Zawhana 21

Study

         

1 Cha hnôh lâna chata Taibiria Tipo liata Zisu a pachupazy hnohta a luah heih ta; he tana heta â luah.

2 Saimaw Pity zy, Thawma Maphi ama tahpa zy, Kalili râh liata Kena khihpa Nathanael zy, Zebadi sawchapawpa pano zy, a pachupa hropa pano chhaota hmaokha ta y ei ta.

3 Saimaw Pity chata ama hnohta, “Nga patu awpa ta ei sie aw,” tah ta. Âmo chata a hnohta, “Keimo chhao na hnohta eima sie hra aw,” tah ei ta. Chatawhcha sie ei ta, balyh liata kiah ei ta, cha zâ liana chata khâpahma patu veih ei.

4 Chatawhcha khih pavâ chyta, Zisu raphyu liata a duah ta; châhrasala pachupazy chata Zisu a châ tahpa pahno tlôh ei va.

5 Zisu ta ama hnohta, “Ei nawhta saih u, niepa khâpaleipa nama hnei ma?” tah ta. Âmo chata a hnohta, “Hnei ma pi,” tah ei ta a chhy ei ta.

6 Ano chata ama hnohta, “Balyh kâ lâ chachâh lâna khata sao vawh ula, nama hmô aw,” tah ta. Chatawhcha vawh ei ta, nga a hluh ngaitapa vâta a daophi thei khao leipa ei ta.

7 ‘Pachupa Zisu ta a kyh a pachâpa khata Pity hnohta, “Abeipa a châ hao!” tah ta. Abeipa a châ tahpa Saimaw Pity ta a theipa ta nahta, a poh a sai ta, thluahruapa ta a ypa châ tlôh ta, tipo liata a zaw pathlah ta.

8 Châhrasala pachupa hropazy chata balyh chyhpa ta ta sao nga chhaota a daophipa ta vaw pangai ei ta, ngiakâh tawhta â hla tlôh lei khâh ei ta, dy za no tlyma deita châ ta.

9 Chatawhcha ngiakâh ama puapa ta nahta, cha liana chata meihei ta mei patipa hmô ei ta, a chô liata ngasa nata viahchhâ raopa chhaota.

10 Zisu ta ama hnohta, “Atahmâ nga nama patupa kha vaw cheih bâ teh u,” tah ta.

11 Saimaw Pity kiah ta sao cha nga laipapi ta a biepa ta ngiakâ lâ a daophi ta, za kha nata sypangawh nata miathôh a châ; cha tlatluta y hrasala, sao cha a hrie vei.

12 Zisu ta ama hnohta. “My pati vaw nie teh u,” tah ta. Chatawhcha pachupazy hry liata ahyhma ta, “Ahyma na châ?” tahpa ta hiahri ngâh veih ei. Abeipa a châ tahpa pahno thlâh ha ei ta.

13 Chatawhcha Zisu a vy ta, viahchhâ cha la ta, ama hnohta pie ta, ngazy chhao cha cha hawhna chata pie hra ta.

14 Cha cha Zisu athihpa hry tawhta a thyu heih tawhta pachupazy hnohta a luahna ei thôhna a châ.

15 My pati ama nie khai nahta Zisu ta Saimaw Pity hnohna chata, “Saimaw, Zawhana sawchapawpa, hezy hlâna heta nâ ta ei kyh eina pachâ via chi ma?” tah ta. Ano chata a hnohta, “Y, Abeipa y; na kyh ei cha pachâ tahpa na pahno na,” tah ta. Ano chata a hnohta, “Ei mietahkupa tawzy pasa teh,” tah ta.

16 A ei nona ta a hnohta, “Saimaw, Zawhana sawchapawpa, nâ ta ei kyh eina pachâ chi ma?” tah heih ta. Ano chata a hnohta, “Y, na kyh ei cha pachâpa na pahno na,” tah heih ta. Ano chata a hnohta, “Ei mietahkupazy mohôh teh,” tah ta.

17 A ei thôhna liana chata a hnohta, “Saimaw, Zawhana sawchapawpa, nâ ta ei kyh eina pachâ chi ma?” tah ta. Chatawhcha a ei thôhna liata, “Nâ ta ei kyh eina pachâ chi ma?” a tahpa vâna chata, Pity a pachârôh ta, a hnohta, “Abeipa y, ato pahno chi ta; na kyh ei cha pachâpa na pahno na,” tah ta. Zisu ta a hnohta, “Ei mietahkupazy pasa teh.

18 Hmeiseihta ta, hmeiseihta ta, ei cha chho, na hawti nona khata na chai a saih chi ta, na khona lâ maihta sie tyh chi ta; châhrasala na machâ tita na kuzy pazawh aw chi ta, mo hropa ta na chai châ sai aw ei ta, na kho leina lâta am châ daophi aw,” tah ta.

19 Cha biezy cha kheihtazie ta thipa ta ma Khazohpa a palyupalih aw tahpa pahnosana a reih. Cha cha a rei khai nahta a hnohta, “Na zi teh,” tah ta.

20 Pity cha a heih ta, Zisu ta pachupa kyh a pachâpa zâ pati nie nota a chachôhna a hniepa ta a vaw heihpa ta, “Cha patusatuh awpa cha ahyma a châ?” a tahtuhpa khata a vaw zipa hmô ta.

21 Pity ta ano cha hmô ta, Zisu hnohta, “Abeipa, he chyhsa he kheihta ma a châ aw?” tah ta.

22 Zisu ta a hnohta, “Ei vy heihna taihta a y thlâh ha awpa chhochhi khoh aw sala, cha cha khâpa ma a cha châpa aw? Nâ ta na zi thlâh ha teh!” tah ta.

23 Cha pachupa cha thi lei awpa ta a bie cha unawhzy hry liana chata pathâh ha ta; châhrasala Zisu ta thi aw vei tahpa a hnohta reih tlôh va, “Ei vy heina taihta a y awpa chhochhi khoh aw sala, cha cha khâpa a cha châpa aw?” a tahpa châ tlôh ta.

24 Cha pachupa cha he biezy pahnosatuhpa nata rohtuhpa he a châ; a bie pahnosapa he â do ngaitapa a châ tahpa eima pahno na.

25 Chatawhcha hezy leipa heta Zisu hmotaopa hropa hluhpi a y; chazy cha ro khaipa châ sala châbu ro awpa zydua cha khizaw liana chhao heta a tlôpa ta pangiasa va na.;