Athaona 9

Study

          |

1 Chatawhcha Khazohpa ta Naw nata a sawchapawzy cha byhnâ awpa ta, ama hnohta, “Chi pathlapa ta pôh ula, alei he bie teh u.

2 Nama rarôh yna nata china alei liata, sa to nata a ruapa liata a zawpa pavaw to ta ama hnei aw, chazy nata alei liata a zawpa pavaw to ta ama hnei aw, chazy nata alei liata alyh thaipa zydua nata tilaipi nga zydua cha; nama ku liata piepa a châ khai haw.

3 Hmo hroh hneipa â pie theipa to cha nama châta nie awpa châ aw ta;âhnalasizy ei cha piepa hawhna khata, ato ei cha pie ei.

4 Anodeikua cha sa a hrona, a thisaih chhaota nama nie awpa châ vei.

5 nama hrona thisaih phu cha ei la tlai aw; sa to liata ei la aw, chyhsapa liata chhao; chyhsa to ama uhnawhpazy liana chata chyhsapa hrona phu cha ei la chyu aw.

6 Ahyrai chyhsapa thisaih a palotuhpa cha, chyhsapa lilawh ta a thisaih cha a palosa hra aw; Khazohpa ta chyhsapa cha ano kakuapa ta tao tlôh ta.

7 Chatawhcha nâmo cha, chi pathlapa ta vaw pôh ula, alei liana heta saw hluhpi sa ula, alei chô liana heta vaw pôh teh u,” tah ta.

8 Chatawhcha Khazohpa ta Naw hnohta nata a hnohta a ypa a sawchapawpazy hnohna chata,

9 “Pachâ teh u, keima tlaita nama hnohta nata nama hnôh lâta nama pathlazy hnohta chhao ei biehraina cha ei pa-i.

10 nama hnohta hmo hroh hneipa to a ypa nama y lâhpa, pavawzy, sahrohzy, nata alei liata sa to nama hnohta a ypazy nata balyh tawhta a vaw puapa zydua lâ chhao taihta.

11 Nama o ta ei biehraina cha ei pa-isa aw, tipa-ua ta sapa zydua cha pahleipadia heih khao leipa aw ta, alei parao awpata tipa-ua vaw y heih khao aw vei, tahpata tahta"

12 Chatawhcha Khazohpa ta, “He he kei nata nâmo nata nama hnohta hmo hroh hneipa a ypa zydua likawh ta, ama chhâ zydua chhôh liata ei biehraina pahnosana cha a châ.

13 Meihdo liata ei meisaku paysa na ta, cha cha kei nata alei likawhta ei biehraina ngiana a châ aw.

14 Alei chô liata ameih ei paysa nona chata meihdo liata ei meisaku cha a vaw luah aw ta.

15 kei nata nâmo nata sapa zydua hry liatahpa hmo hroh hneipa to likawhta ei biehraina ei thei thlâh ha aw; chatanachata tizy chata sapa zydua pahleipadia awpa ta vaw y heih chacheita khao aw vei.

16 Meisaku cha meihso liata y aw ta, chatanachata moh aw na ta Khazohpa nata hmo hroh hneipa to alei chôta a ypa maih likawhta chhâzaw biehraina a ypa cha ei thei thlâh ha aw,” tah ta.

17 Chatawhcha Khazohpa ta Naw hnohta, “He he kei nata alei chôta sapa to likawhta ei biehrai pa-ina pahnona a châ,” tah ta.

18 Naw sawchapawpazy balyh tawhta a puapa cha. Sema nata Hama nata Zaphetha ama châ. Hama cha Kana paw a châ.

19 He pathôhpazy he Naw sawchapawpazy cha ama châ; hezy tawhta a puapa chata alei zydua cha ama pahrâ khai haw.

20 Naw cha lyu a taotuhpa ta y pathao ta, kre sahdô tao ta;

21 Kresawti doh ta, pari ta, chatanachata a poh-o liana chata a zia ta.

22 Chatawhcha Hama, Kana paw chata a paw a zia pahrupa cha hmô haw ta, khôtho lâta a uhnawhpa panozy cha chho ta.

23 Chatanachata Sema nata Zaphetha chata poh la ei ta, ama ngiatlâh liata paraipa ta ama hnôh lâta a sy ei ta, ama paw zia pahrupa cha khu ei ta; a hro lâ a heih ei ta, ama paw a zia pahrupa cha hmô leipa ei ta.

24 Chatawhcha Naw cha a kresawti paripa cha a kaw thei ta, a sawchapaw seihnai chaipa ta ano chô liata a taonazie cha pahno haw ta.

25 ano chata,“Kana cha chhiesapa ta y mawh sy;A uhnawhpazy seizy sei a châ aw.”tah ta.

26 “ABEIPA, Sema Khazohpa cha palyupalih ta y se; Kana cha a sei ta y maw sy.

27 Khazohpa ta Zephatha cha palai sala, Sema poh-ozy liana chata pahrâ mawh sy; Kana cha a sei ta y mawh sy,”tah ta.

28 Naw cha tipa-ua hnôh lâta kô za thôh nata sypangawh hroh ta.

29 A hro chhôh zydua cha kô za chaki nata sypangawh châ ta; chatawhcha thi haw ta.