Zawba 27

Studie

  

1 Chatawhcha Zawba chata a biereipa pazao lymâ heih ta:

2 “Khazohpa hropa, a dona kyh liata na paphasaipa mohta chhie ei sa, Atotaotheipa, ei hrona rie patheisa nata pa bie ta,

3 keima liana heta ei hu a ki ta, ei hnapasu liata Khazohpa hu a y.

4 Ei hmao ta sia leina bie papua chachei aw vei, ei palei ta dôna bie reih hra aw vei.

5 Thai cha pachâsa beih aw veih ei na; ei thina taih chhaota ei dona cha pahlei aw va na.

6 Ei siana cha khâchâ patu aw na ta, pathlie beih aw va na; ei hro chhôhta ei palôhrupa ta na pasi aw vei.

7 “Ei khakhaipa cha hmoparaopa châ sala, na thyuhnaotuhpa cha sia leipa tlao châ se.

8 Khazohpa a pachâ leipa chata khâpa hnabeiseihna e a y, Khazohpa ta a hrona la ta, a chhawh pathla tina cha?

9 A chôta atymâna vaw tlô tina cha, Khazohpa ta a awna cha a thei aw ma?

10 Atotaotheipa chô liana cha a ly aw ma? Khazohpa cha khâpa no raita a aw aw ma?

11 Khazohpa ku ky la, ei cha pachu aw ei; Atotaotheipa liata a ypa cha phih aw va na.

12 Nâmo sasyh deita a hmô eichi ta, Kheihta zie ta e, khâpa hrao leipa nama vaw châ tly?

13 “Khazohpa hnohta hmoparaopazy tovyuh awpa cha he he a châ, Riepatheisatuhpa zy, Atotaotheipa tawhta ryuto awpa cha:

14 A sawzy ama pôh khiahta cha zaozi châta ama châ; a pathlazy ta niepa nie khi hmô aw veih ei.

15 A hnôh lâta a hro chhôhpa cha hri ta pabu aw ta, ama lahpinô zy chhaota mâchhie sa aw veih ei.

16 Tâkâri cha buchâh hawhta pahmaoh hra sala, beih lei hawhta chysia pacho hra sala;

17 a pahmaohpa cha chysa siapa ta atobina aw ta, a thaipa zy ta tâkâri cha amâ rai aw.

18 Chiariapa bu hawhta o cha sa hra sala, avaihtuhpa ta riebu a sapa hawh deita a châ aw.

19 A hneirôhpa ta a zia ta, Châhrasala thyu khao aw vei; a mo padeih aw ta; châhrasala a hneirôna cha y khao aw vei.

20 Tilaipi hawhta chichhihna ta tlô hnao ta; zâ ta khisô ta cheih ta.

21 Nochhi ziza ta phaoh ta, a lei haw; a su tawhta a chanaoh pathla haw.

22 Khazohpa ta ngiachhiena a hlao leipa ta chanaoh ta; a hmotaotheina tawhta a phaoh pahai lymâ aw.

23 A ku chabai chie aw ta, a su tawhta hmao tô chiepa ta a papua aw.