Zawba 20

Study

          |

1 Chatawhcha Naama chyhsa Zôpha a chhy ta:

2 Ei pachâna chata châ chhypa ta nâ hnaw ta, chavâta thlai ei chhy parah.

3 Chhoreina no na pazasatuhpa cha pahno haw na ta, ei novâhna khô lâ palôhrupa ta einâ chhy.

4 Hlâno tawhtapa alei chyhsa y rakha tawhta, he hmo he pahno va chi ma?

5 Hmoparaopa thaphana cha chyu ta, khazohpa hnei leipa alyna cha movi likawh ta a châ tahpa he?

6 A rôhnahna chata avâ zy tlôpa ta, a luh ta meihdo kaw tlô ta,

7 buchadoh hawhta chhâzaw ta a leidia aw; ano a hmôpa zy chata, ‘Khataih lâ a y haw?’ ama tah aw.

8 Mâ hawh tlaita a zaw aw ta, hmôpa ta y khao vei; aluahna hawhta a chadai paipa a châ aw.

9 Ano a hmôtuhpa mo khata hmô heih khao aw vei, a su liata chhaota hmô heih khao hra aw vei.

10 A sawzy ta rietheina tawhta hmo ama lapa zy ta hmo phapa tlua aw ei ta, a kuzy ta a hneirôna a papai aw.

11 A ruzy cha thyutlia thatlôna ta bie ta, châhrasala a hnohta dolei liata a zia aw.

12 “Moleina he a pakah liata thlôh hra sala, a palei ry ta nyu hra sala,

13 pahlôhpa ta pathlie pasai leipa ta, a pakah chhôh liata tlao pa-oh thlâh ha hra sala,

14 a niepa cha a py chhôh liata a vaw nano ta, vâzi châmaih kha ngaitapa hawhta a chhôh liana cha a vaw y.

15 Hneirôna zy cha palâ ta, a palie lilaw heih; Khazohpa ta a py tawhtapa thy pathla ta.

16 Vâzi châmaih cha sy aw ta, vâzi châmaih chata a thie aw.

17 Kheihti nata sâhpiti kuapa ta a lohpa chavah zy cha; hmô awpa ta hroh leipa aw ta.

18 A hriapasana theilâpa cha pakua aw ta, aoveina châta hmâh aw vei; a lapakhypa zy tawhtapa cha lôhrâ tlôna rai hnei aw vei.

19 Sipasapa cha pasaipa-i ta a heisai ta, o a sa leipa cha chhu hra ta.

20 “A karâyna cha a chhôh liata y molo thei leipa ta, a lyna hmozy cha khâpa hmah hoh vei.

21 A nie khai leipa khâpa hmah y vei, chavâta a sôh nata piah chata tao aw vei.

22 A hneirôh lochona daihti cha a cha-iena noh a châ aw, rietheipa ta a ypa zy chata a chôta ama ku ama hy aw.

23 A py pabiena awpa ta Khazohpa ta, a pathi-iana cha a chôta a tuah aw, a nie awpa châta a chôta a sua thlu aw.

24 A thua chaihrai tawhtapa a râsai aw ta. dawh libaw chata ano a ka pahlie aw.

25 Phia ta, a sapa tawhtapa vaw pua ta, a ki di ngaitapa cha a hmôkhaw tawhta vaw pua ta, hmo chichhih ngaitapa ano chô liata a vaw tlô.

26 Zohna chha ngaitapa ta ano chata pacho ta, pakâ leipa mei chata ano kâ khai ta; a poh-o liana cha kâ leipa ta pahlôhpa y vei.

27 Avâ zy chata a sia leina phuah aw ei ta, alei chhaota ano a thyuhnao hra aw.

28 A o liata a hmo hneipa a pôhpa zy cha lei khai aw ta, Khazohpa hiehâhna noh liana cha a hmo hneipa zy ama leilô khai aw.

29 He he chyhsa hmoparaopa zy Khazohpa tawhta ama tovyuh cha a châ. ryuto awpa Khazohpa ta ama châta a raopa cha,” tah ta.