Zeremiah 27

Study

         

1 Zudah beipa Zôsiah sawchapawpa Zedekiah abei a thao nota ABEIPA tawhta he bie he Zeremiah hnohta vaw tlô ta.

2 ABEIPA chata ei hnohta he tana heta a tah: “Raopakypa nata a rizy tao la, na rao liata bai teh.

3 Edôma beipa zy, Môaba beipa zy, Amawri mozy beipa zy, Tyre beipa zy, Sidaw beipa zy lâta Zudah beipa Zedekiah lâta chyhsa tuapa Zerusale liata a vypazy ku ta paphao teh.

4 He bie he nama zibeipazy hnohta pareisa teh: “Pheisaihzy ABEIPA Izarel Khazohpa chata he tana heta a tah: He hawhna heta nama zibeipazy hnohta nama reih awpa a châ:

5 Ei hmotaotheina rôhnah ngaitapa nata ei bâh pazawhpa ta alei zy, chyhsapa zy nata alei chôta sazy tao na ta, pie tlâh awpa ei tahpa zy hnohna chata pie na ta.

6 Atahmâ chhao na chakaotuhpa Babylaw beipa Nebukaneza ku liata he râh zydua he ei pie haw, lyurâh sazy chhao ano chakao awpa ta ei pie hra.

7 Ano ra daihti tlai a tlô hlâta cha phopi zyduazy chata ano nata a sawchapawpazy, a sawchapaw sawchapawpazy ama chakao aw; cha hnôh lâna deikua chata phopi hluhpizy nata abei rôhnah ngaitapazy chata ano cha sei ta ama tao aw.

8 “Cha Babylaw beipa Nebukaneza a chakao khoh leipa phopi nata khihnarâh nata Babylaw beipa raopakypa a ky khoh leipa phopi cha, zaozi, chakâhna nata potlana ta, a biehneina ry liata ei soh khai hlâ lei cha ei hrie lymâ aw, ABEIPA ta a tah.

9 Nâmo deikua chata nama hrohsopazy, nama a peipazy, nama mâ sapazy, nama molie thaipazy, nama dyuthaipazy ta nâmo hnohta, ‘Babylaw beipa chakao aw vei eichi,’ tahpa ta a reituhpazy cha nahthlie khah u.

10 Nama râh tawhta lâhlapi ta chhihthapa ta nama y thei nawpa ta nama hnohta haipa bie ama chhochhielie, ei cha topa ei ta nama leidiapâ na awpa ta.

11 Anodeikuacha Babylaw beipa raopakypa a ky ta chakao khohpa phopi cha ama râh ualua liata paysa aw na ta, alei palie aw ei ta, cha liana chata ama pahrâ thlâh ha aw, ABEIPA ta a tah.”

12 Zudah beipa Zedekiah hnohta he bie zydua hawhna heta reih na ta: “Babylaw beipa raopakypa a ky ula, ano nata a chyhsa chakao ula, nama hroh aw.

13 Babylaw beipa a chakao leipa phopi kyh ABEIPA ta a rei hawpa hawhna khata, khazia e zaozi zy, chakâhna zy, potlana zy ta nâma nata na chyhsazy cha nama thi aw tly?

14 Hrohsopa nama hnohta, ‘Babylaw beipa chakao khah u,’ a tahtuhpazy bie cha nahthlie khah u, nama hnohta haipa bie ama chhochhieliepa châ tlôh ta.

15 Ei tuapa châ tlôh leipa ei ta, ei moh reipa ta haipa bie ama chhochhielie tyh, nâmo nata nama hnohta chhochhielietuhpa hrohsopazy cha cha to aw ei na ta, nama leidia aw, ABEIPA ta a tah.”

16 Theihthaipazy nata he zawpi zydua hnohta chhao heta reih hra na ta, “ABEIPA chata he tahna heta a tah: Hrohsopa nama hnohta a chhochhielietuhpa nahthlie teh u, ‘Babylaw tawhta ABEIPA o hmobaozy cha thlai vaw tlôkheipa a châ aw,’ a tahtuhpazy bie cha nahthlie khah u, nama hnohta haipa bie chhochhielie tlôh ei ta.

17 Âmo nahthlie khah u, Babylaw beipa chakao ula, nama hroh aw, khazia e he khihpi he roryhrapa ta a y aw tly?

18 Hrohsopa châ ei sala, Khazohpa bie a ypa a châ khiahtala ABEIPA o nata Zudah beipa o nata Zerusale liata hmobaoh siesaipa ta a ypazy cha, Babylaw lâta tlôkheipa a châ leina awpa ta Pheisaihzy ABEIPA lâta a haw ei se.

19 Pheisaihzy ABEIPA chata a tozy, dawh ti pa-ona zy, a thabypa zy nata he khihpi liata hmobaoh pahlôhpa a ypa zy,

20 Babylaw beipa Nebukaneza ta Zudah beipa Zehôiki sawchapawpa Zekôniah nata Zudah nata Zerusale machâpa zydua Zerusale tawhta Babylaw seichâna ta a chhi nota a la leipa kyh, he tana heta reih ta.

21 Pheisaihzy ABEIPA, Izarel Khazohpa chata ABEIPA o nata Zudah beipa o nata Zerusale liata hmobaoh siesaipa ta a ypazy kyh cha a reih.

22 Babylaw lâta cheipa ta châ aw ei ta, âmo ei vaw tly hlâ lei ta cha cha liana chata ama y thlâh ha aw. Chatawhcha la heih aw na ta, he su liana heta ei soh heih aw, ABEIPA ta a tah.”