Zawba 13

Studie

         |

1 “He zydua he ei mo ta hmô haw ta, ei nahkhao ta thei ta no a vâh hra.

2 Nâmo pahnopa cha kei chhao ei pahno, kei cha nâmo hlâta nawh via va na.

3 Châhrasala Atotaotheipa hnohna chata ei reih aw, Khazohpa nata pachâ khoh awpa ei byu.

4 Nâmo deikua haipa taochhypa châ eichi ta; nama zydua ta patlâhtuhpa phahnai leipa nama châ.

5 Phie a chalih thlâh ha tlai u la; sopa nama hlao via aw!

6 Ei pachâna zie nahthlie ula, ei hiapa he rie nahthlie teh u.

7 Khazohpa chata sia lei ngaitapa ta nama rei aw ma, ano cha nama dôpakhei aw mâ?

8 Ano lâta biehneina nama pamosa aw ma, Khazohpa châta tlao namâ duakhei aw ma?

9 Cha tlua papua ei sala a pha aw ma? Cha leipa ta chyhsa ta chyhsa hropa a dôpa hawta, ano cha nama dô aw ma?

10 A ru lâta khokheina nama hnei khiahtala, a cha ra thlyu aw ei na.

11 A rôhnahna chata cha pachisa thlyu va ei ma? Chichhihna nama chôta tla aw vei ma?

12 Namâ chhypa bieso cha meipaoh dei châ ta, namâ vaihna cha a vaihna beihlei dei châ tlôh.

13 “Ei rei theina awpa ta a vaw chalih tua u, ei chô liata khâpa rai cha tlâ vaw tlô se.

14 Ei sapa he ei hâh ta sie aw na ta, ei hrona he ei ku liata ei soh aw.

15 Na thie ta; hnabeiseina rai hnei khao va na; châhrasala a hmiakô liata ei lâthlôh cha ei vaih thlâh ha aw.

16 He he ei pachhana cha châ ta, a hmiakô liata khazoh pahno leipa zy cha a vy thei aw veih ei.

17 Ei reipa he a phapata ta nahthlie ula, ei phuahpa he nama nahkhao liata a ngia mawh sy.

18 Atahmâ nahthlie teh u, ei bie paryh pasia haw na ta, thai ei châ aw tahpa ei pahno.

19 Ahy e na ei tuh awpa a y? Chatanachata a chalih aw na ta ei thi aw.

20 Ei chô liata hmo miano he na pasai la; chatanachata na hmia tawhtapa a nyu aw va na,

21 kei tawhtapa na ku la ha la, na chichhihna heta na pachisa khah se.

22 Chatanachata na aw la, ei châ chhy aw; cha leipa ta kei ta reih aw sala, tlao nâ chhy mah y.

23 Ei hmoparaona zy nata ei moleipa zy khatlu ta hluhpa e a châ? ei paraona nata ei moleina na pahnosa mah y.

24 Khazia e na khakhaipa ta, na hmia na nyu tly?

25 Chhohna a zaw ngâpa chata chapa chisa aw ta, sâhkô raopa cha nâ chadai aw ma?

26 Ei chô liata pasa ngâsâpa ta roh chi ta. ei thyutlia noh hmoparaona cha eina paphaosa chi.

27 Ei pheizy liata keihrai na daih chi ta, ei lâthlôh zydua ngia chi ta; ei pheipazah padôpa ta râhri na pakhâh.

28 Ano cha hmo hmypa hawhta tlâ zao thlâhpa hawhta nata, chysia, chhôma-u ta tlâ a niepa hawh deita ta a châ.