Zawba 24

¹ “Atotatheipa ta khazia daihti zy rao leipa ta, ano a pahnotuhpa zy ta khazia noh zy ama hmô vei?

² Chyhsa zy ta râhri zy pasie ei ta; sahroh hri patu raruah ei ta ama pasa.

³ Paw hnei leipa alâ a chadai pai ei ta; nôhmei viahchao tôhpa soka chata lapa ei ta.

⁴ Phahlapa zy lâpi patleisa ei ta; alei liata rietheipa zy nyu ei ta.

⁵ Râhpathohpa liata alâ hrâhpazy hawhta hriapasa ngaitapa ta sie ei ta, rietheipa zy ta râhpathohpa liata ama sawzy niepa ama tlua.

⁶ Ama nie awpa lyurâhpa liata pahri ei ta, moleipa kresahdô kamo ama tho.

⁷ Chysia leipa ta azozâkhihdei sasaihpa ta a zia ei ta; chasipa hryta abupa hnei veih ei.

⁸ Tlâhpi vâsua ta padâpa ta y ei ta, pahlina hnei leipa ta alôpanô a chhai ei ta,

⁹ (Paw hnei leipa sâhpi a ngiepa a chhu hmâhpa y ei ta, sipasapazy liatahpa soka la ei ta.)

¹⁰ Chysia leipa ta thluahruapa ta viavi ei ta; nodina chôta sapiazy amâ pu;

¹¹ ama ôli dôhpachhôh liana cha sathaw tao ei ta; dâhphina chôta kresawti saohna tly ei ta.

¹² Khihpi chyhsa a cha-ie ngâsâpa zy a hrô ei ta, hmahphaohpa palôh chata baona hiah ta; châhrasala Khazohpa ta âmo cha nahthlie vei.

¹³ “Hezy he khaihna a haopa châ ei ta, a lâpi zy chhao pahno hra leipa ei ta, a lâpi zy liana chhao y hra veih ei.

¹⁴ Lianycheipa cha awkho ta thyu ta, rietheipa nata phahlapazy a thie thei nawpa ta; zâ ta cha parutuhpa hawhta a châ.

¹⁵ Apheihmâhpa mokhaoh chata a zohpa hâ thlâh ha ta, Ahy hmah ta na hmô veih ei.’ Tahpa ta; hmia khuna ta a hmia pahly ta.

¹⁶ A zohna liata ozy chao pahlie ei ta; nohchhô ta a khawhlôh ei ta; khaihna rai ama pahno leipa vâta.

¹⁷ Ama zydua chata my cha thina nohpahli hawh tlaita a vaw châ; thina nohpahlih rarôypa cha ama viasa haw.

¹⁸ “Ti chô liana cha a chatlie ngâsâpa ta hmoparaopa cha phaopa châ ta; alei liana heta ama tovyuh cha chhiesapa ama châ; kresahdô lâpi lâna cha a heih vei.

¹⁹ Noh kâhna nata lalôhna ta dâhaw patisa ta; Sheol ta moleipa zy a taopa hawhna cha.

²⁰ Chhi chata my aw ta, lôpa chata pahâh ngaitapa ta nie ta, athei thlâh hapa châ khao leipa aw ta, sia leina cha tho hawhta a tlie aw.

²¹ “Chanô saw sa leipa tha cha niepa ei ta, nôhmei chata hmophapa tao veih ei.

²² Khazohpa ta a thatlôna ta thatlôpa zy hrona pasihsa ta; tlâh amâ hnabeisei khao vei tawh chhaota thyu ei ta.

²³ Khazohpa ta a bohna taopa ta, cha liana cha amâ pahâ: ama lâpi zy liana cha a mo khaih ta.

²⁴ Reithaipa châ ei ta, buakhata ta leidia ei ta, chyhsa hropa zy hawhta lopa ta, uah ei ta; sâh su hawhta tai pachhôpa ama châ.

²⁵ Cha hawhta châ vei sala, ahy e, a haih na tah thei aw ta, ei bie khâpa hrao leipa ta a reih thei aw?” tah ta.