Zawba 39

Studie

          |

1 “Lôkâh sathawh a patawhna daihti na pahno ma? sasu a patawhna daihti chhao na ngia ma?"

2 Ama phaona thlâpâ zy reipa ta, a patawhna daihti na pahno ma?

3 A byu ei ta, taw ama patawh, amâ zeih khai thlâh haw.

4 Ama tawzy cha ama tha vaw y pathao ta, thlai vaw laiseih ei ta, thlai peipâ pathao hra ei ta, ama panô zy lâta vaw kua hlei khao veih ei.

5 “Lyurâhpa lâ ahyma a pathlie? Lyurâhpa alâ hraina cha ahyma a pathlâ,

6 ama yna châta râhpathohpa raopa ta, ama pahrâna châta asi yna su a rao tly?

7 Khihpi tymâpa mohnao ta, pasiesatuhpa awna ao thei vei.

8 A lao tluana châta tlâhpi hmâh ta, sibiepa hrohpa hmo maihta a tlua tyh.

9 “Na châta chaoliah tôhpa cha na hmâh theipa a châ aw ma? Na sahroh o liata a rie khoh aw ma?

10 Aleipaliena chaori na pa-ao thei aw ma, na hnôh lâta aleipaliena tlâh a vaw parai thei aw ma?

11 A thatlô ngaita kawpa vâta a tha a ngiapâpa ta, na raihria awpa cha ano na thythlu khai aw ma?

12 Na sâhzy cha a sawhri bypa liata pahmaoh awpa ta, a vaw kua heih aw tahpa nâ ngiapâ ma?

13 Pavawpi mathlawzy cha a chyh kawpa châ ei ta, a mathlaw ki nata hmi cha a sôh kaw,

14 alei liata a ti a râsai ta, alei buchadoh ta a palalôhsa,

15 phei ta tlysao theipa châ ta, lyurâhpa sazy ta ama tlysao thei tahpa pachâ vei.

16 Ano taw leipa hawhta a taw chô liata a nôchhie ta; a hriapasana cha khâpa hrao leipa rai châ sala, a papeisa vei

17 Khazohpa ta sona pamysa ha ta, pahno thaina a pie leipa vâta.

18 A zaw syulyupa a chhuahnoh nona cha, arâ nata a kiahtuhpa cha a pahneisao.

19 “Arâ thatlôna he na piepa ma? A rao liata thatlôna ta na tobi ma?

20 Khawsu hawhta a chapie awpa ta ma na tao? A hnaphipa chichhih ngaitapa a châ.

21 Saikao liata a phei ta pahao ngâ ta, a tha thyu ta, adyuhna chaihraih a tyh awpa ta pua ta.

22 China rai pahno leipa ta, a palôh dua beih vei, zaozi tawhtapa a sy beih hra vei.

23 A chô liata a lava o paro ngâ ta, a sei nata li cha pathlie hôlô ta.

24 Chichhih ngâsâpa nata hiehâh ngâsâpa ta chakhao ngâ ta, chiahmie paro tawh chhao taih tlâ a duah thlâhthli vei.

25 Chiahmie a vaw paro pata nahta, ‘Khaw, khaw!’ tah ta. Adyuhna cha lâhlapi tawh chhao a roh pahno ta, Hyutuhpa zy pyury nata rahaopa cha.

26 Na sona vâta pahmô cha a zaw ta, chho lâta a mathlaw a pakai ma?

27 Pahmôpi a zawpa nata a sâpa liata bu a hneipa he na biepiepa ma a châ?

28 Lôkâhpa khua liata a tyuh ta, alô pakaoparypa liata a bu a tao.

29 Cha tawhna chata niepa sai tyh ta; a mo ta lâhlapi taih hmô thei ta.

30 A tawzy chhao thisaih sy ei ta; sawsawpa na liana cha a y tyh,” tah ta.