Zawba 42

Studie

  

1 Chatawhcha Zawba chata ABEIPA cha a chhy ta:

2 “Ato na tao thei tahpa ei pahno, nâ chhuahna pakhâ theipa khâpa hmah y vei.

3 ‘Ahyma ei châ, novâhna hnei leipa ta chhosiena a nyutuhpa na he?’ Chavâta mah â, ei pahno leipa zy ei reih papua, hmo ei pahno thai leipa cha kei châ noâh â chhih tu ha na.

4 ‘Nahthlie la, ei vaw reih tua aw na; bie cha hiahri tua aw na ta, nâ chhy mah y,’ tahpa ta.

5 Nahkhao theina ta cha cha thei ha na ta, châhrasala atahmâ la ei mo ta ei cha hmô haw;

6 chavâta a pasi na ta, buchadoh nata dolei liata atyuhpa ta ei rôh ha na!” tah ta.

7 ABEIPA ta Zawba ota bie a rei khai tawhna chata, ABEIPA chata Temani chyhsa Elipha hnohna chata; “Na chô liata nata na viasa pano penawh chô liana khata ei hie a hâh ngâsâ; ei chakaotuhpa Zawba hawhta ei thâtih â dopa ta reih tlôh leipa eichi ta.

8 Chavâta atahmâ viahchao tôhpa pô sari nata mietahkupa tôhpa pô sari a cheipa ta, ei chakaotuhpa Zawba lâta vawh ula, nâmo châta raopa hlâna kei hlâ teh u; chatanachata ei chakaotuhpa Zawba chata nâmo châta thlah cha chhâpa aw ei ta, cha cha a pyh aw na ta, nama hruna zie lymâ hawhta cha tah aw veih ei na; ei sei Zawba hawhta ei thâtih â dopa ta rei tlôh leipa eichi ta,” tah ta.

9 Chatanachata Temani chyhsa Elipha nata Shuhi chyhsa Bilda nata Naama chyhsa Zôpha zy cha vawh ei ta, ABEIPA ta bie a piepa lymâ hawhta tao ei ta; ABEIPA chata Zawba hiana cha a pyh haw ta.

10 Chatawhcha Zawba chata a viasa zy châta thlah a vaw chhâ nah chata, ABEIPA chata Zawba cha a hneirôna vaohei heih ta; ABEIPA chata Zawba cha a hmia lâta a hneipa lie no ta pie ha ta.

11 Chatawhcha a unawhpa zydua nata a sietanô zydua nata a hmia pahnopa zydua cha ano lâta a vy ei ta, a o liana cha pati zy dôh ei ta; ABEIPA ta a chôta hmopha leipa a patlôsapa zydua chô liana cha taokhei ei ta, thlah palôh ei ta; chyhsa tota ano lâta tâkârizy nata ngôh kusadi zy pie chyu ei ta.

12 Chatanachata ABEIPA chata Zawba cha a daihti hmiatuapa hlâta thata a hluh viata byhnâ pie ta; mietahkupa thy kha nata sâh palih, râraoseihpa sâh charu, viahchao tôhpa bao sâh kha nata alâ panô sâh kha hnei ta.

13 Sawchapaw pasari nata sawchanô pathôh hnei hra ta.

14 Chatawhcha a hmiatuapa moh cha Zemima bi ta; a panona moh cha Kezia; a pathôhna moh cha Kerehapu bi ta.

15 Cha râh zydua liata chhao Zawba sawchanônô zy hawhta chanô hmiphapa hmôpa y veih ei; ama paw chata ama rilâhpa zy hry liata ryu to awpa pie chyu ta.

16 Chatawhcha he hnôh lâna heta Zawba cha kô za kha nata kô sypalih hroh ta, a sawchapawpa zy, a sawchapaw sawchapawpa chhâ palihna taihta vaw hmô ta.

17 Chatanachata Zawba cha pawpi ngaitapa ta a pakhu kâh biepa ta thi ta.