeiseihpa ei pahnopa cha chhotuhpa ei châ mâ tâh; Abaraha ta he hawhna heta tah vei.

41 Nâmo deikua cha nama paw hmo cha nama tao tyh,” tah ta. Chatawhcha âmo chata a hnohta, “Apheipa ta sapa châ ma pi; Paw pakha deita eima hnei, Khazohpa tlai cha,” tah ei ta.

42 Zisu ta ama hnohta, “Khazohpa nama Paw a châ khiahtala ei kyh eina pachâ aw ei chi, Khazohpa tawhta a puapa nata ano tawhta a vypa châ tlôh na ta; keima rei ta a vypa châ va na, ano ta eina tuapa tlao a châ.

43 Khazia ei reizie nama pahno vei? Ei bie nama pahno thei leipa vâta.

44 Nâmo cha nama paw ahripa tawhta a puapa châ ei chi ta, nama paw khopa nama tao khoh. Ano cha a thao tawhta lianycheipa a châ, bie hmeiseihpa liata y vei, a chhôh liata bie hmeiseihpa rai a y leipa vâta. Haipa bie a rei nata ano tao chhypa reipa a châ tyh, haiphiapa châ tlôh ta, haipa paw chhao a châ.

45 Bie hmeiseihpa ei reipa vâta nâmo ta nâ ngiapâ veih ei chi.

46 Nama hry liata ahyma moleina kyh liata thai lei na pachâsa thei awpa a y? Bie hmeiseihpa ei reipa a châ khiahtala nâmo ta khazia einâ ngiapâ veih ei chi?

47 Khazohpa tawhta a puapa chata Khazohpa bie a zyh tyh; he vâna heta nama zyh vei, Khazohpa tawhta a puapa nama châ leipa vâta,” tah ta.

48 Zuzy chata a hnohta, “Samari chyhsa ahripa azopa na châ, eima tahpa kha pado kaw ma pi ma?” tah ei ta a chhy ei ta.

49 Zisu ta, “Ahripa azopa châ va na; ei Paw ei palyupalihpa tlao a châ. Nâmo ta ei moh nama pachhiepa he.

50 Châhrasala keima palyupalihna a tluapa châ va na, a tuahtuhpa nata pachiatuhpa Pakha a y.

51 Hmeiseihta ta, hmeiseihta ta, ei cha chho ei chuh, chyhsa ta ei bie a zyh khiahtala chhâzaw ta thi hmia hmô aw vei,” tah ta.

52 Zuzy ta a hnohta, “Ahripa azopa na châ tahpa atahmâ eima pahno haw. Abaraha a thi haw, hrohsopazy chhao; nâma ta, ‘Chyhsa ta ei bie a zyh khiahtala chhâzaw ta thina padi aw vei,’ tah tlôh chi ta.

53 Eima pathlatuhpa Abaraha hlâta na rônah via ma? Ano chhao a thi haw! Hrohsopazy chhao ama thi haw! Ahy ta ma nâ reih?” tah ei ta.

54 Zisu ta, “Keima a palyupalih aw sala, ei palyupalihna khâpa ta hmah châ vei; eima Khazohpa nama tahpa ei Paw cha na palyupalihtuhpa a châ.

55 Nâmo ta ano pahno tlôh eichi va. Kei deikua chata ano ei pahno, ano pahno va na tah aw sala, nâmo hawhta a haipa ei châ hra aw; kei deikua cha ano pahno na ta, a bie chhao ei ngiah tyh.

56 Nama pathlatuhpa Abaraha kha ei no a hmô awpa a châpa vâta a tha a pha ngaita tyh; chatawhcha hmô tlaita a ly kaw ta,” tah ta a chhy ta.

57 Zuzy chata a hnohta, “Nâ kô sypangawh chhao a châ leipa chi, Abaraha na hmô mâ?” tah ei ta.

58 Zisu ta ama hnohta, “Hmeiseihta ta, hmeiseihta ta, ei cha chho ei chuh, Abaraha y hlâ chhaota ei y,” tah ta.

59 Chatanachata a vaw nawpa ta alô a huah ei ta; châhrasala Zisu a nyu ta, Khazohpa achhyna-o tawhtapa cha pua ha ta.;