Zawba 10

Study

          |

1 “Ei hro he ei thlahpa chata a aina, ei palôhtlâh leina ei reih aw; palôhrupa pasa ngâsâna chôta ei reih aw hih.

2 Khazohpa hnohta thai lei na pachâsa khah y; eina pasina chi na pamosa mah y.

3 Na pasaipa-ipa ta na ku raihria mohnaopa ta, moleipa ryhraona a pakhaipa he â ryh na tah ma?

4 Sapa mokhaoh na hnei ma? Chyhsapa hmô hawhpa na hmô ma?

5 Na nohzy cha chyhsapa noh zy hawhta ma a châ. na kôzy chhao chyhsapa kô zy hawhta ma châ ta,

6 ei hmoparaona zy a laichadai chi ta, ei moleina na tlua tly,

7 moleipa châ va na tahpa na pahno. na ku tawhtapa cha pachha awpa ama y rai ma?

8 Na kuzy ta na padua chi ta. châhrasala nâ ta eina pahleipadia lilaw chi.

9 Nâ ta beihlei tawhta eina tao chi tahpa a thei thlâh ha teh; dolei lâta eina pachâsa heih aw chi ma?

10 Nâ ta sâhpiti hawhta na patlai chita, Sâhpi ti kuapa hawhta eina pahlypa chi châ vei ma?

11 “Vo nata sapa ta na bu chi ta, ru nata thari zy chhaota na phie pakhy chi.

12 Nâ ta hrona nata khokheina na pie chi ta, eina mohôhna chi chata ei thlahpa cha a pabohsa haw.

13 Chata hra sala hezy he na pathipalôh liata nyu chi ta; nâma liata he he a y tahpa ei pahno.

14 Vaw molei aw sala, nâ ta na ngia chi ta; ei hmoparaona tawhtapa thai na pachâsa aw va chi.

15 Hmo a parao khohpa ei châ khiahtala, ei hu a po aw! Chyhsa siapa châ aw sala, ei hmia kai aw vei, maophaoh ngaitana chô nata ei rietheina awpa a châ aw.

16 A pasasa aw sala, nâ ta chakeibarôhneipa chadie ta na chadie aw chi ta, ei chô liata biehneina a pamosa heih chi ta;

17 ei chô liata na dyuna tao pathi aw chi ta, ei chô liata na pathi-iana papôhsa aw chi ta; pheisaih a pia piata na tei awpa ta tuah chi ta.

18 “Khazia e chhi tawhta ei na la rai chi? Ahy hmah ta hmô hlâta vaw thi haw sala,

19 y leipa hawhta tlâ châ aw na ta, chhi tawhta thlâ lâ lapa ei vaw châ aw.

20 Ei noh zy he a chyhta châ vei ma? A chalih se, na bâhsai se, ei hu sôkha ta so tua aw sala,

21 kua khao leina awpa su liata ei sie hlâna heta, zohna kyh nata thina nohpahli râh liana chata.

22 zohna chhakaluhpa râh zoh ngaitapa cha, thina nohpahli a ryhpaona rai taona y leina cha, khaina chhao zohna a châna su cha,” tah ta.